Federasaun Silat Timor Leste FESTIL sabadu loron 16 fulan Agosto semana liu ba hala’o kongresu hodi hili estrutura nivel Municipal nian. Prejidente Festil Nasional Hermenengildo Costodio da Costa hateten Kongresu ne’e halao ho nia objetivu 2 deit. Ida Atu lori ukun Festil nia mai iha nivel Municipal no rua, Atu promove juventude hotu nebe treinu iha organijasaun sira atu bele compete iha nivel Municipal, Nasional, Rejional no mundial.
“ Objetivu atu hari estrutura FESTIL iha Municipiu ne’e ruaa deit. Primeiru atu lori ukun Festil ne’e mai iha Municipio. Nebe asuntu ruma maka iha Municipio nian la presija hosi Nasional mai to’o iha ne’e, sira estrutura nivel municipio nian maka bele atende deit ona. Ami iha Nasional hein simu relatoriu deit. I sira nebe maka iha Municipio sira maka sai gestor ba prosesu tomak ba Organizasaun Arte Marsiais sira nebe estabelese iha ne’e. Iha Viqueque organizasaun Arte Marsiais lima maka registu iha Festil. Objetivu segundu maka atu promove juventude hotu hotu nebe maka treinadu iha kada organisasi atu bele compete iha nivel Municipal, Nasional, Rejional no Mundial. Iha fulan oin, setembro organijasaun nen nebe maka registu ona iha Festil sei iha kampionatu interna iha ida idak nia organijasaun rasik. Depois de Interna hotu tiha Festil sei hahu simu kampionatu Nasional. Sei hahu iha fulan Novembro. Tamba ne’e maka ami mai mendahului hodi estabelese tiha, atu nune’e iha fulan Novembru ita bot sira sei ba la reprejenta ona ida idak nia organijasaun, maibe sei reprejenta Municipio. I depois de fulan Novembro hotu tiha kontinuasaun atu ba Rezional no Internasional ne’e saida. Ita sei hakat ba Seagems iha Tailandia tinan oin. No ita fiar katak Organizasaun nen ne’e agora dadauk preparado”.
Prejidente FESTIL Hermenengildo mos akresenta tan katak Festil mos sei haruka representante hosi organijasaun sira nebe maka hamahon an iha Festil atu ba tuir treinamentu kona ba treinador ba wasit juri nian iha Indonesia.
“ iha fulan oin Festil mos sei delega 12 pesoas hosi rai bot ne’e no 4 pesoas hosi Raiwa Oekuse sei sai hanesan treinador ba wasit juri Internasional kelas III iha Indonesia Jakarta, I akordu hau asina tiha ona iha semana rua liu ba ho PERSILAT ( Persatuan Silat Antar Bangsa ). Katak iha fulan Setembro ita sei halo treinamentu ba wasit juri. Tuir los ne’e it aba iha Bruselas maibe hare ba kondisaun buat hotu no mos kestaun lingua maka ita deside ba iha Jakarta Indonesia, durante loron sanulu. Persilat maka garantia, toba han durante treinamentu sira maka resposabilija hotu. TL so prepara deit tiket aviaun nian no mos oang saku uituan. No hosi organijasaun nen nebe maka rejistu ona iha FESTIL ita sei haruka kandidatu hamutuk sanulu resin nen maka ba tuir treinamentu ne’e. No organijasaun nen ne’e sei delega ema nain nen no Festil rasik sei delega ema nain nen no Oekuse ema nain hat “.
Prezidente Federasaun Silat Timor Leste ( FESTIL ) Hermenengildo Custodio da Costa mos dehan FESTIL hetan orsamentu hosi governo ho montante US$ 169.000 ba tinan tolu. Nia mos sublinya katak tuir lei KRAM ne’e mosu tamba problema no KRAM atu regula deit prosesu tomak Arte Marsiais sira nian maibe FESTIL ne’e nai’in duni ba Arte Marsiais sira.
Entretantu Organijasaun arte marsiais sira nebe maka hamohon an iha Festil maka hanesan IKS Kera Sakti, PSHT, Perisae Diri, Seruling Dewata, Korka no Pajajaran hamutuk organijasaun nen.
Partisipa iha Kongresu ne’e reprejentantes sira hosi Organijasaun arte marsiais sira nebe existe iha Municipio Viqueque maka hanesan. PSHT. Kera Sakti, Korka, Perisae Diri, Pajajaran hamutuk ema nai’in 40, no sei hili ema nain sanulu resin nen maka sei tur iha estrutura Festil nivel Municipio tuir estatutu FESTIL nian artigu 9 pontu 3.
Hetan mos partisipasaun hosi Prejidente Sub KRAM Municipio Viqueque, Cosme Sarmento No Sekretario Munisipio Viqueque Teotonia da Silva Sarmento. No mos konvidadus sira seluk tan.
Jornalista; Adriano A. Mesquita
Editor : Florindo de Jesus
