Estrutura Konselho Konsultivo Municipio viqueque tersa feira loron 5 fulan Setembro 2023 ne’e halao encontru estraordinario ida iha salaun Administrasaun Municipio nian hodi halo reajustamentu no fo apresiasaun ba programa prioridade Municipio nian.
Administrador Municipio de Viqueque nebe hanesan mos Prezidente Concelho Consultivu Municipal Januario Soares-Boli iha nia intervensaun dehan objetivu hosi reuniaun estraordinariu ne’e atu halo apresiasaun ba programa planu asaun Municipiu nian nebe halo tiha ona iha fulan hirak liu ba no hodi on aba aprejenta iha Nasional ( Ministeriu Estatal ) maibe tenki aumenta tan buat balun no planu municipiu nian tenki han malun ho planu Nasional nian.
“ Ita nia objetivu ba encontru estraordinariu ohin nian ne’e atu halo apresiasaun ba programa Planu asaun Annual Municipiu viqueque nian nebe maka ita foti tiha ona desijaun iha fulan hirak ba kotuk ne’e, maibe iha encontru entre Administradores hosi Municipio hotu ho Ministru foin lalais ne’e iha Dili, Iha alterasaun ruma kona ba programa nebe maka ita aprova iha kotuk. Tamba tuir Ministru katak programa sira nebe maka ita halo iha Municipio tenki han malun ho programa Governo Central nian. Se lae programa Governo Central nian la’o ketak pois ita nia planu asaun bele halo buat balun seidauk tama iha neba, entaun iha introdusaun buat foun balun tamba ne’e maka konvoka membrus Koncelho Konsultivu tomak para it abele reuni, hodi bele halo aprovasaun ba reajustamentu pontus balun nebe maka seidau delibera iha encontru ida kotuk presijamente konvoka ita bot sira atu mai halo apresiasaun no votasaun ba introdusaun foun nebe maka foin hatama. No la altera ida uluk nebe maka ita aprova tiha ona maibe sei aumenta tan buat foun ruma. Ne’e maka presija ita nia apresiasaun no ita nia aprovasaun ba buat foun sira nebe maka sei introduz iha laran”.
Entretantu Prezidente konsultivo mos dehan programas nebe maka ita aprova antes no laiha alterasaun maibe sei inteira tan programas foun balun tamba ne’e maka presija KKM nia apresiasaun.
Iha fatin hanesan Tekniku hosi PDIM Municipio nian Injineiru Isac mos aprejenta planu programa prioritarius ba tinan 2024 nian hamutuk 26 no aumenta tan programa foun hat nebe maka rekomenda hosi Ministru Estatal maka , Rehabilitasaun ba Merkadu Municipal Posto Ossu nian, Castelo Posto Ossu, Balkaun Uniku no Monumentu Istoriku iha fatin aviaun helicopter ida monu iha Suco Leoruka nian.
Entretantu Director PDIM Municipio viqueque deklara katak alokasaun orsamentu tuir dadus estatistika ba Municipio Viqueque hetan Osan ho montante Milaun hat rihunatus walu tolu nulu resin tolu pontu centavus limanulu resin walu ( 4. 833.000,58 )
Entretantu hafoin rona tiha esplikasaun hosi Prezidente KKM no aprejentasaun programas prioritarius ba tinan 2024 nian hosi Tekniku PDIM Munisipio Isac tuir kedas ho prosesu diskusaun ba programas hirak ne’e molok avansa ba votasaun. Hafoin kontinua ho votasaun hosi membrus konselho konsultivo sira nebe partisipa hamutuk ema naiin 39 hosi total membrus 56 fo sira nia votus Unaminidade ba planu programas hirak ne’e. No turi Prezidente Konsultivo Konsultivu Municipio Januario Soares katak iha loron hitu no loron 8 fulan Setembro ne’e sei lori hikas programas sira ne’e mai aprejenta iha Ministerio Estatal iha Dili.
Iha encontru estraordinariu KKMV nian ne’e hetan mos partisipasaun hosi Sekretariu Municipio nian, Komandante PNTL Municipio Administradores Posto Administrativu lima, Directores linhas Ministeriais sira no mos konvidadus sira seluk nebe sai hanesan observador, no actividade refere halao durante loron ida hahu hosi tuku sia ( 9.00 ) dader to’o loraik tuku lima ( 17.00 ) OTL.
Jornalista; Adriano A. Mesquita
Editor ; Florindo de Jesus
