Cefe Suco Makadiki Posto Watulari husu ba Ministro Asunto Parlamentares no Komunikasaun Social ( MAPKOMS ) atu estabelese ka hari tan Radio Comunidade ida iha Sira nia Suco hodi kompleta diak liu tan Sentru Informasaun nebe iha ona. Cefe do Suco ne’e hatutan dehan, ne’e rekomendasau hosi Komunidade Makadiki oan sira nian, liu liu joventude sira husu MAPKOMS bele rekomenda ba IX Governo.
“ Program ida nebe maka ohin ita bo’ot tau ona iha ne’e hanesan Centru Informasaun sai hanesan media social nebe fo ona kontribuisaun bo’ot ba suco Makadiki atu hodi habelar informasaun ba fatin seluk, maibe joven sira sei halerik no rekomenda ba atan hau hodi hato’o hela ba ita bo’ot atu rekomenda hela ba IX Governo mai, bele kontinua ho ita bo’ot nia programa ne’e, hodi hari tan Radio Komunitario ida iha ami nia Suco. Ne’e ami nia rekomendasaun bo’ot, liu liu joven sira husu hela tamba sira mos hakarak atu desenvolve informasasun atu komunidade sira bele asesu diak liu tamba Makadiki fahe on aba Suco tolu no nia emar mos barak liu. Tamba ita bo’ot loke ona dalan, tamba ne’e maka atan hau hodi joven sira nia fatin hakru’k nafatin ba ita bo’ot atu rekomenda ba Governu tuir mai hodi halo nia kontinuasaun tamba Joven Makadiki halerik hela no sira mos hein hela”,
Cefe do Suco Makadiki hato’o lia hirak ne’e iha nia intervensaun wainhira hala’o inaugurarasaun ba Sentru Informasaun Suco Makadiki nian nebe estabelese hosi DNPDML-MAPKOMS sesta feira, 23-06-2023 ne’e. Iha nia intervensaun Cefe suco ne’e mos hato’o obrigado no agradesementu bo’ot ba DNPDML-MAPKOMS tamba bele hari ona Centru Informasaun ida atu bele motiva Joven sira hodi habelar liu tan informasaun nebe iha ba fatin seluk hodi hatene.
“ Hodi ita bot nia esforsu no ita bo’ot nia kapasidade nebe maka iha, liu hosi dialogu nebe hala’o tiha ona, lakleur de’it ita bot bele hari duni Sentru informasaun ida iha ne’e, hodi kumpri duni ita bot nia promesa molok mandate remata,no ne’e sai hanesan Media Sosial ida atu hodi fo motivasaun ba joven sira. Tamba ne’e dala ida tan ami agradese tamba ita bo’ot loke ona dalan hodi fo valor bot ida ba suco Makadiki”.
Molok atu taka nia intervensaun, Cefe Suco ne;e mos hato;o nia gradesementu no obrigado ba Direḉᾶo Nasional e Desenvolvemento Media Local ( DNPDML ) tamba sira nia srvisu maka’as hodi estabelese Sentru informasaun refere. No Cefe Suco mos tara hela tais oan id aba Cefe Departementu Informasaun – DNPDML nian, hanesan simbolu agradesementu ida.
Iha fatin hanesan Gestor Sentru Informasaun Suco Makadiki, Felipe Osorio da Silva Esmail sente kontente no hato’o mos nia agradesementu ba DNPDML ho MAPKOMS tamba bele hari ona sentru informasaun ida iha sira nia suco
“ Hau ho ekipa sente kontemte tebes tamba bele hetan ona ekipamentus nebe maka entrega hosi MAPKOMS hodi bele estabelese ona Sentru Informasaun ida ba ami nia Suco hodi habelar informasaun Suco nian. Tan ne’e Sente orgulhu tebe ba ida ne’e. No ami iha planu ba future katak sei kopera nafatin ho Ministerio Komunikasaun Sosial nene’e atu desenvolve diak liu tan saida maka ami bele no saida maka ami seidauk bele atu hodi kapasita nafatin ami, hodi foti dadus nebe maka iha ho kompletu transparansia no balansu ba iha future suco Makadiki nian. No hau husu ba maluk joven sira atu hakbesik an mai iha Sentru Informasaun. Mai ita hamutuk hodi desenvolve no promove ita nia talentu liu hosi ICT , liu hosi Sentru informasaun nebe maka kria ona”.
Entretantu tuir observasaun jornalista nian ekipamentus nebe iha sentru juventude nia laran maka hanesan komputador 2, telephone kamera ida kompletu ho nia rin. Kompleta mos mos ho meja kadeira no armari.
Remata.
