Kandidatus hamutuk ema nai’in atus 350 (atus tolu lima nulu ) loron 12 fulan Setembro tinan 2023 ne’e tuir ona teste hodi compete ba vaga Ofisial Supervizaun Eleitoral CNE nian iha Salaun Administrasaun Municipio Viqueque. Director Comisaun Nasional de Eleisaun ( CNE ) Municipio Viqueque, Honorio da Cruz hateten, kandidatus sira nebe tuir teste ne’e sira liu tiha ona selesaun ba dokumentus no sei tuir fali teste ka exame escrita no wainhira liu escrita sei tuir tan fali exame oral.Entretantu vaga nebe maka CNE atu rekruta hamutuk 234 bazeia ba Aldeia nebe maka iha Municipio Viqueque nia laran tomak.
“ Ita nia ofisial supervizaun eleitoral nebe maka ita atu rekruta ne’e, tuir planu ita sei rekruta ema hamutuk 234 bazeia ba total Aldeias sira nebe maka iha Municipio Viqueque nia laran. No sira nebe maka ohin tuir exame eskrita ne’e tamba sira liu tiha ona faze primeiru nian maka hanesan selesaun ba dokumentus, no sira sei tuir fali exame eskrita nian, no se maka liu iha eskrita sei tama ba faze tuir mai maka exame entrevista ka oral. Ho nia objetivu ida katak sira kuandu pasa ona iha exame sira ne’e atu fo apoiu ba iha prosesu tomak Eleisaun Suco nian maka hanesan fo apoiu ba iha meja Eleitoral Asembleia Aldeia nian, meja Eleitoral Suco no mos meja edhok ka meja Konselho suco”.
Entretantu Honorio da Cruz mos afirma katak prosesu nebe hala’o ne’e nakloke ba ema hotu no la’o tuir sistema professional no sira nebe maka liu karik iha prosesu ne’e selesionadu duni no liu duni ho professional.
“ Hau hanoin ba kandidatu sira nebe maka tuir hela prosesu ne’e nakloke ba ema hotu sira bele compete ba, compete ho professional no sira nebe maka liu iha prosesu ne’e selesionadu duni, tamba meius de realijasaun iha proseu mos ita bele dehan katak 0pta ba iha sistema nebe maka professional no atendementu nebe maka igual. No atu liu ka la liu ne’e depende ba resultadu sira nian rasik no CNE sei la intervene”.
Materia sira nebe maka tama iha exame ne’e maka hanesan Konstituisaun RDTL, Lei ba Orgaun Eleitoral CNE nian, Lei Eleitoral Suco nian, no mos liga mos ba istoria balun kona ba Timor nian. Tamba ne’e Director CNE Municipio ne’e husu ba kandidatus sira atu buka le kona ba material hirak ne’e. Entretantu rejultadu ba exame escrita ne’e sei fo sai iha loron 19 fulan Setembro ne’e no sei kontinua kedas ho exame oral ka intrevista ba sira nebe pasa iha exame eskrita.
Hatan ba pergunta jornalista nian kona ba kandidatu sira nebe maka sei compete ba Eleisaun Suco nian iha ka lae feto no mos ema ho difisiensia, Honorio dehan, to’o agora sira seidauk iha lista kandidatu sira, maibe nia reasa katak durante CNE nia Edukasaun Civika ba iha Posto sira no mos Sucos sira hamutuk dala 8 ona, sempre fo hanoin ka enkoraja atu inan feton sira no mos ita nia maluk sira nebe maka ho difisiensia atu labele sente tauk ka mo’e hodi kandidata an. Tamba ita hare ba valor inkluzivu entaun fo mos oportunidade ba sira atu partisipa iha eleisaun hodi hili no mos kandidatu an ba. No ba feto sira lei Eleisaun Suco nian Nomero 9 bara 2016 fo dalan ba sira atu kandidatu an ba. Director CNE Municipio ne’e mos kontinua enkoraja maluk sira nebe maka ho difisiensia atu brani kandidata an ba iha Eleisaun Suco tamba tuir ita nia Lei Inan dehan ema hotu iha Direitu hanesan atu hili no ema hili. Entretantu tuir kalendariu nebe estabelese ona katak Eleisaun Suco sei hala’o iha loron 28 fulan Outubro tinan 2023 ne’e.
Jornalista ; Adriano A. Mesquita
Editor : Florindo de Jesus
