Kuarta feira loron 14 fulan Junho 2023 ne’e Sua Eminensia Dom Virgilio Cardeal do Carmo da Silva SDB hanesan mos Bispo Arque Diosese de Dili to’o iha Parokia Santo Antonio Lacluta Posto Lacluta municipio de Viqueque hodi selebra Misa de Rekonsiliasaun de fraternidade Humana entre Lacluta oan sira nebe hela iha Rai seluk hanesan Nasaun Indonesia no Lacluta oan sira nebe hela iha TL. Prezensa Cardial nian simu ho cultura Lacluta nian hanesan Hola lia ka hato’o benvindu hosi katuas Lia Nai’in no tara Tais hafoin akompanya hosi moradores, no dahur nai’in hamutuk ho sarani no autoridade Local sira hodi ba hatur iha rezidensia Parku Sto. Antonio Lacluta nian. Hafoin deskansa tiha hodi hola tiha buat ruma nebe maka prepara hosi sarani Lacluta sira Sua Emenensia Cardial kontinua kedas ba asiste Seremonia Cultural ba Rekonsiliasaun de Fraternidade Humana nebe halao entre Lacluta oan sira nebe maka iha rai seluk hanesan Indonesia no Lacluta oan sira nebe hela iha Lacluta no mos fatin seluk iha TL nia laran. Hafoin hala’o tiha seremonia Kultura nian Partisipantes ka sarani sira hotu hosi Indonesia nian no sarani sira iha Parokia Santo Antonio nia laran hakneak hodi monu ain ba Sua Emenensia Kardeal molok atu tama ba Igreja laran hodi kontinua ho Missa de Rekonsiliasaun no Fraternidade Humana. Entretantu Prosesu monu ain ne’e hahu uluk hosi Padre Parku Sto. Antonio Lacluta hafoin tuir kedas ho sarani sira nebe tama kada Suco, hanesan Suco Uma-Tolu, Laline, Ahic no Suco Dilor.
Iha selebrasaun Missa ba Rekonsiliasaun ne’e Dom Virgilio Cardeal do Carmo da Silva SDB husu ba Sarani Lacluta oan tomak atu hadomi malu maske balun sei iha Indonesia no balun iha Timor maibe tenki nafatin hanoin katak ita mesak maun ho alin deit. Kardeal mos hakle’an liu dehan emi hili ona Sto. Antonio ba emi nia Mahein tan ne’e emi tenki banati tuir Nia lala’ok hodi hateke ba Cruz. Tamba wainhira ema ida oho ka hakanek ema ida ne’e hanesan mos nia oho ka hakanek Maromak. Ne’e duni ita nudar ema sarani tenki hate perdua malu no hatene rekonyese ita nia sala atu nune’e maromak mos sei perdua ita tamba NIA hadomi ita.
Entretantu partisipa iha Missa Rekonsiliasaun ne’e Sarani sira iha Posto Lacluta, Lacluta oan sira nebe oras ne’e sei hela iha Indonesia no mos konvidadus sira seluk tan, no Missa ne’e rasik hahu iha tuku 7 liu minute 30 kalan no preside hosi Cardeal rasik hamutuk ho Padre Parku Lacluta Pe. Abel Soares Alves no remata iha Oras tuku 10 kalan.
