Fasilidades iha escola sira iha Municipiu Viqueque nia laran seidauk asesivel ba ema ho difisiensia sira atu bele partisipa ho diak iha prosesu aprendizajen liu liu atu tama deit ba area escola nian mos susar ona tamba laiha fatin ka rampa ba ema ho difisiensia sira tamba konstrusaun escola sira barak maka bazeia ba projetu komunitariu.
“ Ida kona ba iha asesu ba ema ho difisiensia sira ne’e tuir hau nia hare seidauk iha, tamba tuir programa kona ba konstrusaun ba escolar ne’e agora ne’e laos ona la’o tuir ona tama liu hosi AND maibe halai liu ba projetu komunitariu. Projetu komunitariu ne’e diak tamba ita hakarak foo san ba komunidade maibe nia impact mos iha tamba osan nebe aloka mai ne’e faze pur faze no komunidade sira maka gere, nebe kuandu it aba hateten ba sira katak emi aumenta tan ida ne’e entaun sira husu tenki aumenta tan osan. Entaun buat hirak ne’e difikuta ba asesivel ba ema ho difisiensia, tamba mos dezenhu nebe maka haruka mai hosi Nasional mos la iha ramp aka dalan espesial ba ema ho difisiensia sira. Iha hau nia tempu wainhira sei hanesan Diretor escolar konstrusaun ba escolar nebe hau gere iha Bibileo hau rasik maka inisia hodi fo hatene ba sira nebe servisu ne’e dehan; emi hare tau tan netik semente saku oan ida iha ne’e para labarik sira ho difisiensia bele tama mai to’o iha escolar laran. Tamba iha escolar ne’e iha sira na’in rua maka ho difisiensia, entaun sira halo. Mais em geral escolar sira iha Municipio Viqueque nia laran seidauk asesivel ba ema ka labarik sira ho difisiensia tu bele partisipa ho diak”.
Lia ne’e hato’o hosi Director Municipal servisu Edukasaun Municipiu Viqueque nian Domingos Brandao wainhira partisipa iha Tolksow Radio iha Estudiu RPV hodi koalia kona ba; “ Atu asegura partisipasaun ema ho difisiensia iha desenvolvementu ida nebe inkluzuvu” foin lalis ne’e.
Entretantu tuir dadus nebe Radio Povo Viqueque ( RPV ) asesu katak ema (labarik ) ho difisiensia sira hamutuk na’in 9 maka hola parte iha prosesu aprendizajen iha escola sira nebe namkari iha Municipiu Viqueque nia laran maibe na’in rua sai tiha ona tamba kondisaun escola nebe la asegura no mos hetan estigmatizasaun no bulling hosi sira nia kolegas inklui profesores sira.
Nune’e mos Director Municipal Servisu Obras Publika Municipio Viqueque nian rekonyese katak to’o oras ne’e fasilidades Publiku sira nebe estabelese iha Municipio Ne’e seidauk asesivel ba Ema ho Difisiensia sira. Tuir Mario do Rego, Director Municipal Obras Publika no Transporte Municipio Viqueque ne’e mos hatutan dehan.
“ Sim los duni kona ba ida ne’e akontese duni iha Obras Publika no durante ne’e Obras Publika sira iha Municipio seidauk iha planu mesak atu halo konstrusaun sira inklui mos estradas sira no planu hotu hotu konsentrado iha Nasional no sira la involve parte obras Publika Municipio nian. Tamba ne’e maka ita nia edifisiu publiku sira iha ita nia Municipio seidauk iha espasu ba ita nia maluk sira ho difisiensia”.
Mario do Rego mos hatutan tan dehan agora dadauk hosi parte Obra Publiku Municipio sira iha ona planu atu hadia fatin liu liu edifisiu publiku sira hodi bele fo asesu ba ema sira nebe ho difisiensia no sira submete ona planu refere ba Nasional hodi hein aprovasaun. Karik iha ona aprovasaun maka sei implementa iha tempu oin mai.
Entretantu tuir dadus nebe maka RPV hetan hosi Organizasaun Naun Govermental ( NGO ) Ra’es Hadomi Timor Oan ( RHTO ) Municipio Viqueque nian katak ema ho difisiensia nebe sira alista ona hamutuk atus lima resin.
Remata
