Komunidade Posto administrative Lacluta porsentu sianulu resin lima ( 95% ) maka asesu on aba energia eletricidade. Lia ne’e hato’o hosi Administrador Posto Administrativo ( APA ) Lacluta Jose Andrade dos Santos ba Jornalista RPV Tersa feira loron 5 – 09 – 2023 ne’e iha salaun Encontru Administrasaun Municipio Viqueque nian wainhira partisipa iha Encontu Estraordinariu Konselho Konsultivo Municipio nian. Jose Andrade dos Santos deklara katak hosi total populasaun iha Posto Lacluta nebe kompostu hosi Sucos hat 95% maka hetan ona naroman hosi energia eletricidade no sei falta deit mais ou menus porsentu lima ( 5% ) maka seidauk. Enkuantu sira nebe seidauk hetan naroman ne’e tamba hela la hamutuk.
“ Eletricidade ho be mos iha Posto Administrativo Lacluta nia laran tomak hau bele deklara katak iha ona noventa e cinco porsentu ( 95% ), tamba are sira nebe maka eletricidade no be mos seidauk tama ne’e iha area rua deit, Bairu Nu tetuk iha Suco Uma Tolu nian no Aldeia Hali Oan Suco Ahic nian maka seidauk. Iha area Hali Oan nian tuir lolos be no ahi eletricidade bele ba, maibe tamba menus de populasaun ka populasaun sira hela la hamutuk tamba ne’e maka seidauk bele. No iha Area Nu Tetuk nian sira besik ona maibe seidauk tamba sei presija koloka uma tuir Estrada. Ne’e konforme ba negosiasaun nebe hau halo ona ho ema EDTL sira”.
Maibe APA Lacluta ne’e mos preokupa liu ho kondisaun Estrada nebe liga Posto Lacluta ba Municipio no mos Nasional nune’e mos ba Sucos sira nebe at ba bebeik. Tuir Jose Andrade katak infraestrutura Estrada maka la ajuda atu Ministeriu sira seluk bele hala’o sira nia programa ho diak hodi hatan ba nesecidade Povo nian. Tamba ne’e Nia husu ba Nonu Governo Konstitusional liu liu Ministerio Obras Publiku atu iha Orsamentu Tinan 2024 nian tau atensaun maximu ba estradas sira tamba tuir Jose Andrade dos Santos katak, so Estrada nia kondisaun diak maka bele fo susesu ba programa sira seluk Governo nian. Administrador ne’e mos preokupa ho linha telefonika nebe iha Posto Lacluta la’o la diak defikuta mos kontactu ba ema sira iha Lacluta. No Nia husu ona ba Parte nebe kompetente iha Area refere atu bele monta tan antenna ka tore ruma iha neba atu nune’e bele fasilita diak liu tan informasaun ba mai.
Entretantu tuir observasaun jornalista nia iha Posto Lacluta nota katak linha telephone iha area neba liu liu Timor Telkom ho Telkomsel la’o la diak no difikuta tebes ba kliente sira nebe uja rede rua refere. Nune’e mos Telemor maka asesu maibe lentu los.
Jornalista ; Adriano A. Mesquita
Editor ; Florindo de Jesus
