Programa maun de obra ( PMOPA ) iha Posto Administrativo Lacluta ba primeira faje nian atinji ona 100%. Lia ne’e hato’o hosi Administrador Posto Lacluta Jose Andrade dos Santos ba jornalista RPV tersa feira ne’e wainhira partisipa iha Reuniaun KKM iha salaun encontro Municipio Viqueque, Jose Andrade dos Santos hatutan dehan orsamentu ba Programa Pmopa nebe aloka hosi Ministerio Estatal ba kada Posto administrative ho montante US$ 100.000 ( rihun atus ida ), no faha ba faze rua. Faze primeiru ka porsentu lima nulu uluk ho montante osan rihun limanulu ( $ 50.000 ,00 ) no sira exekuta hotu ona no relatoriu mos submete tiha ona ba Municipio hodi hein faze segundu nian.
“ Programa Maun de Obra ka PMOPA ne’e tama iha tinan 2023, hosi Governo da walu ( VIII Governo). Tuir mata dalan nebe iha Programa ne’e dehan kada Posto Administrativo iha Territorio Timor tomak hetan osan ho montante sem mil dollars ( $ 100.000 ), hosi orsamentu ne’e nia mata dalan hatudu mai katak kada Ad Posto nia iha dever no poder tomak atu jere orsamentu ne’e hodi hala’o programa nebe maka iha Suco sira iha Posto ne’e nia laran. No Cefe Suco no Cefe Aldeia sira nia dever no responsabilidade maka atu mobiliza ka rekruta komunidade sira hodi ba halo servisu. Entaun nune’e iha Posto Lacluta iha Suco hat, maka hanesan Suco Ahic, Dilor, Laline no Suco Uma-Tolu.Entaun hosi orsamentu sem mil dollars ne’e hafahe ba faze rua. Primeira faze utiliza 50% hosi orsamentu ne’e no 50% hela ba faze segundu, ho nune’e Sucos sira forma grupu hamutuk ruanulu ( 20 ) no kada suco iha grupu 5 no sira servisu no kada grupu iha ema nai’in 20 no 19 hanesan trabalhador no ida sai hanesan cefe grupu no kada trabalhador kada loron manan $ 5 no cefe grupu hetan $ 7,00. No servisu durante loron 20. Tipu de servisu maka hamos Estrada, taka Estrada kuak no bele loke dalan ka Estrada ki’ik ba iha Suco sira. No servisu ba primeira faze nian ami konklui tiha ona no hatama tiha ona relatoriu ba Administrador Municipio hodi hein fali segunda faze, maibe to’o agora seidauk iha mensagen ruma hosi Ad. Municipio. Maibe ami hein nafatin”.
Administrador hatutan dehan durante servisu sira forma grupu hamutuk 20 no laiha defikuldades ka lamentasaun ruma nebe maka hato’o hosi grupu trabalho sira no buat hotu la’o ho diak no tuir duni planu nebe iha ona. Nia mos dehan kona ba hamos Estrada ne’e tamba iha posto Lacluta hanesan area izoladu tamba nee presija duni atu hadia ka ateru Estrada sira nebe kuak maibe laos rehabilitasaun Estrada. Jose Andrade mos husu atu programa refere iha kontinuasaun tamba fo duni benifisiu ba komunidade sira hodi hadiak ekonomia familia nian. No Jose Andrade dos Santos mos afirma dehan Governo dasia kria programa PMOPA ne’e ho nia objetivu maka atu rekopera fali ekonomia familia sira nian, no tuir Administrador ne’e observa katak rekopera duni. Tamba ne’e maka nia husu ba IX Governo Konstitusional atu iha tinan 2024 kontinua aloka orsamentu ba programa refere. Atu fo hanoin fali katak, antes ne’e Administrador Municipio de Viqueque, Januario Soares – Boli deklara katak PMOPA iha Municipio Viqueque nia implementasaun tarde liu no Posto Administrativo balun seidauk implementa ho razaun katak klima maka la favorese.
Iha fatin hanesan Administrador Posto Lacluta ne’e mos kestiona kona ba Estrada nebe liga ba Posto Lacluta nia kondisaun nebe at tebes hodi difikuta transportes sira hosi Municipio no mos Nasional mai Posto Lacluta. Tamba ne’e Jose Andrade husu ba nonu Governo atu tau atensaun ba infraestrutura liu liu Estrada, tamba tuir Administrador ne’e katak Estrada la diak fo mos impact ba actividades sira seluk. Nia mos kestiona kona ba telekomunikasaun hanesan linha telefonika nebe iha Posto Lacluta ladiak. Entretantu Administrador ne’e seblinha katak kona ba ahi eletricidade no bee mos iha Posto Lacluta atinji ona porsentu 95 so falta deit povoasaun rua maka seidauk asesu ba eletricidade maibe tamba totoal populasaun maka la sufisiente atu EDTL dada ka liga ahi eletricidade ba.
Jornalista ; Adriano A. Mesquita
Editor ; Florindo de Jesus
