Komunidade Suco Loihuno uza orsamentu Programa Mᾶo de Obra Posto Administrativo Ossu nian hodi loke Estrada ho distansia kilometro 12 hosi Suco Loihuno ba Aldeia Waiheda iha Bubur Laran besik fatin Turismu Komunitariu We Luli Manas nian. Ba jornalista Radio Povo Viqueque ( RPV ) nian segunda feira 18-09-2023 semana ne’e Cefe do Suco Loihuno, Miguel da Costa Mello dehan, objetivu loke Estrada refere atu hodi fasilita nia komunidade sira nebe maka hela iha aldeia Waiheda hamutuk uma kain nennulu resin lima. No mos atu haluan ka muda sai komunidade balun nebe hela iha Loihuno rasik maibe hela tuir deit Estrada ninin sira. Entretantu Cefe Suco ne’e mos hatutan dehan Estrada refere laos loke foun tamba kuandu tempu bailoron kareta bele tama maibe tempu udan labele.
“ Ida ne’e programa ida nebe existe hanaran Programa Mᾶo de obra ba Posto Administrativo Ossu, no primeira faze nian ami implementa tiha ona, no segundu faze nian maka ami kontinua implementa hodi loke Estrada hosi Suco (Loihuno ) ba aldeia Waiheda ho nia objetivo maka atu komunidade sira iha neba bele asesu hodi tula sira nia produtu local mai merkadu no mos sira moras karik bele mai lalais halo tratamentu tamba iha neba laiha Klinika ruma liu liu inan isin rua sira. No mos bele fasilita ami kuandu tula raihenek karik besik no nia kustu mos ladun bot. Nune’e mos kuandu Estrada diak ona ami bele muda sai komunidade balun nebe hela hamutuk deit iha ne’e no hela tuir deit Estrada nenin, halo deit uma andar sira iha trotoar nia leten. Sira hakarak muda ba neba maibe tamba Estrada maka seidauk iha. No populasaun iha Aldeia Weheda ne’e hamutuk uma kain nen nulu risin maibe iha neba mos laos populasaun Ossu nian deit maka hela mais hosi Suco Bibileo no Waimori mos barak mak hela iha neba”.
Entretantu hatan ba orsamentu hira maka uza, Cefe Suco ne’e dehan programa ne’e nia orsamentu Administrador Posto sira maka jere no laos ba Suco Loihuno deit maibe ba Suco sanulu nebe existe iha Posto Ossu nian. Sira servisu bazeia deit tuir grupu no Suco Loihunu iha grupu tolu maka servisu ba programa ne’e no kada grupu iha ema nain ruanulu servisu durante loron ruanulu troka malu. Miguel da Costa Mello mos afirma dehan ne’e hanesan programa inisiu ida no sira rasik maka servisu ho liman deit ( manual ), maibe nia hamutuk ho Administrador Posto sei halo proposta ba Governo ka Azensia sira hanesan AILO atu kontinua hadiak Estrada refere.
Hatan ba pergunta jornalista nian kona komunidade iha aldeia Waiheda asesu on aba energia eletricidade ka seidauk, Cefe Suco ne’e dehan agora dadauk sira hetan ona naroman hosi ahi eletricidade no la kleur tan sei halo inaugurasaun.
“ Sim sira asesu on aba eletricidade no la sala iha dia 28 mai ne’e ( 28-09-2023 ) bele inaugural ona. Ne’e laos ba komunidade aldeia Waiheda deit maibe ba sira hotu iha neba, Hosi Suco Bibileo nian no mos Suco Waimori nia ema hotu. Ne’e la kleur tan halo ona inaugurasaun. So ke Estrada maka seidauk iha, no mos Postu saude laiha, tamba ne’e maka komunidade sira iha neba hasoru problema wainhira sira moras no mos inan isin rua sira atu partus karik susar los”.
Cefe Suco Loihuno Miguel da Costa Mello mos husu ba komunidade sira atu partisipa hodi servisu iha program refere tamba tuir Cefe Suco ne’e katak ne’e hanesan program aka projetu exemplar ida atu nune’e loke dala para Governu tenki tau atensaun hodi halo diak liu tan, tamba sira servisu ho liman deit ne’e katak sei la dura ba tempu naruk. Tamba ne’e nia husu atu Governu tau atensaun hodi halo diak liu tan iha future mai hodi komunidade sira iha neb abele asesu ba merkadu, saude no mos seluk tan. Tamba tuir Cefe Suco ne’e mos katak, wainhira Estrada maka diak ona desenvolvementu iha parte seluk mos sei la’o ho diak.
Jornalista ; Adriano A. Mesquita
Editor ; Florindo de Jesus
