Sabado loron 26 fulan Agosto 2023 ne’e Sekretario Estado Formasaun Profesional no Emprego ( SEFOPE ) Rogerio de Araujo Mendonḉa halo Vijita ofisial ida mai iha Municipio Viqueque hodi hare rasik kondisaun servisu Sefope nian. Sekretario Estado ne’e dehan, tuir lolos vijita refere hala’o iha loron servisu nian maibe tamba okupadu los ho servisu sira hanesan prepara Lei Organika no mos Orsamentu Retifikativu no tempu mos la’o dadaun ona entaun nia deside hala’o iha loron feriado tamba lakohi lakon tempu.
“ Ami nia vijita ida ne’e importante los tuir lolos ami hala’o vijita ne’e iha loron servisu maibe hare ba tempu nebe la’o bebeik badak sei iha loron ba loron sei prepara hela Lei Organik, Orsamentu Retifikativu buat sira ne’e entaun ami hanoin ida ne’e ami presija hakbesik an fali mai iha Municipiu hodi hare no identifika tamba agora ami estabelese ona Konselho Diretor Geral seminal, Konselho Diretor Nasional Municipiu mensal entaun nudar Sekretariu estadu tenki tun mai to’o iha Municipio hodi hare rasik ho matan, atu nune’e wainhira iha encontru ho Diretor sira hato’o karik sira nia preokupasaun entaun ita mos iha ona hanoin konaa ba preokupasaun sira ne’e. Tamba dala barak ita nia Diretor sira hato’o sira nia preokupasaun buat sira ne’e simu hela deit iha fatin maibe atu kontinua ne’e difisil tamba ita la mai direta hodi hare”.
Nune’e mos Sekretario Estadu ne’e hatutan dehan, tuir nia observasaun fatin servisu ba Sefope Municipio Viqueque la kondis tamba laiha edifisiu propriu hodi halo servisu ho diak. No Nia mos dehan vijita ne’e mos atu mai identifika ka hare fatin atu hari edifisiu SEFOPE iha Viqueque no sei tau orsamentu iha tinan 2024 mai.
“ Ohin hau to’o iha ne’e hau hare ambiente servisu, fatin servisu la kondis tamba fatin hotu hotu nebe ami tama sira iha ona edifisiu foun, entaun ami mos atu hare no identifika para ita tau iha planu orsamentu 2024 hodi hari edifisiu SEFOPE nian iha Viqueque atu nune’e funsionariu sira bele servisu ho diak. No ami mos mai hodi husu apoiu ba Administrasaun Municipiu atu bele fo netik rai ida nebe maka diak atu bele hari edifisiu ne’e”.
Entretantu Sekretario Estado Formasaun Profisional no Empregu Rogerio de Araujo Mendonḉa mos hatutan tan katak durante ne’e SEFOPE apoiu hela Sentru formasaun sira maibe SEFOPE rasik laiha edifisiu rasik. Tamba ne’e Governo ida ne’e iha nia Politika dehan atu habkbesik Desenvolvementu ba Povo ita tenki prepaa an. Nia mos afirma katak sei hari Edifisiu Sefope nian hamutuk kedas ho Sentru Formasaun atu nune’e bele fo formasaun ba joven sira kona ba lian Ingles, lian Korea no lian Japaun nian tamba Nasaun sira ne’e presija trabalhador barak hosi TL.
Iha fatin hanesan Diretor SEFOPE Municipio Viqueque Simoḗs da Silva hato’o defikuldades nebe durante ne’e sira hasoru maka laiha edifisiu rasik, transporte, ekipamentus eskritoriu hanesan komputador no funsionario limitado los. Simoḗs mos hato’o ba SEFOPE kona ba atendementu geral ba joven sira durante tinan 2022 to’o 2023 no mos grupu sira nebe maka hetan fundus hosi SEFOPE hodi loke actividade grupu nian.
“ Aproveita oportunidade ne’e ami hakarak informa ba ita bot katak ita nia atendementu geral ba joven sira maka, ba iha trimester primeiru ita atende joven sira hamutuk 473 trimentre segundu ita atende joven hamutuk 87 no tremetre terseiru atende ema hamutuk 80 no grupu sira nebe maka ita ajuda hamutuk grupu tolu no sira nia actividade maka hanesan karpintaria, hortikultura no suku ka alfaeate, no actividade sira ne’e la’o hela. Kona ba forsa trabalho maka hanesan ohin hau hato’o tiha on aba Sua Eselensia, ami iha funsionariu permanente ida, ajente Administrasaun ema nain hat no kazual ema nai’in rua. No dezafius nebe maka ami hasoru durante ne’e maka edifisiu, ami laiha edifisiu rasik, transporte ami laiha no parte seluk maka kona ba fasilidade komputador, ami laiha komputador no iha laptop ida maibe oras ne’e iha hela IT no hau konfirma sira dehan kompanya seidauk manan tender nebe seidauk hadia”
Entretanru iha vijita Sekretario Estado Formasaun Profosional no Empregu ne’e partisipa mos hosi Sekretario Municipio Viqueque Teotonio Sarmento da Silav no funsionario SEFOPE sira.
Jornalista; Adriano A. Mesquita
Editor; Florindo de Jesus
