Governu Konstitusional dasia iha ona planu atu halao pagamentu ba Idozus sira iha fulan Agosto tinan 2023 ne’e. Lia ne’e hato’o hosi Ministra Solidaridade Sosial no Inkluzaun Veronica das Dores iha Sentru Solidaridade Sosial no Inkluzaun Municipiu Viqueque foin lalis ne’e wainhira halo vijita kortejia ida. Ministra deklara ba jornalista sira dehan planu atu halao pagamentu ne’e iha duni fulan Agostu ne’e nia laran maibe sei tuir nia prosesu. Tamba ne’e Ministra Veronica das Dores husu ba media sira atu fo sai informasaun tenki esplika ho los atu nune’e ita nia inan aman sira rona karik mos bele kompriende.
“ Ah planu atu halo pagamentu ba idozus sira iha duni fulan Agostu ne’e nia laran maibe pagamentu ne’e nia lalaok atu media sira fosai para ita nia komunidade sira kuandu rona sira bele kompriende maka nia lalaok ne’e hanesan ne’e, primeiru INSS rasik sei halo karta depois ita sei haruka ba Ministeriu Finansas no Ministeriu Finansas sei haruka ba Banku no Banku maka sei termina data ba pagamentu nian, nia lalaok ne’e hanesan ne”.
Entretantu hatan ba pergunta jornalista nian kona ba iha ka lae mudansa no kada benefisiariu sei hetan osan hira kada fulan, Ministra dehan kada ema ida sei hetan osan ho montante dolar lima nulu resin hitu ( $ 57,00 ) tuir Lei nebe maka hetan aprovasaun iha loron 22 fulan Junhu 2022.
“ Diak grasas a deus ita bot nia pergunta kapas no pertenente tebes, ita nia pagamentu ba tinan ida ne’e iha mudansa, DG ami foin lalais ne’e ba koop iha Ministeriu Finansas no ita nia Primeiru Ministru konkorda ka aseita no pagamentu agora sinquenta e sete dolars ( $ 57,00 ) kada pesoa bazeia ba lei nebe maka aprova iha 22 de Junho 2022”.
Atu fo hanoin fali katak lei refere estabelese hosi Governu Konstitusional da ualu iha tinan kotuk no hetan promulgasaun hosi Prezidente da Republika.
Jornalista, Adriano A. Mesquita
