Comisaun Nasional das Eleisoens ( CNE ) Municipio de Viqueque nebe cefia hosi Comisario destakado iha Municipio Viqueque hamutuk ho Komandante PNTL Municipio ho Liders Partidos Politikus sira nebe maka konkore iha kampanya ba Eleisaun Parlamentar tinan 2023 ne’e halo evaluasaun ba kampanya Eleitoral nebe la’o ona durante loron sanulu ( 10 ) hahu hosi 19 to’o 29 fulan Abril tinan 2023 iha Municipio Viqueque nia laran. Olavio da Costa Monteiro, hanesan Komisario CNE detakadu iha Municipio Viqueque avalia katak, durante loron 10 nia laran nebe Partidos Politikus sira halo ona sira nia kampanya iha Municipio ida ne’e barak ( liu liu Partidos bot ) sira maka kontra ka viola hela Lei Eleitoral no rejimentu sira kona ba kampanya nian.
“ CNE nia observasaun durante ne’e iha buat barak nebe maka ami hare no hakerek. Iha Partidos sira barak maka koalia uituan deit kona ba programa maibe uituan deit, koalia barak liu maka istoria, buka hatun malu, diskrimina ema seluk nebe maka laiha ligasaun ho Partidu ne’e. Se ita koalia deit kona ba buat sira ne’e oinsa maka militantes sira atu hatene kona ba ita nia programa. Ami nia observasaun ida ne’e serius. Ami sei hare iregularidades sira nebe akontese ona no ami sei halo notifikasaun ba Partidos Politikus sira atu nune’e sir abele tau enkonsiderasaun atu nune’e ba oin sira labele kontinua nafatin tamba ita nia kampanya eleitoral sei lao to’o loron 18 fulan Maio 2023”.
Entretantu Olavio da Costa Monteiro esplika kiu tan dehan agora dadauk ( ohin Sabado 29-04—2023) iha CNE Nasional Dili iha plenaria Estraordinario hodi koalia kona ba kampanya Eleitoral nebe maka lao ona durante loron 10 ne’e. hodi hare ba iregularidade sira nebe akontese ona atu nune’e labele insita ka provoka violensia. Tamba Lideransa sira maka koalia maibe nia impactu sei ba fali militantes baibain sira tamba karik militantes sira halo violensia hodi hamosu krime ne’e nia rasik maka tenki responsabiliza perante lei.
Iha fatin hanesan, Komandante PNTL Municipio Viqueque Superintendente Cefe Sebatiᾶo Quintᾶo afirma, durante loron 10 hala’o kampanya eleitoral iha Municipio Viqueque nia laran akontese kazu violensia hat maibe Polisia halo kedas intervensaun no situasaun lao hakmatek nafatin to’o ohin loron, no kazu sira ne’e identifika hotu ona no halo ona prosesu tuir lei nia haruka. No PNTL Municipio Viqueque pronto nafatin atu fo seguransa durante period kamoanya to’o Eleisaun remata.
“ Hanesan ita hatene katak PNTL hanesan INstituisaun ida estadu nian nebe konstitusional no hatur tuir lei KRDTL artigu 147 dehan PNTL hamrik atu garante seguransa ba sidadun hotu hotu ao mesmu tempu laiha partido Politiku. Tamba ne’e hanesan Komandante PNTL Municipio ida ne’e garante nafatin estabilidade iha kampanya to’o remata, loron hakmatek, loron votasaun, kontagen de votus apuramentu Municipal to lori ba Nasional to’o fo sai rezultado final hosi Tribunal Rekursu. No hau mos hakarak iha loron 21 de Maio loron votasaun nian ema hotu hotu tenki livre atu vota tuir nia konsiensia, no hau apela ba liders Partido Politiku sira iha Municipio atu fo avizu ba militantes sira atu labele lanu ka hemu tua besik iha fatin votasaun sira nebe estabelese ona”.
Tuir observasaun hosi jornalista RPV iha fatin encontru hare katak representantes Partidos Politiku sira nebe partisipa hato’o mps sira nia preokupasaun lamentasaun no mos sugestaun ba CNE relasiona ho kampanya eleitoral tinan ne’e. Nune’e mos Partidos Politikus sira nebe partisipa iha evaluasaun ne’e maka; PLP. PD, Partido Os Verdes, PUDD, Kunto, Partido Republikano, Fretilin, CNRT, no Partido CASDT.
Actividade evaluasaun ne’e halao iha Salaun encontro CNE Municipio Viqueque nian ohin, 29-04-2023 hahu tuku 9 dader to’o remata iha tuku 12.00 meiudia.
