Comisaun Nasional de Eleisoens ka CNE nia preparasaun ba Eleisaun Parlamentar tinan 2023 nee hahu kedas iha fulan Julho tinan 2022 liu wainhira halo lansamentu ba resensiamentu. No hafoin tama ba tinan 2023 ne’e waihira Presidentedekreta data ba eleisaun iha tan actividade lubuk ida maka CNE ho Estae prepara maka hanesan prepara baze de dadus ba eleitores sira iha rai laran no mos rai liur no hare mos ba kalendadriu ba eleisaun ne’e rasik. Lia ne’e hato’o hosi Komisariu CNE destakadu iha Municipiu Viqueque Segunda semana ne’e ba jornalista RPV wainhira halo intrevista iha edifisiu CNE Municipiu Viqueque,
“ Kona ba preparasaun ba Eleisaun Orgaun eleitoral nian hahu kedas iha fulan Julho tinan kotuk wainhira hahu loke ka halo lansamentu ba resensiamentu ba eleitoral no actualizasaun baze de dadus . Hahu kedas iha neba CNE komesa ona halo preparasaun. Hahu hosi ne’e mos iha tan preparasaun lubuk ida maka CNE halo maka hanesan supervizaun ba rekrutamentu ba ofisiais CNE nian no tau mos matan ka superviziona knar ba rekrutamentu brigada Estae nian no mos halo akizisaun ba materiais sira eleisaun nian. No hafoin de Presidente da Republika wainhira kuandu dekreta ona data ba eleisaun entaun kontinua ho actividades lubuk ida maka CNE halo maka hanesan actualizasaun baze de dadus iha rai liur no mos registu ba partidu sira no CNE mos halo superviaun, akompanya ba Tribunal no halo sertifikasaun ba partidus koligasaun sira, hare mos ba kalendariu ba Eleisaun ne’e rasik no ikus mai halo mos konferensia Nasional ba Eleisaun Pasifika “‘.
Hatan ba perguntas kona ba fraternidade Humana Komisariu CNE Olavio da Costa Monteiro dehan; objetivu lolos hosi fraternidade Humana maka aprosimasaun kona ba fiar nian atu hodi garante katak eleisaun ne’e sei lao ho hakmatek o trankuilu no sai mos hanesan lasu ida atu hodi kesi ita hotu no partidus politiku sira atu durante kampanya to’o eleisaun tenki lao ho hakmatek.
“ Fraternidade Humana nudar hanesan baze ba iha ita no ita nia sidadaun sira liu liu politikus sira oinsa atu bele konsidera malu hanesan maun alin durante kampanya to’o iha Eleisaun nian. No aprosimasaun ba tinan ida ne’e ita halao kona ba ka tuir fiar Relijiaun ida idak nian “.
Ikus liu komisariu CNE ne’e apela ba eleitores hotu nebe registu ona atu asegura didiak sira nia kartaun no bele ba hare dadus sira nebe taka ona iha fatin sira nebe determina no nia kontinua husu ba eleitores sira atu durante kampanya bele tuir ho paz no hakmatek no labele halo provasaun tamba bele hamosu konflitu. Olavio da Costa Monteiro taka nia esplikasaun hodi dehan, Eleitores hotu atu iha loron 21 fulan Maio 2023 hakat ba iha Centro Votasaun sira nebe estabelese ona iha sucos idak – idak hodi exerse sira nia direitu atu nune’e labele lakon emi nia votus tamba votu ida determina future Nasaun nian.
