Loron 1 fulan Jullu tinan 2023 ne’e sai hanesan loron Istoriku ba Parokia no sarani sira iha Ossu tamba tau ona fatuk dahuluk atu hodi hari Mini Salaun ida iha Parokia ne’e. Administrador Parokial Sta. Terezinha do Menino Jesus Ossu iha nia diskursu ba actividade ne’e dehan, objetivu atu tau fatuk dahuluk ne’e tamba Mini Salaun nebe uluk iha at total ona. Pe. Jose Gonzaga mos dehan loron ida fulan Jullu 2023 sai hanesan momentu istoriku id aba sarani no Parokia Ossu.
“ Dia 1 de Jullu 2023 sai hanesan momentu istoriku ida Parokia Sta Terezinha Menino Jesus lansa primeira pedra ba iha mini salaun Parokial, ho nia objetivu tamba Mini salaun ida uluk ne’e at total los ona entaun ami buka atu hari fila fali mini salaun oan ida atu nune’e bele atende ba iha actividades sira igreja nian no mos bele atende mos ba actividade sira hosi li’ur nian. Lansamentu ne’e atu dehan katak nia servisu laos mai hosi kompanya ruma maka atu kaer lae, maibe sarani no Parokiano Ossu sira rasik maka servisu ho voluntariu no tau matan ba servisu tomak”.
Administrador Parokial ne’e mos akresenta tan katak to’o agora sira seidauk husu orsamentu ba Instituisaun ruma hosi Governu nune’e mos hosi Dioseze tamba servisu ne’e hanesan servisu voluntariu hosi sarani sira Parokia Ossu nian.
“ To’o agora orsamentu ami seidauk husu ba intedade ka Instituisaun ruma, nem hosi Governu nem hosi Dioseze. Ke buat ida nebe ami nia hanoin katak, sura uluk hosi forsa sarani sira nian, fatin ida ne’e pretense ba sarani Ossu entaun sira tenki sukat ho sira nia forsa oinsa atu hari fatin ida ne’e. No buat nebe tuir hau nia prediksaun ne’e katak sei gasta orsamentu por volta de $ 20 mil I tal. Servisu ida ne’e bolu katak servisu voluntariu katak hosi estasaun sira, hosi bairu hotu hotu sei haruka nia emar sira atu mai servisu voluntariu. Padre Jose Gonzaga mosh u atu sarani hotu tenki konsiente katak nia iha sentidu pretense ba Parokia ne’e, segundu maka sarani hotu hotu tenki toma responsabilidade, katak ida idak tenki husu ba nia an katak hau mos tenki buka atu partisipa. Entaun ho dalan ida ne’e maka husu ba sarani hotu atu mai servisu atu nune’e ita mos bele hetan netik mini salaun ida nebe diak”.
Administrador Parokial Sta. Terezinha do Menino Jesus Pe. Jose Gonzaga mos afirma katak Karik nia sei nafatin iha Ossu maka sei hari tan Seminariu Menor ida iha Ossu tamba wainhira Viqueque sai ona Dioseze, tamba tuir Pdre ne’e katak wainhira Hari ona Dioseze iha Viqueque entaun kada Dioseze tenki iha nia seminariu menor rasik.
Iha fatin hanesan Francisco da Costa Guterres, nebe hanesan konselho Ekonomia Parokial Ossu nian, hanesan mos sarani ida hato’o nia agradesementu no sentimentu orgullu ba inisiativa diak nebe mai hosi Administrador Apostoliku nian ne’e. Francisco Guterres mos hatutan dehan, Parokia Ossu hanesan Parokia segundu mais antigun iha Timor hafoin de Parokia Soibada. Tamba ne’e tenki iha Salaun ida hodi halibur sarani sira wainhira halao servisu Parokia nian. Tamba kondisoens nebe maka bei ala sira halo ne’e kleur los ona no at los ona, hanesan Rezidensia Parku nian ne’e liu ona tinan 90 resin maibe halo ona rehabilitasaun no atingi ona porsentu sianulu ( 90% ) no salaun ne’e rasik mos kleur ona. Tamba ne’e hamutuk ho sarani Ossu tomak sei servisu maka’as atu bele iha salaun ida iha tempu badak nia laran. Francisco da Costa Guterres mos afirma katak maske nia ho idade nebe avansadu los ona maibe pronto nafatin atu servi ba Parokia Ossu.
Partisipa ba seremonia tau fatuk dahuluk ba Hari Mini salaun ne’e maka autoridade local Posto Ossu nian, Sarani sira no mos estudantes sira iha Ossu.
