Kinta feira loron 10 fulan Agosto 2023 semana ne’e Servisu Agricultura no Peskas servisu hamutuk ho parseiru sira hala’o workshop loron ida hodi koalia kona ba preparasaun formasaun ba grupu Agricultura sira kona ba sistema koileta no pos koileta no hola fatin iha salaun MAP Municipiu Viqueque.
Director Servisu Agricultura Municipiu Viqueque Fernando Joaquim ba jornalista RPV dehan objetivu hosi workshop ne’e atu fahe informasaun ba autoridade local no mos grupu benefisiariu sira kona ba formasaun nebe sei hala’o iha semana rua oin mai.
“ Soru mutuk ba tempu ohin nia ita sei koalia kona ba treinamentu nebe sei halao iha semana rua mai kona ba sistema koileta ninian no mos ba gestaun pos koileta nian, tamba dala barak ita ladun fo atensaun ba buat hirak ne’e no halo ita nia agricultor sira lakon aihan barak iha tempu sira hanesan ne’e. Tamba ne’e ita nia Diresaun Nasional hamutuk ho parseiru sira iha planu atu halo treinamentu kona ba ida ne’e. Hau hanoin buat ne’e laos foun ba ita maibe ita nia parseiru sira no MAP hakarak fo atensaun nafatin ba ita atu kada tinan labele lakon aihan sira hanesan tamba ita nia inan aman sira ladun fo atensaun ba ida ne’e. No aihan sira hanesan batar, hare hanesan aihan ( serial ) no mos ba hortikultura nian hanesan modo tahan no mos aifuan sira tamba aihan hirak ne’e at lalais deit no labele rai ba tempu naruk”.
Director Agricultura Municipiu ne’e mos husu ba grupu benefisiariu sira atu wainhira treinamentu ne’e halao tenki partisipa ho diak hodi aproveita oportunidade ne’e ho diak atu nune’e bele hakbit no hariku nafatin ita nia matenek hodi kona ba oinsa ita prepara ita nia aihan sira ne’e ho kualidade nebe diak.
Iha fatin hanesan espesialista Nasional ba konservasaun aihan nian hosi Ministerui agricultura no Peskas ( MAP ) Claudia Ximenes dehan, atu hetan aihan agricula nebe diak tuir ita ema nia hakarak tenki tau atensaun ba sistema kulitivasaun koileta no gestaun pos koileta nian, tamba ita nia emar sira iha baze sei ho konyesementu limitadu ba iha area koilete no gestaun ba pos koileta. Tamba ne’e presija fo kapasitasaun ka formasaun ba grupu agricultor iha sira nia area hodi bele reduz aihan nebe lakon iha tempu koileita no depois koileita oinsa bele rai haihan. No workshop ne’e rasik hanesan abertura ba treinamentu nebe maka sei halao iha semana rua mai.
“ Iha workshop ne’e ita konvida Autoridade Lokal sira no mos grupu benefisiariu sira mai atu fo hatene katak workshop ne’e hanesan abertura ba formasaun nebe sei halao iha semana rua oin mai, no treinamentu ne’e ita sei foka liu ba pratika diak sira pos koileita nian ho objetivu atu hamenus tiha aihan sira nebe maka estragus wainhira koileita tiha (pos koileita ). Entaun ho treinamentu ne’e espera katak ita nia agricultor sir abele trata sira nia produtu ne’e halo didiak. No projetu ne’e hetan ajuda finanseiru hosi FAO maibe implemanta hosi Governu ( MAP ) Departementu Pos Koileita nian. Treinamentu sei halo kada grupu durante loron tolu tuir Sucu nebe maka ita target tiha ona”.
Espesialista ne’e mos husu ba grupu sira nebe maka identifiado atu tuir treinamentu bele hetan informasaun diak hodi nune’e bele konserva sira nia aihan sira ho diak.
Entretanru actividade workshop ne’e rasik loke diretamente hosi Administrador Municipiu Viqueque Januario Soares –Boli no partisipa hosi Administradores Postu Administrativo lima hanesan Lacluta, Ossu Viqueque Vila, Watulari no Postu Watu-Carbau inklui cefe Sucos sira MAP Nasional hosi Departementu Pos Koileita, MAP Municipiu inklui Extensionista sira no mos grupu Agricultura nebe estabelese iha Viqueque nia laran no la’o durante loron ida.
Jornalista, Eugenia Alves
