Policias Nasional Timor Leste ( PNTL ) sei garante seguransa iha Municipio Viqueque nia laran hodi komemora loron Restaurasaun Independensia RDTL ba dala rua nulu resin rua ( XXII ) nebe monu iha loron 20 fulan Maio tinan 2024 ne’e. Komandante PNTL Municipio Viqueque ……. Hato’o lia ne’e wainhira partisipa iha seremonia abertura feira ba produtu Nasional nebe maka hala’o hosi MCI foin lalais ne’e iha Viqueque. Komandante PNTL ne’e mos hatutan dehan situasaun seguransa iha Municipio Viqueque hahu kedas hosi Janeiro tinan 2024 mai to’o ohin loron la’o diak tebes.
“ Ita hotu haten seguransa iha Municipio Viqueque hahu kedas iha fulan Janeiro mai to’o ohin loron la’o diak tebes, kontribui tebes ba ita nia Governo nia planu nebe maka atu halo desenvolvementu iha ne’e. Portantu segurasa hirak ne’e la’os PNTL nia servisu mesak maibe ne’e ita hotu nia responsabilidade, no wainhira ita rasik la sente tauk entaun signifika katak ita nia seguransa diak no laiha buat ruma maka atu ameasa ita. Tamba ne’e maka ita hotu bele kontribui ba paz no estabilidade iha ita nia Municipiu Viqueque “.
Entretantu Komandante PNTL Municipiu Viqueque ne’e mos kontinua haktuir dehan,
“ Ita hotu hatene katak ita Municipiu Viqueque ne’e bainhira iha seremonia ruma hosi parte Nasional sira sempre tau Duvida barak ba kestaun seguransa ninian, maibe realmente hosi Janeiro mai to’o ohin loron seguransa la’o diak tebes, ne’e tamba ita hotu nia kontribuisaun liu liu joven sira. Tamba ne’e ita tenki kontinua manten nafatin hodi komemora ita nia loron Restaurasaun Independensia ba dala XXII iha ita nia Municipio, no hau mos koloka ona membrus sira atu hodi asegura diak liu tan seguransa hahu ohin to’o semana oin liu liu iha loron H 20 de Maio. Paz no dame iha ita Viqueque nia liman no ita hotu espera katak ba oin ita nia seguransa sei diak liu tan.
Koamdante PNTL ne’e mos kontinua enkoraja ema hotu liu liu joven sira iha Municipiu Viqueque atu kontinua kria seguransa nebe estavel no diak atu nune’e ita nia Governo bele hala’o desenvolvementu ho diak liu taniha Municipiu Viqueque nian laran,nia mos dehan tan atu kria seguransa laos iha deit loron bot sira maibe tenki lor loron, tamba wainhira ita rasik sente seguru ne’e sigmifika katak seguransa diak.
Jornalista ; Adriano A. Mesquita
