Administrador Posto Administrativo Viqueque husu ba prezidente klube ho sira nia ekipa no mos adeptus sira atu kria estabilidade iha kampu durante jogu hala’o. Administrador Posto Duarte Soares Brandᾶo hato’o lia ne’e wainhira partisipa iha abertura ba jogu taxa Eelkomsel Cup Sabado liu ba iha kampu Demokrasia Viqueque. Duarte Brandᾶo mos esplika liu tan dehan, taxa Telkomsel nian ne’e hala’o on aba dala tolu no iha tempu liu ba sempre hamosu konfrontu iha kampu laran to’o foin lalais tinan kotuk ba konsege hasai tiha klube rua hodi labele kontinua joga tamba hamosu problema iha kampu laran.
“ Iha tinan ida ne’e ita nia jogu la’o on aba dala tolu,ba dala ruanebe liu ona nia diak mos ita hare no nia at mos ita hare hotu. Neduni hanesan autoridade Posto Administrativo Viqueque hau nia esperansa ba ita hotu liu liu ba Prezidente klube sira, ofisiais sira no treinador sira tenki mantein kalma atu labele hasoru ka hamosu problema hanesan foin liu ba ne’e. Tamba sa maka hau koalia hanesan ne’e. Tamba foin tinan kotuk liu ba wainhira ita komesa realiza buat hotu la’o diak, depois ba to’o klaran komesa at ba dadaun to’o atu remata atu at liu tan maibe sorte ita konsege resolve problema ne’e. Ate ke ita nia seguransa Polisia sira mos hetan hotu pankada fatuk kabuar no ai klaliruk sira. Tamba sa? Tamba iha mos provokasaun hosi adeptus sira.Tamba ne’e hau husu atu labele akontese tan hanesan ne’e”.
Entretantu Administrador Posto ne’e mos husu ba arbitu ka wasit sira atu wainhira lidera jogu labele hare katak klube ida ne’e hau nian ida neba laos hau nian, tamba akontese iha pasadu ne’e involve mos hosi parte hotu hotu.
“ Karik ba iha arbitragen sira atu hare ba klube sira ne’e hanesan hotu laos atu hare fali katak ida ne’e hau nian ida neba laos hau nian. Maibe hare katak ne’e ita nian hotu. Maibe husu mos ba prezidente klube sira atu treinador no ofisiais sira tamba arbitu ema ida deit ho lanya nai’in rua ida iha kampu sorin no ida iha sorin, dala ruma sira labele kontrola jogadores hamutuk nai’in 22 nebe iha kampu tamba ne’e karik hare hetan iregularidade ruma nebe komete hosi arbitragen sira labele hamanas situasaun iha kampu, maibe aponta ka tau iha notas to’o jogu remata maka fo hatene liu hosi tur hamutuk hodi buka solusaun. Dalai da tan hau husu ba ekipa tomak atu halo ida ne’e hodi kontribui ba dame paz no estabilidade hodi hala’o jogu ne’e ba oin”.
Nune’e mos Duarte Soares Brandᾶo kontinua husu atu joven sira nebe maka partisipa iha jogu refere atu tau nafatin interese dame paz no estabilidade hodi desenvolve diak liu tan actividade desporto hotu hotu liu liu tebe bola nian atu bele lori Viqueque ba oin. Tamba tuir Administrador katak wainhira laiha actividade desportu sira, joven ezizi katak autoridade laiha kbit atu hala’o ka kria, maibe autoridade sira buka no esforsu hodi loke tiha actividade desportu hanesan tebe bola ita laos aproveita oportunidade ne’e ba jogu hodi hamoris emi nia talentu, maibe uza fali oportunidade ne’e hodi hamosu problema.
Entretantu jogu taxa Telkomsel Cup ne’e partisipa hosi klube 18 nebe regista ona no klube sira ne’e mai deit hosi Posto Administrativo Viqueque vila nian maske jogu ne’e rasik nakloke ba klube hotu iha Municipio Viqueque nian laran tamba orsamentu la sufisiente.
