Kandidatus ema nai’in hat (4 ) maka sei konkore ba Eleisaun Sucu iha Suco Builo. Lia ne’e hato’o hosi Director Sekretariadu Teknika Administrasaun Eleitoral (STAE) Municipiu Viqueque Humberto Fernandes Kinta feira loron 26 fulan Abril 2024 ne’e iha nia servisu fatin Viqueque. Humberto Fernandes deklara liu tan dehan hosi kandidatus nai’in hat (4) ne’e mesak mane hotu deit, no Feto sira seidauk iha.
“ Builo aprezentasaun kandidatura ema nai’in hat (4 ) nebe ita produz ona bulletin no bulletin sira ne’e ita simu ona hosi STAE Nasional, iha dia 22 semana kotuk no lori ona mai to’o iha ne’e no ita finalize ona pakotementu no iha aban dia 26 ita halo distribuisaun hosi STAE Municipiu Viqueque hodi desloka ba iha Builo no dia 27 sei hahu ho eleisaun. No iha Suco Builo aprezentasaun ba kandidatura mesak mane hotu deit no feto laiha. Iha momentu neba iha feto maluk sira mos ba presta sira nia deklarasun tuir Lei hateten, no iha feto maluk balun ba aprezenta sira nia razaun katak seidauk pronto no sira sei kandidata an iha tinan hitu mai”.
Hatan kona ba jornalista nian relasiona ho preparasaun STAE nian ba Eleisaun Suco Builo ne’e rasik Director STAE ne’e konfirma katak preparasaun hahu kedas iha semana hirak liu ba kotuk wainhira Konselho Munistrus aprova ona kalendariu ba Eleisaun Suco nian.
“ Preparativus sira nebe maka ita halo ona hafoin Konselho Ministrus aprova data ba Eleisaun maka hanesan iha semana rua ba kotuk ita halo sosializasaun kona ba Lei Nomeru 9/2016 Lei Eleisaun Suco nian no preparasaun seluk maka ita halo mos formasaun ba pesoaol ESTAE apoiu Suco no Aldeia no ita fahe mos kalendariu ba Eleisaun nian. No Comisaun Nasional das Eleisoẽs ( CNE ) mos ba halo ona sosializasaun iha Suco Builo no halo mos lansamentu ba Eleisaun Suco sanulu iha Timor ne’e hala’o iha Builo. Ne’e onra bot id aba Suco Builo tamba maske iha area izoladu maibe bele hili hodi halo lansamentu hosi CNE”.
Humberto Fernandes mos apela ba komunidade Suco Builo nebe naran rejistu ona iha baze de dadus ESTAE nian atu iha loron 27 fulan Abril ne’e ba partisipa hodi hili sira nia lideransa Suco no Aldeia.
“ Liu hosi Radio Povo Viqueque ( RPV ) hodi STAE nia naran ETAE hanesan orgaun Teknika, STAE mai fasilita lojistikamente material hodi fo apoiu tamba ne’e husu hela ba inan aman sira, komunidade Suco Builo atu iha loron 27 fulan ne’e mai ba iha meja asemblei hodi aprezenta ita bot sira nia kandidatura ba sira nebe hakarak kandidata an ba Cefe Aldeia no komunidade sira nebe atu vota ba hodi hili emi nia lideransa Suco no Aldeia, laiha ema ruma obriga tamba ne’e hanesan festa familia”.
Entretantu Suco Builo iha Aldeias hamutuk hat ( 4 ) maka hanesan Aldeia Buareka, Builo, Keurudu no Betu kia ho nia eleitores nebe registu ona iha baze de dadus STAE hamutuk atus walu lima ( 805 ) no hola parte ba iha Posto Administrativo Ossu Municipiu de Viqueque. Relembra fali katak Sucos nebe maka sei partisipa iha Eleisaun Suco ba tinan ida ne’e iha Timor Leste tomak hamutuk Suco sanulu ( 10 ) inklui Suco Builo, no Eleisaun sei hala’o iha loron Sabadu, 27-04-2024 ne’e. Entretantu iha Municipiu Viqueque rasik Suco ida deit maka Suco Builo. No Municipiu Viqueque iha Postos Administrativo lima ( 5 ) no Sucos tolu nulu resin nen ( 36 ) ho nia populasaun hamutuk rihun walu nulu ( 80.000 tuir dadus Estatistika tinan 2019 nian )
Jornalista ; Adriano A. Mesquita
Editor ; Florindo de Jesus
