Forun ONG Timor Leste ( FONGTIL ) hala’o vijita mai Municipiu Viqueque hodi halo enkontru ho membrus sira iha Municipiu Viqueque, tersa feira loron 24 fulan Outubro no hola fatin iha Sala enkontru Fundasaun Knua haberan Comunidade ( KHC ) iha Uma-ki’ik Beobe. Membru Konselhu FONGTIL , Felismina Belo hateten, objetivu hosi vijita ne’e atu enkontru mos ho membru active sira hodi haforsa fali servisu membru FONGTIL nian iha baze.
“ Objetivu ohin Konselhu ho ekipa hosi FONGTIL mai vijita hodi halo mos enkontru ho membrus sira, liu liu membrus sira nebe active, atu haforsa fila fali membrus sira nia servisu iha baze no mos kesi ho sekretariadu ba iha membrus sira. No mos objetivu ida seluk maka atu atu hasoru mos sira nebe maka foin prepara an atu ba rejistu iha FONGTIL”,
Felismina Belo mos hatutan dehan, vijita ne’e sira hala’o tuir ida idak nia area, no nia maka responsabilija ba iha Reziaun Leste nian no sira hahu hosi Municipiu Manatutu, Baucau no ohin iha Viqueque no sei kontinua ba iha Municipiu Lautem.
“ Iha Reziaun Leste hau maka hanesan responsavel no ami hahu oha hosi Manatuto, no Baucau I ohin iha Viqueque no aban ami sei kontinua ba iha Lautem/ Lospalos. Ba iha reprejenta membrus sira iha RAEWA mos remata ona. Nune’e mos sira seluk nebe maka reprejenta Reziaun Rai Klaran no Oeste mos remata ona, tamba ami nia objetivu hanesan deit”.
Membru Konselhu Fongtil nebe responsabilija ka sai mos hanesan konselhu principal iha Area Finansas FONGTIL nian ne’e kontinua afirma katak hafoin de remata tiha vijita ne’e sira sei akomula hamutuk ideias sira hosi membrus hodi diskute.
“ Remata de vijita ida ne’e, no ami sei fila fali ba hodi akomula hamutuk ideias sira hosi membrus, no ami hakarak hadia liu liu Estatutu no mos implementasaun nebe durante ba kotuk sai hanesan lakunas ida nebe halo FONGTIL la forsa. Entau ami hakarak hadia situasaun sira ne’e atu nune’e membrus sira mos bele sente katak sira maka membru FONGTIL no FONGTIL mos sente katak sira nia membru iha duni Teritoriu Timor Leste hodi halo hela actividade hodi ajuda ita nia Estadu. No ami mos rona no anota lamentasaun sira hosi membrus atu nune’e halo planu karik tenki bazeia ba membrus sira nia rekomendasaun sira”.
Membru Konselhu FONGTIL, Felismina Belo mos husu ba membrus ONG sira hotu iha Municipiu Viqueque nia laran atu servisu hamutuk nafatin ho Autoridades local sira, parte Governu nian servisu hamutuk mos ho CBO sira atu nune’e bele atinji ita nia meta. Nune’e mos nia husu ba CBO sira atu prepara an hodi bele mos ba Rejistu iha Fongtil hodi sai membru permanente.
Intretantu soru mutuk ne’e hala’o durante loron sorin no partisipa hosi membrus ONG sira iha Municipiu Viqueque nia laran no mos CBO sira no grupu benifisiarius sira nebe hetan mos apoiu hosi ONG sira iha Viqueque ema hamutuk rua nulu resin.
Jornalista : Adriano A. Mesquita
Editor : Florindo de Jesus
