Domingu Ramos hanesan semana ikus tempu Kuaresma nian no ita hahu tama ona ba semana Santa. Loron 24 fulan Marsu 2024 iha Parokia Imakulada Conceicao Viqueque selebra Misa Domingu Ramus nebe prejide hosi Padre Parku Tomas de Aquino Guterres ( TOTO ) hahu ho bensaun Ramus nebe lori hosi sarani sirano forma tuir Estrada komesa hosi monument Dom Zeremias nian mai to’o iha Igreja nia oin. Hafoin kontinua ho Prosisaun hosi Rotunda Dom Zeremias mai to’o igreja no kontinua ho Misa. Iha homilia Amu TOTO dehan, perdua ita nia inimigu sira, perdua ema nebe halo at ba ita.
“ Maluk doben sira, ho festa Domingu ramus nian ita tama on aba semana Santa, semana ida nebe ita ida idak nudar sarani hanesan ema Katoliku atu refleta fila fali ita nia buat nebe haktuir Cristu nia terus. Se ita hakarak tuir nafatin Na’I Maromak, se ita hakarak moris hanesan Maromak nia oan ita ida idak buka haka’as an atu banati Jesus nia ain fatin Jesus nia hanorin no nia lia fuan sira. Perdua ita nia inimigu sira, perdua ema nebe halo at ba ita. Se ita halo ida ne’e iha ita nia moris, ita la dok hosi Na’I Maromak nia reinu, tamba tuir Jesus Cristu la’os buat fasil ida, presija ita nia sakrefisiu, presija ita nia saran an, hodi fo ita an tomak hodi moris tuir Nia. Tamba ne’e husu ba ema hotu nebe fiar iha Cristu buka atu halo tuir ida ne’e”.
Nune’e mos Padre Parku Tomas de Aquino Guterres ( Amu TOTO ) kontinua haktuir kadehan, ho misa Domingu Ramos nian ita tama on aba iha momentu ida nebe importante tebes,
“ Maun alin inan doben sira, ho festa ida ne’e nian ita tama ona ba momentu ida nebe importante tebes, iha ita nia fiar hanesan Sarani, ita la’os manifesta deit, ita nia fiar iha aktu actividade relijioza iha semana ida ne’e nia laran, maibe ita buka mos atu tama kle’an liu ba ita ida idak nia fuan no laran buka atu sai sarani diak ida, buka atu sai ema fiar na’in diak ida, atu hatene hadomi, hatene lori kruz no paz ba ema hotu. Se ita halo ida ne’e iha ita nia moris, ita sai ona Jesus Cristu Nia eskolante sira ba ohin loron nian, Lori domin no karan Maromak nian ba ema hotu hotu”.
Entretantu Misa ba Domingu Ramus nian iha Parokia Imaculada Conceicao Viqueque hahu iha dader tuku hitu liu minute tolunulu ( 07.30 otl ) no partisipa hosi sarani sira iha cidade Viqueque nia laran no hetan seguransa hosi PNTL, Eskuteirus sira no hetan mos protesaun hosi parte ambulancia nian.
Ekipa kobertura RPV
