Eleisaun ba Lideransa suco nebe hala’o tiha ona iha Sabadu loron 28 fulan Outubro 2023 semana liu ba iha Municipiu Viqueque, Sucos 23 maka sei tama fali ba iha segunda ronde tamba laiha kandidatu ida maka prense rekezitus 50+ 1 %. Director STAE Municipiu Viqueque Humberto Fernandes konfirma katak hosi Sucos 35 nebe estabelese iha Municipiu Viqueque nia area kobertura iha Sucus 13 deit maka konsege ultrapasa ona iha Eleisaun Sucu foin liu ba no Sucos hamutuk 22 maka tenki ba fali iha Eleisaun segunda ronde nian nebe maka sei hala’o iha loron 13 fulan Novembro mai.
“ Iha Sucus eleitu ne’e 13 iha Municipiu Viqueque maka eleitu ona, iha primeira ronde deit manan tiha ona, maibe iha sucus hamutuk 22 maka sei tama fali ba iha segunda ronde. Eleisaun ba segunda ronde tuir kalendariu nebe maka Konselhu Ministrus aprova tiha ona iha fulan Agosto liu ba ita sei halo fali iha loron 13 fulan Novembro mai”.
Entretantu Sucos nebe maka sei tama fali ba segunda ronde maka Posto Administrativu Lacluta maka Suco Ahic no Uma Tolu, Posto Ossu, Suco Builale, Ossu de Cima, Wabubu, Loihuno no Osorua, Posto Watu Carbau maka Suco Uani Umana, Afaloikai Bahatata no Loi Ulu, Posto Watulari Suco Makadiki, Matahoi Waitame Afaloikai no Vesoru no Postu Viqueque vila maka Suco Carau Balo, Bibileo Bahalara Wai’in Maluru, Luca no Suco Uma Kiik.
Hatan ba pergunta jornalista nian kona ba papel STAE nian relasiona ho lamentasaun barak nebe mosu iha Media social katak Eleisaun Orgaun Suco nian ba tinan ida ne’e la’o la diak, Humberto Fernandes dehan, se se diet iha direitu atu hato’o nia hanoin maibe atu dehan deit katak iha Municipiu Viqueque Eleisaun Orgaun Suco ne’e la’o ho diak no hetan partisipasaun maximu hosi komunidade sira.
“ Ema hotu hotu iha direitu atu fo sira nia observasaun, atu fo sira nia lamentasoens sidadaun hotu iha rai ida ne’e iha direitu atu koalia. Maibe tuir tekniku sira nia hare no hau hanesan Director STAE hare katak Eleisaun iha Sucos 35 no Aldeia 230 la inklui Suco Builo Eleisaun la’o ho diak no hetan partisipasaun maximu hosi komunidade sira. Iha Municipiu seluk karik hau la hatene. Maibe atu dehan mos katak Eleisaun ida ne’e nai’in lolos maka Cefe Suco sira, Cefe Aldeia sira, Administrador Postu sira. No STAE fo apoiu tekniku deit”.
Atu fo hanoin fali katak Municipiu Viqueque kompostu hosi Postos Administrativus lima, Sucos tolunulu resin nen no Aldeias hamutuk atus rua tolunulu resin hat ( 234 ) maibe Suco Builo ho nia Aldeias 4 la partisipa iha Eleisaun Suco ba tinan 2023 ne’e no tuir Lei sei halo fali Eleisaun ba Suco Builo iha fulan Abril tinan 2024 mai.
Jornalista ; Eugenia Alves
Editor ; Florindo de Jesus
