Servisu Tekniku Administrasaun Eleitoral ( STAE ) Municipio Viqueque Sabadu, 24-06-2023 fim de semana liu ba halao seremonia de Agradesementu ba Eleisaun Parlamentar nebe foin liu iha 21 de Maio 2023 hamutuk ho komponentes hotu iha Municipio Viqueque no hola fatin iha salaun Administrasaun Municipiu Viqueque nian. Director STAE Municipiu Umberto Fernandes iha nia diskursu hateten objetivu hosi seremonia ne’e atu fo agradesementu ba partes hotu nebe involve direta ka indireta ba iha Eleisaun Parlamentar nian, tamba Eleisaun ne’e la’o ho diak no susesu duni.
“ Objetivu hosi ita nia seremonia ida ne’e hanesan ita bot sira hare ona iha espanduk nebe taka hela iha oin neba katak seremonia de agradesementu. Tamba ne’e hau hakarak atu hahu hodi dehan, Eleisaun nebe foin liu ba ne’e nia susesu laos tamba STAE no CNE nia susesu deit. Maibe susesu ne’e tamba ita hotu nia kontribuisaun no servisu maka’as maka ita hetan ona susesu. Fo lisensa ba Hau hodi STAE nia naran hakarak atu hato’o ami nia agradesementu ba partes hotu nebe fo ona sira nia kontribuisaun durante prosesu tomak Eleisaun nian hosi hahu to’o remata buat hotu la’o ho diak, maske sei iha naksalah ki’ik balun maibe ne’e la afeta ba hotu hotu. Hakarak agradese espesial mos ba Sr. Administrador Municipio ho nia Sekretario, Directores linhas Ministeriais sira, CNE, Administradores Posto sira, Cefe sucos sira hotu, no mos ba fiskais Partidos Politikus sira, Brigadistas sira no ema hotu, tamba emi nia apoiu omak maka Eleisaun ne’e bele la’o ho diak. Liu liu ba Komandante PNTL Municipio ho nia membrus sira hotu tamba fo ona seguransa nebe maximu hodi garante ita nia servisu tomak Eleisaun nian hosi hahu to’o remata la’o ho diak no hakmate. Maske iha ita nia Municipio iha kazu ida nebe oras ne’e iha hela Ministerio Publiku, maibe ne’e kazu kiik. No ita hein nia prosesu sei mai. Maibe kazu ne’e laos sala hosi STAE nian, iha ema balun maka hakarak atu koko hodi halo. Ikus liu karik durante prosesu tomak Eleisaun nian iha Staf balun hosi STAE nian nebe halao servisu hasai lia fuan balun nebe la monu ba ita bot sira nia laran, hau hodi STAE nian naran hato’o deskulpa no husu ita bot sira nia perdaun”.
Hafoin Directo STAE hato’o tiha nia diskursu iha mos lia fuan agradesementu hosi parte balun hanesan Reprezentante Ad. Posto, Reprezentante hosi Cefe Suco, PNTL, CNE, Sekretario Municipio, Sociadade Civil, no hosi Partido Politiku sira reprezenta hosi Partidu manan nai’in ka Partidu mais votado CNRT.
Entretantu partisipa iha seremonia de agradesementu ne’e, Sekretario Municipio de Viqueque, CNE Municipio, Directores linhas Ministeriais sira balun, Administradores Postos balun, reprezentantes Partidus Politiku nian balun, Observadores, Organizasaun Sosiadade Civil, Fiskais no brigadas sira inklui mos konvidadus seluk tan.
Observasaun jornalista nian iha fatin hare katak hafoin parte STAE nian fahe mos sertifikado hanesan simbolu de apresiasaun ba Fiskais no mos Brigadas sira, no actividade ne’e kontinua ho divertimento to’o kalan.
