Monday, April 15, 2024
spot_img
HomeFoto GaleriaNoticia RPV; Sarani Lacluta Selebra Loron Santo Antonio.

Noticia RPV; Sarani Lacluta Selebra Loron Santo Antonio.

Sarani Parokia Santo Antonio de Lacluta selebra Loron Santo Antonio nian ba dala atus tolu hitunulu resin walu iha Parokia Lacluta iha loron 15 fulan Junho tinan 2023 ne’e. Padre Parku Lacluta Pe. Abel Soares Alves iha Intrevista ho Jornalista RPV dehan,Sto. Antonio nia prezensa iha Lacluta tama ona ba tinan atus tolu hitu nulu resin walu (378) hanesan mahein ba Lacluta oan sira.

“ Santo Antonio nia presensa sai ami nia mahein iha rai ida ne’e tama on aba tinan 378, e Nia presensa lori forma Lacluta oan sira hodi mai to’o ohin loron tamba ne’e maka tinan tinan ami selebra, Lacluta oan mesak deit maibe seidauk involve Lacluta oan sira nebe maka namkari iha Timos nia laran tomak. Tinan ida ne’e ami hahu hodi bolu hamutuk Lacluta oan sira nebe maka iha Timor no mos sira nebe maka iha Indonesia, maske sira hotu la mai maibe iha reprezentante id aka rua maka marka prezensa hodi selebra hamutuk. Katak ida ne’e ita Lacluta oan sira nia mahein, ida nebe tulun ita akompanya ita to’o ohin loron no laiha buat diak ida ita atu hasa’e ba Maromak  maibe ita nia agradesementu liu hosi ita nia hamutuk tamba Santo Antonio nia hakarak maka atu hari unidade, ksolok, domin no paz ba hotu hotu”.

Nune’e mos reprezentante sarani Parokia Sto. Antonio Lacluta nian ida nebe hanesan mos Cefe do Suco Uma Tolu Henrique Campos dehan, sarani hotu hotu iha Lacluta haksolok ho prezensa Sto. Antonio nia hanesan Mahein ba Lacluta oan tomak tamba hanesan Mahein ida nebe maka ksolok motiva no halo sarani sira Lacluta hametin liu tan sira nia fiar ba Maromak. Entretantu Henrique Campos mos hatutan dehan ba tinan ida ne’e Lacluta oan mos hahu tau fali ona Bandeira Reino Lacluta nian hanesan simbolu atu hametin liu tan Lacluta oan sira nia unidade.

“ Iha Lacluta hotu hotu apresia ho Sto. Antonio nia prezensa hanesan mahein ba ema Lacluta nian no ho prezensa Sto. Antonio nian hanesan Mahein ida nebe maka fo ksolok, fo motivasaun ba sarani Lacluta tomak sai fiar nai’in nebe metin liu tan. Tamba ne’e maka kada tinan ami sempre komemora no kada tinan suco ida idak sei responsabiliza ba komemorasaun ne’e. Hanesan ba tinan ida ne’e (2023) Suco Uma Tolu maka responsabiliza no tinan oin fali (2024) Suco Laline maka sei responsabiliza. Ne’e rotativa to’o Suco hat ne’e hotu tiha komesa fali hosi primeiro. No ba tinan ida ne’e ami hamosu tan buat foun ida maka Bandeira Reino Lacluta nian. Nebe maka ohindader Amu Kardial haraik tiha ona bensaun. Ne’e simblu ida atu hametin liu tan Povo Lacluta tomak sira nia unidade,no Sto. Antonio hanesan Mahein ba sarani Lacluta oan sira e Baba Reino Bandeira Reinu hanesan Simbolu ba Unidade Lacluta oan sira nian”.

Iha fatin hanesan Bispu Arque Diosese Dili Sua Eminensia Dom Virgilio Cardeal do Carmo da Silva SDB nebe preside Missa ba komemorasaun Festa Sto. Antonio nian iha Igreja Lacluta hato’o nia parabens no agradesementu ba sarani Lacluta tomak tamba komemora ona loron ida ne’e.

“ Uluk nana’in hau nia parabens ba Parokiano tomak Lacluta nian tomak tamba komemora loron ida ne’e. Tamba ne’e hau nia parabens e agradese. Loron ida ne’e loron furak loron ida atu agradese tamba loron ne’e sai duni loron nebe atu sarani sira hametin liu tan sira nia fiar, konvite ida atu hametin liu tan  ita nia esperansa, katak ita hotu mesak ema sala na’in ema sabaraut maibe iha esperansa atu la’o ba oin. Konvite ida atu monu maibe sempre iha esperansa atu hamrik fali hodi la’o ba oin, e konvite ida atu hametin no haburas liu tan ita nia domin no fiar hodi la’o ba nafatin. Iha Evangelho dehan, Emi mak masin rai nian, masin mak fo sabor ba hahan. Tamba ne’e imagen masin nian hatudu ba emi sarani Lacluta oinsa? Atu hakat ba oin hadaet ba Mundu oinsa atu fo nafatin sabor fo nafatin sentidu ida ba ita nia moris. Se ita la kaer metin Maromak nia lia fuan nebe Sto. Antonio Haklaken mai ita, neduni ohin Sto. Antonio konvida ita atu haklaken Maromak nia Lia fuan atu ita lori ita nia moris ne’e sai ksolok liu tan ba ema seluk no ba Mundu tomak.Masin mos laos deit atu hamer maibe atu koserva. Atu konserva valor sarani nia atu hamrik metin tamba ohin loron ne’e iha tentasaun oin oin, ohin loron iha tendensia bo’ot ida ba ita ema tamba ema barak hanoin katak  Moris ne’e hau nian, isin hau nian no sira halo tiha sira nia isin sai hanesan Merkadu. Maibe ita haluha tiha katak ita nia isin ne’e Maromak mak fo mai, Maromak nian. Tamba ne’e Sto Antonio hanorin ita atu sai Masin hodi hamer no konserva. Santo Antonio mos hanorin mai Lacluta oan sira atu iha familia aprende sai masin atu hamrik mstin, hodi haburas, defende no fo sasin kona ba valor ida ne’e. Tamba ohin loron ne’e familia barak maka komesa rahun ona, naksobu no buat sira ne’e hotu oan sira maka senti ninia konsekuensia terus no labele koko aman no inan sira nia domin ne’e oinsa. Tamba ne’e ita ema moris hanesan sarani ne’e tenki tau metin buat rua nebe Sto. Antonio husik hela maka, Haklaken Maromak nia Lia Fuan no atu tur hodi rona Konfisaun”.

Entretantantu Missa komemorasaun Padroeiro Sto. Antonio nian iha Lacluta ne’e hala’o iha loron 15-06-2023 ne’e tamba selebra hamutuk ho loron Parokia Lacluta nian, no molok atu Missa sarani tomak hamutuk ho Cardeal no Padre Parku no convidadus sira tomak hala’o uluk prosisaun hodi hadulas Igreija tuir kultura Lacluta nian hanesan akompanya hosi moradores sira ho baba /tambor no bandeira no simu tuir uma  ermida 4 hosi sarani Suco 4 nebe iha Lacluta hafoin kontinua ho Missa nebe Prezide hosi Kardial rasik. Nune’e mos iha loron ida antes hala’o uluk rekonsiliasaun hosi Lacluta oan sira nebe maka iha Indonesia no mos iha Lacluta inklui Lacluta oan nebe iha Timos laran, no Sua Eminensia Kardial mos fo bensaun ba Baba Reinu no Bandeira Reinu Lacluta nian nebe sai hanesan Simbolu ba Unidade entre Lacluta oan tomak.

Partisipa iha seremonia Missa Ne’e maka, Amu Kardial rasik, Reprezentante Gabinete Presidensia da Republica, Padre Parku no Vigario Lacluta, reprezentante Ad. Municipio Viqueque, representante Kom. PNTL Municipio, autoridades Posto Lacluta nian no mos convidadus Lacluta oan sira hosi Indonesia no Municipio seluk inklui sarani Lacluta nian tomak.

 

Remata.

 

 

RELATED ARTICLES
Continue to the category
0 0 votes
Article Rating
Subscribe
Notify of
guest
0 Comments
Inline Feedbacks
View all comments
Fans na'in: mak rona hela.
Loading ...

Trending Semanal.

0
Would love your thoughts, please comment.x
()
x