Proseu aprendijazen iha Escola bazika filial Fatudere la’o ho diak tamba hetan mos atensaun hosi inan aman sira. Jacinto Alberto soares hanesan Kordenator ba escolar refere hato’o lia ne’e ba jornalista iha EBF Fatudere segunda feira loron 28 fulan Agosto tinan 2023 ne’e. Jacinto hatutan dehan escolar ne’e ho alunos 157 no profesores hamutuk ema nai’in 9 permanente nain 4 kontratadu 4 no voluntariu ema nai’in 1.
“ Escola EBF Fatudere nia centrum maka Escola 03 Beaco, durante ne’e escolar ne’e la’o ho diak ka la’o normal hanesan baibain tuir mata dalan nebe maka iha no orientasaun hosi leten mai ami halo tuir. Profesores sira iha ne’e hamutuk nai’in 9, funsionariu Publiku nai’in 4, kontratadu nai’in 4 no voluntariu ema nai’in ida no alunus hamutuk ema 157 ( atus ida limanulu resin hitu ). Kona ba edukasaun nian iha ne’e la’o normal hanesan bain bain tuir padraun nebe maka iha”.
Jacinto mos hatutan liu dehan difikuldades nebe maka sira hasoru maka hanesan laiha perpustakaan no mos falta material didatikus balun.
“ Defikuldades iha escolar maka hanesan adaves falta material didatikus sira, laiha perpustakaan meja kadeira armari maka prejudika uituan mais hanesan kordenator escolar buka meius oinsa hodi bele kompleta. No kona ba be no saneamentu iha tinan hirak liu baa mi hasoru duni problema bo’ot tamba Governu mai dada duni be maibe la funsiona ho diak. No foin iha tinan 2019 ami ke’e rasik be posu monta sanyu maka agora be lao diak los, no escolar mos lutu haleu no laiha animal maka tama hodi estraga ka hafo’er. Comunidade sira mos la tama arbiru no sira tau matan be escolar ne’e no eletricidade mos diak iha escola”.
Hatan perguntas jornalista nian kona ba merenda escolar Diretor escolar ne’e dehan, La’o diak tuir padraun nebe maka iha ona.
“ Iha merenda escolar la’o diak la’o tuir kalendariu no padraun nebe maka iha tamba ami sempre hare no manten dia efetivu nebe maka fo mai ami atu nune’e bele kordena ho ema sira nebe maka te’in tenki tuir duni mata dalan nebe iha ona”.
Kordenator EBF Fatudere ne’e mos apela ba inan aman sira atu nafatin kontribui hodi ajuda oan sira atu bele kontinua estuda tamba iha escolar hanorin durante oras lima deit restu ne’e iha ianan aman sira nia responsabilidade. Jacinto mos apela ba estudantes sira atu aproveita tempu hodi estuda tamba future nasaun ne’e presija ema matenek hodi hatutan desenvolvementu, no sira maka sei hatutan.
Jornalista; Adriano A. Mesquita
Editor : Florindo de Jesus
