Kazu ema tuda militante Partido CNRT iha Ossu no Watulari no mos konfrontu nebe mosu durante mini kampanya Partido Fretelin nian iha Suco Wesoru Posto Administrativo Watulari identifika hotu ona no registu ona ba iha Ministerio.
“ Atu informa deit ba Lideransa Partidos Politikus sira hotu katak, kazu nebe akontese durante kampanya ba Eleisaun Parlamentar iha Municipio Viqueque hanesan iha Ossu tantu iha Watulari ami identifika hotu ona, mais ami respeita tebes ba KRDTL artigu 34 dehan katak Labele hatudu liman ba kualker ema ida dehan nia mak sala no ida neba mak los. Tamba ne’e maka atu informa deit ba ita bo’ot sira dala ida tan katak akontesementu ka kazu hirak ne’e ami identifika hotu ona no haruka ona ba iha Ministeriu Publiku hodi hein fali notifikasaun hosi neba”.
Lia ne’e hato’o hosi Komandante PNTL Municipio Viqueque Superintendente Cefe Sebastiᾶo Alves Quintᾶo iha encontru Evaluasan Kampanya Eleitoral husu supervizaun CNE nian, nebe halao iha salaun CNE Municipio Viqueque Sabado loron 29 -04 – 2023 liu ba.
Atu fo hanoin fali katak akontesementu ema deskonyesido tuda militante CNR iha Posto Ossu iha loron 21 fulan Abril liu ba hafoin fila hosi Kampanya nebe hala’o iha Municipio Viqueque ne’e ema ida hetan kanek todan iha ulun no iha Watulari ema nai’in hat hetan kanek Kaman. No akontesementu asalta malu iha Suco Afaloikai Posto Watulari iha loron 26 -04-2023 hafoin de halao tiha Mini kampanya hosi Partido Fretelin iha Soco Wesoru resulta uma hitu hetan estragus no ema ida kanek todan.
