Wednesday, July 24, 2024
spot_img
HomeFoto GaleriaNoticia RPV: MAOKOMS Inaugura Sentru Informasaun Iha Suco Makadiki.

Noticia RPV: MAOKOMS Inaugura Sentru Informasaun Iha Suco Makadiki.

Sentru Informasaun Suco Makadiki hari ka estabelese hosi Ministerio Asuntu Parlamentar no Komunikasaun Sosial ( MAPKOMS ) liu hosi Diresaun Nasional Promosaun Media Lokal ( DNPDML ). Tamba ne’e iha Sesta feira, 23-06-2023 liu ba Ministru Francisco Martins da Costa Pereira Zeronimo  inaugura Sentru refere. Iha diskursu Ministru husu atu kuidadu fasilidade sira nebe tau ona iha neba hodi uza ba tempu naruk.

“  Ita bot sira iha Material minimu atu halo buat ruma. Actividade saida deit maka halo iha Suco laran, Postu laran ita bot sira bele ba halo gravasaun, hasai foto atu tau iha ita bot sira nia website atu nune’e ema seluk bele hatene katak iha Makadiki mos halo hela actividade hanesan ne’e. Bele hatun noticia ruma atu ema iha rai seluk mos bele hatene. Karik iha actividade desportu, karik halo kasamentu ruma halo tuir kultura nian hanesan han batar, sa’e Uma lisan karik no buat seluk tan, joven sira nebe maka gere sentru ne’e, bele ba foti ka halo kobertura hodi tau iha emi nia website. Atu ema seluk iha rai bot le bele hatene; Ou Makadiki mos agora laos ona mutu rabu maibe Makadiki mos hahu ona halo buat diak ruma iha neba. Ne’e parte ida atu halo riku liu tan ita bot sira nia actividade. Saida mak ita halo ne’e buat ki’ik ida laos bot. Ita foin hahu, hahu atu hasai ita bot sira hosi izolamentu. Atensaun maka’as hosi parte Governu tamba atu lori sai emi hosi izolamentu. Nebe husu ba ita bot sira atu kuidadu sasan sira nebe maka entrega ona ba ita bot sira tamba sasan ne’e laos ema ida nian maibe ne’e, sasan ita hotu nian. Tan ne’e tenki kuidadu hodi fo atendementu ba publiku atu nune’e publiku bele simu ho diak no publiku mos bele fo apresiasaun ba ita nia servisu sira. Programa ida ne’e mos tama to’o iha Suco sira tamba atu fo naroman ba povo no hanorin povu sira labele consume informasaun nebe falsu ka bosok”.

Entretantu MAPKOMS Francisco Geronimo mos hodi Governu nia naran hato’o agradesementu ba povo Makadiki tamba kontribui tiha ona ba Eleisaun Parlamentar nebe liu tiha ona hetan susesu tebes.

“ Hakarak lori Oitavu Governu nia naran, nebe lidera hosi ita nia maun bot General Taur Matan Ruak hakarak agradese ba povo Makadiki tomak tamba ita bot  sira nia kontribuisaun ba eleisaun Parlamentar nebe liu tiha ona susesu teb tebes. Ohin hau mai iha ne’e hakarak mos fo agradese ba ita bot sira tamba koperasaun diak ho MAPKOMS. Ita bot sira simu hau ho hatais tuir kultura rai ne’e nian, hanesan fali hau mane foun Makadiki nian.  Maibe hanesan ohin ita nia lia nai’in koalia katak Makadiki mutu rabu, iha poizia alin feto nian mos temi Makadiki mutu rabu. Maibe ba hau la hare ba lia fuan dehan mutu rabu ne’e. hau hare ba ita bot sira nia vontade atu halo buat ruma iha sucu koperasaun nebe bot no animu nebe diak tebes. Tamba ne’e los duni ema dehan Makadiki mutu rabu maibe neneik ita bot sira sei muda hosi mutu rabu ba laran luak”.

Relasiona ho pedidu Cefe suco Makadiki nian atu MAPKOMS hari tan Radio Komunitariu ida iha Makadik Ministru Francisco Martins da Costa Pereira Zeronimo dehan, ne’e laos problema ida no tuir informasaun nebe maka nia simu ona hosi Director DNPDML katak sasan sira ne’e balun iha ona no sei presiza atu kompleta tan deit. Karik kompletu ona sei bele hari Radio Komunidade ida iha Makadiki. Ministru mos hatutan dehan hanesan Ministru nia mak sai maibe Directores sira sei iha nafatin. Tamba ne’e saida mak ami programa tiha ona sei realiza. Tamba Ministru ida sai ida mai fali, Governu ida sai ida mai fali objetivu ida deit. Maka atu serbi povo. Maibe nai cefe suco mos keta haluha atu halo nafatin proposta atu fo hanoin, e hau rasik mos sei fo hatene hela ba Ministru nebe maka sei mai.

Iha fatin ne’e nota katak povo Suco Makadiki simu MAPKOMS ho reprezentante Ministru Estatal no mos konvidadus sira seluk tuir kultura Watulari nian hanesan fo hatais MAPKOMS ho roupa tradisional no tara tais ba bainaka sira hodi simu ho dahur ka tebe dai no lia dadoli hosi katuas lia nai’in sira hanesan lia fuan bemvindu.

Seremonia inaugurasaun Sentru Informasaun ne’e partisipa hosi Administrador Municipiu Viqueque nebe reprezenta Ministru Estatal, MAPKOMS ho nia ekipa, autoridades Municipal nian balun, Autoridade Postu Watulari ho nia estrutura, no hetan partisipasaun maximu hosi povo Suco Makadiki no Suco seluk nebe besik no hetan seguransa diak hosi parte Polisia. Hafoin actividade seremonial sira remata, kontinua ho dansa no tebe dahur to’o loron nebe hetan animasaun hosi grupu banda Guarda Mor. No actividade Inaugurasaun Sentru Informasaun ne’e rasik organiza hosi DNPDML hamutuk ho Cefe Suco Makadiki ho nia estrutura sira.

RELATED ARTICLES
Continue to the category
0 0 votes
Article Rating
Subscribe
Notify of
guest
0 Comments
Inline Feedbacks
View all comments
Fans na'in: mak rona hela.
Loading ...

Trending Semanal.

0
Would love your thoughts, please comment.x
()
x