Sekretaruia Estadu Komunikasaun Social SEKOMS liu hosi Diresaun Centru Formasaun Teknika Komunikasaun ( SEFTEK ) hala’o treinamentu kona ba Relasaun Publika no Protokolu durante loron lima hahu hosi Segunda Feira loron 9 no sei remata iha Sesta feira loron 13 fulan Outubro 2023 ba Funsionarius Publiku sira iha Municipio Viqueque. Kordenator SEFTEK Rafael da Silva Freitas hateten, SEFTEK nia knar principal maka atu fasilita formasaun ba Funsionariu sira ho nia objetivu atu haklean liu tan sira nia konyesementu iha Area Komunikasaun Sosial nian no durante formasaun formadores sira sei lori material hat no ida importante liu maka Relasaun Publiku no Protokolu.
“ SEFTEK nia knar principal maka atu fo formasaun ba ita nia Funsionarius sira Tamba ne’e iha tinan ida ne’e ami iha planu annual atu fo formasaun ba ita nia funsionarius sira iha Municipiu lima hanesan, Atauru, Viqueque, Aileu, Ainaro no Covalima. No agora dadauk ita halao iha Municipio Viqueque durante loron lima nia laran ba ita bot sira inklui mos Sentru Informasaun hat nebe maka estabelese iha Municipio Viqueque. Formasaun ne’e realija tamba iha tinan 2019 liu baa mi halo peskija haleu Municipiu sira hotu inklui mos Viqueque, no hosi neba ami hetan rekomendasaun hosi ita bo’ot sira, tamba ne’e maka ami ejekuta deit ita bo’ot sira nia rekomendasaun, maske ho tempu nebe naruk. Tamba ne’e husu ba formadus sira atu aproveita oportunidade hodi partisipa ho diak karik iha buat ruma nebe la klaru labele moe ka tauk atu husu”.
Iha fatin hanesan Administrador Municipiu Viqueque, Januario Soares – Boli agradese ba SEKOMS tamba bele tau duni ona iha planu hodi fo formasaun ba Funsionarius sira iha Municipiu Viqueque.
“ Ohin ita koalia barak ona maibe hau hakarak atu agradese deit ba SEKOMS tamba bele tau duni iha planu hodi realija formasaun ne’e maske husu ema ka funsionarius nai’in ruanulu ( 20 ) deit, no hau mos hakarak informa kata kami nia partisipantes sira ne’e maioria funsionarius Kazual deit, tamba ami iha ne’e funsionarius Permanente ne’e limitadu los”.
Entretantu Administrador Municipiu ne’e mos husu ba partisipantes sira aproveita tempu hodi partisipa ho diak atu nune’e iha future mai bele hala’o iha Viqueque.
Nune’e mos Cefe Gabinete SEKOMS nian Elizeu Izac Fernandes nebe reprezenta SEKOMS hodi halo abertura ba actividade formasaun ne’e dehan Politika Nonu Governo Konstitusional nian katak buat nebe diak maka Governo ne’e iha dever atu kontinua.
“ Hau reprejenta Sua Exelensia SEKOMS atu loke hela formasaun ida ne’e, Ita hotu hatene katak Nonu Governo Konstitusional depois de la’o parese hela deit loron hira atu kompleta 120 dias maibe iha Organika Nonu Governo nian nebe maka aprova ba SEKOMS ita estabelese nafatin SEFTEK nebe kabe ba SEKOMS tamba ho hanoin ida katak buat nebe diak ita iha obrigasaun atu kontinua. Tamba ne’e formasaun ida ne’e ita hala’o bazeia ba bazet LINE ASESMENT. Iha 2019 ita hahu tiha ona no ba tinan ida ne’e ita kontinua hosi Municipiu Viqueque, tamba ne’e hodi SEKOMS nia naran atu husu ba formadus sira, atu aproveita didiak oportunidade ida ne’e atu nune’e bele benifisia ba iha Municipiu, Posto, Sucos no mos Aldeis. Ne’e la signifika katak ita bo’ot sira mamuk liu konyesementu kona ba Relasaun Publika no Protokolu, maibe ita hotu hatene katak aprende ne’e laiha limitasaun atu nune’e bele sai diak liu tan. Tamba ne’e ita bo’ot sira labele kaku, karik buat ruma maka ita bot sira duvidas tenki husu ba formadores sira atu esplika diak liu tan ba formadus sira. Hau hatene katak loron lima ne’e la to’o maibe se ita bo’ot sira presija nafatin bele halo pedidu ba SEKOMS no SEKOMS pronto nafatin atu fasilita formasaun ba emi”.
Hafoin remata nia intervensaun Cefe Gabinete SEKOMS Elizeu Izac Fernandes hodi SEKOMS nia naran halo abertura ba formasaun refere.
Nune’e mos Sekretario Municipal de Viqueque Teotonio Sarmento nebe partisipa mos iha seremonia abertura ba formasaun refere husu ba SEKOMS atu bele fo mos formasaun refere ba iha nivel Escola Sekundario sira no bele fahe mos material formasaun nian ba iha nivel Cefia sira atu hodi hare maske la tuir formasaun tamba tuir Sekretariu Municipiu ne’e katak material kona ba Relasaun Publiku no Protokolu ne’e importante tebes atu kargu Cefia sira iha Nivel Municipal hatene.
Partisipa iha actividade abertura ba Formasaun kona ba Relasaun Publiku no Protokolu iha Municipiu Viqueque ne’e Cefe Gabinete SEKOMS ho Kordenador SEFTEK, Ad. Municipio Viqueque ho nia Sekretariu, Directores Linyas Ministeriais sira balun , Formadores sira hosi SEFTEK no Formadus sira hosi Administrasaun Municipal, no mos hosi Centru Informasaun Makadiki, Waimori no Ossu hamutuk formadus 25 maka partisipa durante loton lima no hola fatin iha Salaun Administrasaun Municipal de Viqueque, no abertura ba formasaun ne’e rasik hala’o hosi Cefe Gabinete SEKOMS, Segunda feira loron 9 – 10 – 2023.
Jornalista : Adriano Antonio Mesquita
Editor : Florindo de Jesus
