Vice Ministru Administrasaun Estatal ( MAE ) Jacinto de Deus Rigoberto fo pose ba Prezidente Autoridade Municipal ( PAM ) de Viqueque Francisco da Cruz Simoẽs Gonzaga Soares ho nia estruktura tomak Tersa feira loron 26 fulan Marsu 2024 ne’e no hola fatin iha Salaun Administrasaun Municipal de Viqueque. Iha deskursu Vice MAE Jacinto Rigoberto dehan, Nia fo pose ne’e tamba kumpri orden hosi Ministru Administrasaun Estatal ( MAE ) nian
“ Kumpri orden tuir despacho No. 9/29 /MAE/Marsu 2024 hosi Ministru Administrasaun Estatal para Vice Ministru ofisialmente atu fo Pose ba mai fo pose ba Sr. Francisco Cruz Simoẽs Gonzaga Soares nuda PAM Viqueque foun hodi troka Sr. Januario Soares bazei ba despachu Sua Exelensia Primeiru Ministu nian”.
Vice MAE ne’e mos hatutan dehan, Autoridade Municipal de Viqueque nudar pesoal kolectiva tuir direitu publiku hetan atutonomia Administrasaun no Finanseira. Tamba ne’e maka fo mos pose ba Estruktura sira.
“ Autoridade Municipal de Viqueque nudar pesoal kolectiva tuir direitu Publiku hetan autonomia Administativa, autonomia Finanseira alargada no patrimoniu rasik, no tutela hosi MAE, tamba ne’e maka hala’o mos pose ba Sekretariu Municipal nai’in tolu no Directores Servisu Municipais nai’in sanulu resin walu (18), noa Administradores Postos sira. Srevisu Autoridade nia hirakia maka lidera hosi PAM ho nia estruktura sira atu hodi fo asistensia ba povu sira tomak iha Municipiu Viqueque nia laran, ne’e maka hanesan aparellu administrative nudar makina servisu ba poder local Municipiu Viqueque”.
Entretantu Vice MAE Jacinto Rigoberto mos husu ba PAM empozadu ho nia Estruktura tomak atu servisu ho responsabilidade hodi hakbesik liu tan ba Povu hodi involve sira atu tama iha prosesu desenvolvementu estadu nian no loke poportunidade ba sidadaun sira hotu hodi estabelese prestasaun de servisu ka atendementu publiku hodi garante katak sidadaun hotu hotu hetan atendementu nebe hanesan. Nune’e mos Jacinto Rigoberto hodi IX Governu Konstitusiona nia naran no nia an rasik hato’o agradesementu no obrigado wai’in ba PAM sesante, Januario Soares –Boli ho nia Estruktura tomak durante sira nia mandate hodi hala’o ona servisu ho diak no responsabilidade to’o remata hodi entrega ho diak ba PAM foun, no Nia mos husu ba Administrador Municipiu Sesante atu kopera nafatin ho PAM foun hodi lorin Viqueque ba diak liu tan iha future.
Nia kontinua dehan ho tomada de pose ba Autoridade Municipal ho nia estruktura tomak ne’e kompleta ona estatutu hanesan Municipiu nian, tamba ne’e Jacinto Rigobertu bolu atensaun ba PAM ho nia estruktura tomak atu kompleta lalais ona Cefe Departementu sira atu nune’e bele exekuta diak liu tan planu asaun annual tinan 2024 nian.
Partisipa iha Seremonis Tomada de Pose ba PAM Viqueque ho nia estruktura ne’e maka Vise MAE ho nia komitiva, Vise Ministru Konsellu Ministrus no Asuntu Parlamentar ho nia ekipa, Sekretariu Estadu Habitasaun Rural ho nia ekipa, Tetente Jeneral Falur Rate Laek ho nia komitiva, PAM sesante ho nia esposa, PAM foun ho nia esposa no familia sira, Padre Parku Viqueque, Directores Servisu sira hotu, APA lima (5), Cefe Sucos sira no famila hosi empozadas sira nebe hetan pose no konvidadus sira seluk tan.
Hafoin remata tiha tomada de Pose kontinua ho hasai foto hamutuk, ko’a Kek no loke sampanya no taka ho almosu de konfraternizasaun nebe prepara hosi Komisaun Organizadora ( KO ).
Ekipa kobertura RPV
