Edifisiu Sentru Solidaridade Sosial no Inkluzaun ( SSSI ) municipiu Viqueque nebe konstroi hosi Kompanya LM Kaikasa Metin Up,lda hahu hosi tinan 2022 liuba atinji ona porsentu hitu nulu (70%0). Lia ne’e hato’o hosi Dir. Kompanya Paulo Gomes iha fatin konstrusaun Raitahu Segunda feira semana ne’e wainhira hetan vijita hosi Ministra Solidaridade Sosial no Inkluzaun.
“ Kontratu ne’e hahu tinan 2022 iha fulan Janeiru nia laran maka hau asina kontratu ne’e, se lolos ne’e projetu ne’e atu hotu ona iha tinan ne’e nia laran maibe tamba klima nebe maka la fo fatin no udan ne’e mai hela deit, ita hare rasik ho matan ate agora fulan Agostu tiha ona mos udan hela deit. Tan ne’e maka difikuta servisu ami nian, atu loro karik projetu ne’e hotu tiha ona, no to’o agora projetu ne’e atinji ona porsentu hitu nulu ( 70% )”.
Entretantu Paulo Gomes mos informa katak orsamentu ba Kontrusaun edifisiu refere ho total US$ 805.366,40 ( rihun atus ualu lima, atus tolu nennulu resin nen, sentavus hatnulu ) no Governu halo ona transferensia dala rua ba iha konta kompanya nian.
“ Orsamentu foin maka mai dala rua atu ba dala tolu nian maka tamba Governu troka foun ona be ami hare to’ok ida ne’e no ami husu ba Sosial para atu aselera orsamentu ne’e para ami hodi halo servisu ne’e to’o hotu, no ami la hare atu manan ka la manan mais baa mi importante maka projetu tenki hotu no iha kualidade tuir dezenhu ka BOQ”.
Iha fatin hanesan Ministra Solidaridade Sosial no Inkluzaun Veronica das Dores hateten projetu ne’e sei iha konstrusaun nia laran maibe iha buat balun maka presija hadia ka aumenta liu liu kona ba asesivel ba ema ho difisiensia sira.
“ Hau nia hare komu hau laos ema tekniku maibe tuir hau nia pontu de vista em geral konstrusaun la’o hela iha parte balun tenki hadia, liu liu iha casa de banho ka haris fatin nian ita bain bain bolu dehan sintina ba ema ho difisiensia tamba sira balun tama ho kadeira roda, ida ne’e maka presija hadia. Buat hotu la’o diak, maibe ida ohin hau temin ne’e presija hadia. Ita hare mos ba parte armajenamentu ka armajen, mais agora dadauk ita uja provijoriu lai ida nebe maka iha ona mais ita tenki hadia. Hadia hadia para hadia diak liu tan”.
Ministra Solidaridade Sosial no Inkluzaun, Veronica das Dores hato’o lia ne’e wainhira halo vizita kortezia mai iha Sentru Solidaridade Sosial no Inkluzaun Viqueque no liu mos ba hare diretamentu konstrusaun ba edifisiu foun MSSI Viqueque nia iha Raitahu Suco Bahalara Uai’in Segunda feira loron 1 fulan Agostu tinan 2023 ne’e.
Hatan ba preokupasaun Ministra nian ne’e, Director Kompanya LM Kaikasa Metin UP.LDA Paulo Gomes hateten teknik sira sei hare kona ba ida ne’e no hare mos ho BOQ maibe em prinsipiu sira pronto atu hadia tuir pedidu Ministra nian. Maibe Paulo Gomes husu ba Governu ( MSSI ) atu aselera transferensia orsamentu faze datolu nian atu nune’e sira bele hadia hodi konklui konstrusaun ne’e iha fulan tolu ikus ne’e. Paulo Gomes mos informa katak sira servisu la hare ba atu manan ka lakon maibe importante maka garante nia kualidade no projetu tenki hotu.
Jornalista, Adriano A. Mesquita.
