Be Timor Leste BTL- EP liu hosi kompania ida hosi Filipina halo perfurasaun be mos iha suku Uma-Ki’ik Posto administrative Viqueque Municipiu Viqueque. Cefe suku Uma Ki’ik hateten ba jornalista RPV katak actividade oras ne’e dadauk la’o hela
“ Atu dehan de’it katak kompania nebe maka halo perfurasaun be iha suku Uma Ki’ik agora dadauk ne’e nia actividade la’o hela hanesan ita hare dadauk ne’e, no antes ne’e sira mai koko uluk no identifika katak iha fatin ne’e maka iha be, nebe sira agora halo hela perfurasaun iha ne’e. No kompania nebe maka servisu ne’e hosi Nasaun Filipina no sira asina kontratu ho Governo Timor Leste liu hosi Be Timor Leste- Empreza Publiku (BTL-EP) hodi sira hala’o servisu “.
Nune’e mos cefe suku ne’e hatutan tan katak bainhira perfurasaun ne’e kuandu remata maka sei benefisia ba komunidade hamutuk rihun tolu resin nebe maka oras ne’e dadauk halerik hela ba be mos inklui mos escolar rua no postu Saude suku Uma ki’ik.
“ Hau hanoin katak kuandu perfurasaun be ne’e remata no hetan duni be nebe maka naton entaun sei fornese ba komunidade iha suku ida ne’e liu liu sira nebe maka hela iha ne’e pur volta de tres mil liu inklui mos escolar rua (2) nebe maka iha ne’e hanesan EBF Uma Ki’ik Beobe, eskola Sekundaria Jeral Kalixa no mos Postu Saude Uma Ki’ik, sira maka sei hetan benifisiu hosi be ida ne’e “.
Nia mos konfirma katak hosi parte autoridade local suku nian sei halo nafatin akompanyamentu ba projetu refere to’o remata tamba komnia nebe kaer obra ne’e mos hela iha cefe aldeia nia uma.
“ Hanesan autoridade local ami nafatin halo akompaniamentu, tamba projetu perfurasaun ne’e lokaliza iha aldeia Raihun no kompania nebe servisu mos sira hela tan kedas iha cefe aldeia nia uma, nebe sempre iha akompaniamentu hosi autoridade lokal “.
Entretantu Sekretariu 3 ba asuntu Sosial Municipiu Viqueque nian Acacio de Sousa deklara katak ne’e planu hosi BTL-EP nian maka hodi halo perfurasaun ba be refere tamba komunidade sira iha suku Uma Ki’ik durante ne’e halerik hela ba be mos tamba ne’e maka BTL hodi kontratu kompania mai halo perfurasaun. Sekretariu 3 ne’e mos husu atu BTL bele mos identifika mos suku sira seluk hodi bele halo mos perfurasaun
“ Perfurasaun be ne’e planu hosi BTL-EP nian hodi halo perfurasaun iha suku Uama Ki’ik ne’e tamba komunidade sira iha ne’e halerik hela ba be mos, tamba ne’e maka hodi hala’o perfurasaun ne’e. Hanesan autoridade Municipal husu mos atu BTL-EP bele identifika tan suku sira nebe maka susar atu asesu ba be mos no labele dada be karik hodi halo mos perfurasaun atu nune’e ita nia populasaun sir abele sente duni katak dezenvolvementu la’o duni to’o iha baze “.
Entretantu suku Uma Ki’ik ho nia abitantes hamutuk rihun tolu resin (3000 +) no pretense ba Postu Administrativu Viqueque vila. Komunidade iha suku refere mos durante ne’e konsumu de’it be mota Kuha nian nebe maka sira ke’e be matan iha mota laran hodi kuru ba nesesidade loron loron nian.
Jornalista ; Adriano Mesquita
