Wednesday, April 17, 2024
spot_img
HomeFoto GaleriaNoticias RPV; FOKUPERS hala’o Seminariu loron ida hodi komemora loron Mundial foin...

Noticias RPV; FOKUPERS hala’o Seminariu loron ida hodi komemora loron Mundial foin sa’e nian.

Fokupers organija seminariu loron ida ho tema “ Hasa’e Foin Sa’e sira nia Abilidade hodi fo Kontribuisaun ba Mundu ida nebe Sustentavel no Amigavel” hodi komemora loron Mundial foin sa’e sira nian iha Municipio Viqueque sesta feira, 25-08-2023 ne’e no hola fatin iha salaun Administrasaun Municipio Viqueque Beloi. Directora Exekutiva Fokupers Maria de Fatima Pereira Guterres hateten selebrasaun ne’e tuir lolos hala’o iha loron 12 fulan Agosto liu ba maibe tamba kestaun balun maka foin hala’o ba loron ohin nian.

“  Maske ita hatene katak komemorasaun ida ne’e tuir lolos ita hala’o iha loron 12 de Agosto, ita selebra Mundialmente mas depois ho okaziaun no razaun seluk maka ita muda fali ba loron ohin, maibe laos tarde liu sei relevante hela tamba agora mos ita komemora hela loron bot sira hanesan loron FALENTIL nian iha 20 de Agosto no mos ita sei komemora mos loron importante ida hanesan 30 de Agosto ( Loron Konsulta Popular ) nian”.

Nune’e mos Diretora ne’e hatutan tan dehan, ho Tema nebe maka iha hanesan Hasa’e Foin Sa’e sira nia Abilidade hodi fo kontribuisaun ba Mundo ida nebe sustentavel no amigavel  no tema ne’e tema Internasional nian

“  Tema ida ne’e mos konvida ita hotu nebe iha ne’e, Agensia ida idak Organijasaun ida idak tantu Lokal Nasional mos Internasional no Instituisaun sira Estadu nian atu bele refleta klean liu tan atu oinsa ita bele kontribui hodi hadia foin sa’e sira nia situasaun atu bele hasa’e diak liu tan sira nia abilidade hodi kria paz no hakmatek iha Ita nia rain espesial iha Municipio Viqueque. Tamba dala barak ita hotu hatene katak joven sira dala barak sempre kria problema hodi baku malu iha fatin fatin, maibe ida ne’e laos joven sira nia sala deit maibe ita mos kontribui, tamba ita mak ladun fo atensaun ba sira liu liu iha familia nia laran tamba familia maka hanesan edukasaun primeiru nebe oan sira tenki hetan”.

Alende hirak ne’e nia mos sublinya katak, dala barak mos joven sira kaben sedu nune’e sempre hamosu violensia domestika signifika katak sira ladun prepara an ho diak.

“ Tuir dadus nebe maka FOKUPERS iha kuaje tinan ida foin sa’e sira maka barak liu sai vitima ba kaju Violensia Bazeia ba Jeneru, tantu kazu Violensia domestika, signifika katak sira la pronto atu hari uma kain maibe tamba asidente entaun sira hari tiha uma kain maibe mosu maka violensia. Kestaun sira seluk maka kaju Insestu, violensia sexual, No tuir dadus nebe iha kada tinan ami rejistu liu atus tolu ( + 300 ) kajus, ne’e 80% mai hosi foin sa’e sira. Tamba ne’e hau hanoin katak ohin ne’e tempu diak ida ba ita atu tau hamutuk hanoin hodi hare ba situasaun sira ne’e”.

Entretantu Diretora ne’e mos agradese ba Autoridade Municipio Viqueque tamba bele simu Fokupers hodi servisu hamutuk atu kombate ka ju sira nebe akontese liu liu kaju Violensia Bajei ba Jeneru nian no nia hein katak ba oin sei servisu diak liu tan.

Iha fatin hanesan Sekretario Municipio Viqueque Teotonio Sarmento da Silva nebe reprejenta Ad. Municipio Agradese ba Fokupres tamba bele servisu hamutuk ho Autoridade Municipal to’o iha Postos nos Sucos hodi bele paortisipa iha Seminario ne’e, no Sekretario Municipio ne’e hatutan tan katak sira sei pronto nafatin atu servisu hamutuk hodi fahe informasaun nebe diak atu bele eduka komunidade sira hodi moris ho hakmatek, dame no domin ba malu, liu liu ba joven sira.

“ Ita iha Viqueque sempre pronto atu simu Organijasaun saida deit maka mai iha ne’e, ita sempre loke ita nia liman tamba actividade sira hanesan ne’e sempre fo benifisiu ba ita hotu liu liu liga ho tema nebe maka iha sei fo imput ka masukan diak ba ita nia joven sira. No seminariu loron ohin nian ne’e karik sei ko’alia liu kona ba Violensia bajeia ba Jeneru. Tamba nene ita hotu nebe maka mai partisipa ne’e tenki tuir ho diak hodi rona no hatene, liu liu cefe Suco sira no joven sira. Tamba nai Sefe Suco sira tenki hatene atu nune’e karik mosu kazu hanesan Violensia Domestika iha ita bot sira nia Suco laran atu labele rejolve tuir deit kultura maibe tenki hato’o keixa ba Polisia. No mos alin no oan joven sira tenki rona didiak para tau iha pratika hodi labele kaben ka ita nian dehan hola feto ka mane sedu tamba impactu aban bainrua ladika wainhira emi seidauk prepraradu ka preprara an ho diak. Hau iha ne’e hodi administrador Municipio nia naran hamutuk ho autoridade sira Posto no Suco nian hakarak hato’o ami nia agradese ba FOKUPERS tamba ho esforsu tomak hodi buka osan no mai hala’o seminariu ne’e iha ami nia Municipio hodi fahe informasaun gratuita mai ami”.

Sekretario Municipio Teotonio Sarmento da Silva mos hodi Administrador Municipio nia naran loke ofosialmentu seminariu refere.

Entretantu partisipa iha seminariu ne’e Sekretariu Municipio, Directores linhas Ministeriais sira, Administradores Postos lima, Cefe Sucos 38 Organijasaun Sociadade Civil, Emprejarius, no mos reprejentantes estudantes escolar Ensino Sekundariu sira nebe iha Viqueque ema liu atus ida. No seminariu ne’e rasik hahu iha tuku sia ( 9 ) dader no termina iha loraik oras tuka hat ( 4 ).

 

Jornalista; Adriano A. Mesquita.

Editor :  Florindo de Jesus

 

 

 

RELATED ARTICLES
Continue to the category
0 0 votes
Article Rating
Subscribe
Notify of
guest
0 Comments
Inline Feedbacks
View all comments
Fans na'in: mak rona hela.
Loading ...

Trending Semanal.

0
Would love your thoughts, please comment.x
()
x