Estudantes hamutuk nai’in 25 hosi escola Teknik Vokasional ( ESTV ) Kalo Heda Watulari remata ona sira nia estagio durante fulan tolu ( 3 ) iha Arava Internasional Center for Agriculture Trening ( AICAT ) iha area Raitahu Suco Umawain Kraik Posto Administrativo Viqueque Vila Municipio Viqueque foin lalais ne’e. Director ESTV Calo Heda Samuel da Costa hateten objetivu hosi Estagio durante fulan tulu ne’e maka, atu enkoraja estudantes sira atu sai estudante nebe partisipativono active iha sira nia familia no sociadade.
“ Durante emi halao estagio iha fatin ida ne’e ( Raitahu ) ne’e sai hanesan bukae ida ba emi nia future atu nune’e emi bele sai ema nebe maka partisipativo no active iha emi nia familia no sociadade nia laran. Tamba buat nebe emi aprende durante fulan tolu nia laran ne’e kleur duni no emi mos aprende buat barak liu liu iha area Agricultura nian oinsa atu rai fini nebe diak, no atu kuda oinsa atu bali no oinsa atu halo koilyeta. Buat sira ne’e hotu emi fila fali ba emi nia fatin tenki hatudu iha pratika. Tamba ho aprende deit ka teoria la to’o, tenki hatudu liu hosi pratika. Emi nain hira nebe mai aprende ona iha ne’e labele para deit iha ne’e no fila ba tenki fahe mos ba emi nia maluk sira no komunidade sira nebe presija emi nia ajuda”.
Entretantu Director Escola ne’e mos agradese no husu deskulpa ba Asosiasaun Alumni AICAT tamba bele simu ona nia estudante sira hodi halao sira nia estagiu durante fulan tolu nia laran no karik durante sira nia estagiu iha fatin ne’e sira halo buat ruma nebe la tuir AICAT nia hakarak.
Nune’e mos reprejentante estagiadu Juvaldo Gaspar Guterres hato’o agradesementu no obrigado wai’in ba Asosiasaun Alumni AICAT tamba bele simu ona sira hodi halo sira nia estagio durante fulan tolu (3 ) iha fatin formasaun Raitahu. Estudante ne’e mos hatutan dehan durante iha fatin estagiu ne’e karik buat ruma nebe ami halo la tuir AICAT nia hakarak hodi kolegas hotu nia naran hato’o deskulpa tamba ami mai iha ne’e atu aprende, no ami mos hato’o obrigado wai’in ba ita bo’ot sira nia suporta no ajuda durante ne’e. Ami labele selu ita bo’ot sira nia kolen maibe loron ida Maromak mak sei bele selu. No estagiadus sira mos hato’o agradesementu ba parte tomak nebe apoiu ona sira durante estagiu, liu liu Cefe Suco Uma Uain Karaik ho nia komunidade sira tomak.
Entretantu Reprejentante AICAT Alezo Guterres mos hato’o nia apresiasaun no agradese ba ESTV Kalo Heda tamba bele fo fiar ba sira hodi haruka ona estudantes finalistas sira hamutuk ema nai’in 25 hodi mai halo estagio iha sira nia fatin, no nia mos konsidera katak fatin Raitahu ne’e sai mos hanesan Centru ba formasaun iha area Agricultura nian. Nia mos rekomenda ba estagiadus sira atu fila ba tenki implementa buat nebe sira aprende.
“ Sasan nebe maka emi hetan ona hosi fatin ida e’e laos hotu ona iha ne’e deit, maibe fila ba iha emi nia fatin tenki implementa hodi hatudu ba sosiadade katak emi iha dunia matenek, no matenek laos iha teoria deit maibe matenek mos iha pratika. Tamba buat nebe emi aprende iha ne’e maka sei determina emi nia future. Tamba Nasaun ne’e liu liu Municipio Viqueque nia future iha ita joven sira nia liman.Ttamba ita nia aman inan sira fakar ona ran hodi liberta Patria no ita nudar joven nia dever maka liberta povo liu hosi atetude no matenek nebe ita iha hodi desenvolve ita nia rain”.
Nune’e mos reprejentante ICAT ne’e esplika mos kona ba estabelesementu AICAT iha fatin refere ( Rai Tahu ) sai mos hanesan Centru formasaun no peskija iha area agricultura nian ba joven sira nebe maka hakarak atu aprende no halo peskiza ruma.
Tuir observasaun hosi jornalista RPV nian iha tereno nota katak partisipa ba iha seremonia Enseramentu estagiadus sira maka; Administrador Posto Administrativo Viqueque Vila, Reprejentante Servisu Edukasaun Municipio Viqueque, Komandante PNTL Eskuadra Viqueque Vila, Cefe do Suco Uama Uain Kraik, Director ESTV Kalo Heda, Membrus Alumni AICAT estudantes estagiadus sira no mos komunidade sira nebe maka hela besik iha fatin refere. No estudanetes Estagiados sira hamutuk ruanulu resin lima ( 25 ) mos hetan Sertifikado hosi Asosiasaun Alumni AICAT ( Arava Internasional Center for Traning ) iha fatin Centro Formasaun no Peskija Agricula Raitahu.
Remata.
