Ponte mota Sumaku iha Suco Uma-Tolu kotu tamba udan bo’ot nebe akontese iha loron 3 no 4 fulan Julyu tinan 2023 ne’e. Ponte refere liga Posto Administrativo Lacluta mai Municipio Viqueque no mos municipiu seluk inklui capital Dili. Tuir Administrador Posto Lacluta katak, ponte ne’e importante tebes ba movimentu komunidade Posto Lacluta nian tomak hodi ba Municipio no mos fatin seluk atu halo actividade hanesan negosiu no mos actividade seluk. Maibe ponte ne’e kotu tiha hanesan ne’e difikuta los sira ami hotu nia movimentu tamba transporte hotu labele asesu kaliu, no laiha dalan alternative seluk atu bele liu. Tamba ne’e Administrador Jose Andrade dos Santos husu ba Ministerio Obras Publiku ( MOP ) atu bele mobiliza ekipamentus sira hodi bele normaliza urjenti ponte refere hodi komunidade sira bele asesu fali hanesan bai bain. Administrador Posto Lacluta hato’o lia ne’e liu hosi telephone ba Radio Povo Viqueque iha programa dader “hamaluk ouvintes” Sesta feira loron 7 -07 -2023 ne’e hodi hatan ba perguntas kona ba akontesementu udan bot foin lalais ne’e. Entretantu Cefe do Suco Uma-Tolu no Cefe Suco Dilor mos husu ba parte kompetente hanesan MOP atu bele tau atensaun emerjensia hodi normaliza hikas ponte ne’e tamba importante ba povo Lacluta tomak hodi hala’o sira nia movimentu ba mai Municipio no mos fatin seluk. Cefe Suco rua ne’e hato’o sira nia pedidu liu hosi grupu WA Administrasaun Municipio Viqueque ( wa. AMV ) nian nebe RPV asesu. Cefe Suco Dilor mos husu ba Lacluta oan tomak nebe maka hela iha Dili no Municipio atu buka meius hodi halo kontaktu ba MOP hodi bele tau atensaun urjente.
Entretantu tuir informasaun nebe maka RPV asesu liu hosi pajina WA AMV nian iha Posto Administrativo Watucarbau mos mota konsege estraga tiha ponte ida nebe liga mai Municipio maibe Administrador Posto hola inisiativa hodi oriente komunidade no emprezariu balun nebe iha neba hodi normaloza hikas ona iha loron 6 fulan Julyu tinan 2023 ne’e, tamba ponte refere ladun grave ka at total.
Nune’e mos iha Posto Viqueque Vila rasik mos mota konsege estraga tiha Estrada iha parte Boramatan nian nebe liga ba Suco Uma Ki’ik Beobe. Estrada refere kotu tamba korente mota Kuha nebe maka’as iha loron 4 fulan Julyu ne’e hodi halo rai halai no hakotu tiha Estrada ne’e. Iha parte Buanurak nian mos mota konsege sobu tiha kanu transmisaun be mos hosi Loihunu Ossu mai Viqueque vila iha loron hanesan maibe liu deit loron ida Ekipa Tekniku BTL Viqueque konsege rezilve kedas no la fo impact ba konsumidor sira iha Viqueque Vila nebe uza be refere. Tuir observasaun ekipa RPV nian iha terenu hare mos katak edifisiu Publiku balun hanesan resintu servisu Agricultura Municipio nian no mos Edifisiu YADE nian nakonu ho be maibe la konsege tama to’o edifisiu laran tamba fondasi uma nian as. Nune’e mos durante udan bo’ot loron tolu tuir malu ne’e konsege estraga mos komunidade sira nia to’os no uma balun, maibe RPV seidauk hetan dadus kompletu tamba oras ne’e ekipa hosi parte Protesaun Civil no CVTL Filial Viqueque halo hela levantamentu dadus. No oras ne’e dadauk komesa iha Kinta semana ne’e to’o ohin iha Viqueque la akontese udan no korente mota nian komesa menus, loron matan sai hodi leno halo namlaik ona rai sira nebe dodok liu liu Estrada iha Viqueque vila nebe hanesan tiha natar durante udan bot liu ba.
Kobertura hosi Ekipa jornalista RPV
