Kuarta feira loron 14-06-2023 ne’e Povo no sarani Lacluta halaό seremoni Rekonsiliasaun de Fraternidade Humana entre Lacluta Oan sira nebe hela iha Rai Liur hanesan Indonesia no Lacluta oan sira nebe maka hela iha Timor no hola fatin iha resintu Igreija Parokia Sto. Antonio Lacluta. Padre Paoku Lacluta Pe. Abel Soares Alves iha Intrevista hateten, Actividade ne’e halo hahu kedas iha tinan kotuk no laό to’o agora hanesan faze final ka ikus nian ho nia objetivu maka atu hamutuk fali ema Lacluta nian sira nebe maka fahe malu tamba Funu, Hanoin la hanesan no buat seluk tan nebe sira Identifika komesa kedas iha tinan 2014 liu ba.
“ Rekonsiliasaun ne’e halaό hahu kedas iha tinan kotuk ( 2022 ) tamba durante ne’e funu lubuk ida tutuir malu hahu kedas hosi funu Japones mai to’o agora, no buat hirak ne’e sobu buat hotu hotu, sobu ita nia lisan sobu ita nia fiar no harahun ita nia moris, no halo ema hotu fahe malu inklui mos familia uma laran ida. Ho buat sira ne’e halo familia sira la hamrik malu hodi fahe tiha malu, balun ba hela iha fatin seluk tiha, Depois kai’it tan ho politika nia maka halo sira balun ba hele tiha iha Nasaun seluk hanesan Indonesia. Entaun ho buat sira ne’e hotu maka iha tinan 2014 liu ba ami koko buka malu tur hamutuk hodi buka hatene fukun saida maka halo ita hodi la hamutuk. E los duni sira konsege deskobre duni sira deskobre problema lubuk ida nebe mai kedas hosi bei ala sira hanesan problema familia nian depois kaet tan fali ho politika nian e tama tan ba sociadade entau sira deskobre ida ne’e no balun sira ida idak buka resolve tiha ona iha tinan rua ka tolu liu ba. No mai to;o tinan ida ne’e ami hakark finalize problema hirak ne’e. Finaliza ho prinsipiu ida katak familia ida ida buka resolve sira nia problema rasik tamba sira maka hatene sira nia problema rasik. Enkuantu problema nebe geral ita buka resolve geral hanesan agora dadauk ne’e. Iha tinan kotuk ami mesak deit maka la’o iha ne’e no tinan ida ne’e ami koko hasoru malu ho Lacluta oan sira nebe hela iha Indonesia no sira mos aceita tamba tuir sira katak durante tinan ruanulu resin ona sira hela iha neba ( Indonesia ) mos senti duni katak sira hasoru defikuldade iha moris lor loron nian no sira aseita maka ohin ita mai hamutuk iha fatin ne’e, maibe buat importante ida hau atu dehan maka buat nebe funu niain ita rekonsilia tuir nia dalan no buat nebe familia nian ita rekonsilia tuir familia nian”.
Entretanto Padre Abel mos sublinya tan dehan, Rekonsiliasaun nebe maka halaό ne’e la signifika katak atu lori fila fali Lacluta oan sira nebe maka oras ne’e sei hela iha Indonesia mai Timor ( Lacluta ) lae, maibe atu koalia kona ba oinsa atu hamutuk fali hodi halakon tiha fukun sira nebe maka oras ne’e ema Lacluta oan sira enfrenta ka hasoru hela.
“ Laos atu bolu sira mai fali la’e maibe bolu sira atu kontribui ba hamenus problema sira nebe ita hasoru, ida idak hela nafatin iha nia fatin maibe se sira hakarak atu mai bele mai tamba ne’e ema ida idak nia direitu, se nia sente katak sira hela iha neba diak ona, moris diak ona, laiha buat ida maibe se sira hakarak atu fila ita simu sira. Importante maka atu kontribui ba malu hodi solusiona tiha problema sira nebe akontese durante tempu naruk nia laran atu nune’e Lacluta oan sira atu hela iha nebe deit senti hakmatek no fuan la taridu hodi hanoin hela todan sira pasadu nian, Tamba Lacluta ne’e hahu hari no desenvolve durante tempu naruk nia laran ho mos sira nia kontribuisaun. Atu dehan katak Lacluta ne’e ba Lacluta oan tomak maske nia iha nebe deit”.
Entretantu seremonia Rekonsiliasaun ne’e hahu hala’o ho cultura Lacluta nian hanesan nahe biti makerek lok bua no malus no hola lia ( hamulak no tota ) hosi kbahen lia nai’in sira hosi Suco hat nebe iha Posto Lacluta nian no simu hikas fali malu lui hosi hakuak malu sinal simu malu hikas ona.
Iha actividade Cultural ba Rekonsiliasaun ne’e partisipa ka asiste direta hosi Sua Eminensia Dom Virgilio Cardeal do Carmo da Silva SDB, Padre Parku Lacluta Pe. Abel Soares Alves, Komandante PNTL Municipio de Viqueque, SEbastiaồ Quintaồ, Reprezentate hosi Gabinete Presidensia da Republika, Administrador Posto Lacluta Jose Andrade dos Santos, Kom. PNTL Eskuadra Lacluta, Cefe do Suco Ahic, Dilor Laline no Uma Tolu inklui sarani Lacluta nian sira no mos reprezentante Lacluta oan sira nebe maka mai hosi Nasaun Indonesia nian no mos konvidadus sira seluk.
Hafoin de halaό tiha seremonia Kultural nia kontinua kedas ho Monu Ain hodi husu deskulpa ba Koronel Sto. Antonio nebe hanesan Padrueira ba sarani Parokia Lacluta nian hosi sarani Lacluta oan tomak no taka ho Missa ba Rekonsiliasaun de Fraternidade Humana nebe preside hosi Bispu Arque Diosese de Dili Dom Virgilio Cardeal do Carmo da Silva SDB.
Remata.
