Organizasaun Naun Govermental ( ONG ) Mane Ho Vizaun Foun ( MHVF ) fo formasaun ba inan feton sira hamutuk ema nai’in tolu nulu ( 30 ) iha Aldeia We Tali Tua Suco Bahalara Wai’in Postu Administrativu Viqueque Vila kona ba Violensia Bajeia ba Jeneru ( VBJ ) durante loron ida. Director Ejekutivu ONG MHVF, Moises de Araujo hateten, MHVJ hanesan organizasaun ida nebe maka servisu iha area Violensia Bazeia ba Jeneru, no objetivu hosi formasaun ne’e atu hakbesik liu tan ba inan aman sira atu hodi fahe informasaun kona ba violensia atu nune’e inan sira bele hatene diak liu tan kona ba saida maka violensia ne’e rasik.
“ Organizasaun Mane Ho Vizaun Foun hanesan Organizasaun ida nebe maka servisu liu iha area Violensia hanesan violensia Domestika, Violensia Bazeia ba Jeneru, Violemsia hasoru labarik sira no mos Violensia sira seluk tan. No ita nia objetivu ida maka oinsa atu fo formasaun no mos tulun ba inan aman sira no estratejia nebe maka ami uja maka ami hakarak hakbesik liu ba iha ita nia komunidade sira. Tamba ne’e maka ami hala’o formasaun ida ne’e iha Aldeia sira hanesan agora dadauk ita halo iha ne’e, ( aldeia We Tali tua ). Hodi fahe informasaun liu liu atu responde kona ba Planu Asaun Nasional Violensia Bazeia ba Jeneru. Tamba se ita koalia kona ba asuntu Igualdade Jeneru iha Konstituisaun RDTL artigu 16-17 koalia mos kona ba Feto no Mane iha direitu hanesan”.
Entretantu Director MHVF ne’e mos agradese ba Servisu Apoiu Sosiadade Civil no Auditoria Sosial ( SASCAS ) tamba fundus mai hosi sira. Nia mos hatutan dehan hafoin de fo tiha formasaun sira mos sei atribui fundus ki’ik ba grupu sira atu hodi hadiak ekonomia familia nian.
“ Agradese mos ba SASCAS / Governu bele nafatin ajuda ka suporta fundus, tinan kotuk ami mos hetan ona fundus hosi SASCAS hodi implementa iha Sucu ne’e duni ( Bahalara Wai’in ), iha aldeia rua no tinan ida ne’e ami kontinua iha aldeia We Tali no mos aldeia rua seluk iha Suco Luca. Saida mak ita hakarak hosi formasaun ida ne’e, atu hodi hasa’e ita bot sira nia konyesementu, ita bot sira nia kapasidade antes ami atu atribui fundus ki’ik oan nebe Governu fo. Atu tulun familia sira nebe maka vulneravel, liu liu feto sira. Tamba ne’e maka formasaun ne’e ami fo oinsa atu maneja kona ba oinsa uja osan ne’e”.
Entretantu Dir. MHVF ne’e mos agradese ba komunidade sira nebe maka partisipa ona iha treinamentu refere, no nia mos agradese ba Cefe aldeia tamba bele kopera diak ho ekipa hosi MHVF hodi oferese fatin.
Iha fatin hanesan Gestora Subvensaun Publiku nebe maka akompanya direta ba actividades ONG Mane Ho Vizaun Foun ( MHVF ) nian iha Municipiu Viqueque no mos Gestora ba projetu hotu hotu nebe maka lokalija iha Municipiu Viqueque, SASCAS, Noria Maria Soares hateten ONG MHVF nia actividade kleur ona no hetan bebeik apoiu hosi SASCAS uluk mos sei iha servisu apoiu sosiadade civil mos sira hetan ona. Nia mos afirma katak MHVF nia actividade ne’e ekipa hare katak pertenente tebes tamba ne’e maka SASCAS deside kontinua apoiu.
“ Organizasaun Manene ho Vizaun Foun ne’e parseiru kleur ona ho SASCAS, desde uluk kedas sei iha tempu Gabinete apoiu Sociadade Civil mos sira hetan ona ajuda ka fundus hosi neba, no agora mos kontinua hetan tamba ekipa hare katak MHVF nia actividade ne’e pertenente tebes atu ajuda duni komunidade sira iha baze, tamba ne’e maka kontinua apoiu sira nia actividade. SASCAS nia planu rasik tuir dekretu lei nebe maka sita rasik iha neba katak atu fo apoiu ba Sociadade Civil sira, grupu komunitariu, Organizasaun Rezistensia, Relijiaun sira hanesan Katolik ou non Katolik no mos grupu sira laiha relijiaun. No actividade sira nebe maka Governu liu hosi SASCAS finansia ne’e ita bele dehan katak Multi sektoral, tamba kobre areas oin oin. No actividade nebe maka ONG MHVF hala’o ne’e pertenente los tamba halai liu kona ba formasaun ba kontra Violensia Bajeia ba Jeneru no mos oinsa atu ajuda inan feton sira buka fundus rasik, buka moris rasik iha aldeia ida ne’e. Tamba ita agora iha ona era Ukun Rasik An, ita labele abitua nafatin ho Violensia no feto mos iha direitu atu bele buka moris. Tamba ne’e hau husu ba inan feton sira nebe maka tuir formasaun ida ne’e atu rona ho diak hodi bele implementa iha ida idak nia familia ka uma laran”.
Entretantu Noria Maria Soares mos husu ba sira nebe maka tuir formasaun ne’e atu aproveita ho diak liu liu kona ba Violensia domestika atu nune’e bele hatene no labele akontese nafatin violensia iha uma laran.
Nune’e mos Cefe Aldeia We Tali Tua, Augosto do Carmo nebe partisipa mos iha seremoni ne’e dehan, nia emar sira nebe rejistu atu hodi tuir formasaun refere hamutuk ema nai’in tolu nulu, maibe karik balun la partisipa tamba iha difikuldades ruma entaun nia hodi sira nia fatin husu deskulpa ba ekipa hosi MHVF no mos SASCAS.
“ hau nudar Cefe Aldeia atu dehan katak komunidade sira nebe maka rejistu ona atu tuir formasaun ne’e hamutuk ema 30 maibe karik balun labele marka prejensa tamba defikuldades karik, hau hanesan Cefe Aldeia hodi sira nia fatin husu deskulpa ba ekipa MHVF no mos Korda. Hosi SASCAS, maibe ami iha ne’e garante katak informasaun nebe maka hetan ohin iha treinamentu ida ne’e ami sei transmite ka fahe tutan fali ba sira nebe labele mai ohin karik tamba defikuldades balun no mos sira seluk nebe maske la rejistu, tamba importante los atu hau nia komunidade sira hatene kona ba Violensia Bajeia ba Jeneru ne’e rasik hodi nune’e bele redus kazu Violensia iha hau nia Aldeia ne’e. Tamba atu halakon kedas sei difisil uituan maibe bele reduz.
Hafoin de hato’o tiha nia mensajen badak Cefe Aldeia Agugosto do Carmo mos loke ofisialmente formasaun refere. Partisipa ba iha actividade abertura formasaun ne’e maka, Gestora Subvensaun Publiku ba projetus sira nebe maka finansia hosi SASCAS iha Municipiu Viqueque Noria Maria Soares ho nia ekipa, Dir. ONG Mane ho Vizaun Foun ( MHVF ) Moises de Araujo ho nia ekipa, Cefe Aldeia We Tali Tua, Augosto do Carmo partisipantes ba formasaun no mos konvidadus sira seluk tan.
Jornalista : Adriano Antonio Mesquita
Editor ; Florindo de Jesus
