Prosesu aprendijajen iha Escola Ensinu Baziku Filial (EBF) Raitahu durante ne’e tinan 2024 la’o ho diak. Kordenador EBF Raitahu Marcos Sarmento dehan, durante tinan 2024 nia laran ne’e prosesu aprendijajen iha escolar ne’e la’o diak no tuir kurikulum nebe Ministeriu Edukasaun iha.
“ Prosesu aprendijajen iha escolar ne’e (EBF) Raitahu kompostu hosi siklu hatat hahu hosi Pre escolar, primeiru siklu, segundu no terseiru siklu agora dadauk la’o diak. Tamba ami nia profesores sira iha ne’e preparadu para hanorin. Sira asegura hela prosesu aprendijajen sira. Maske ami nia professor ida nebe hanorin iha terseiru siklu nia kontratu remata tiha ona iha tinan kotuk maibe professor sira seluk asegura hela nia material”.
Hatan ba pergunta jornalista nian kona ba kondisaun escolar ho nia fasilidades sira, Kordenador escolar ne’e dehan laiha problema tamba escolar refere foin hetan tan konstrusaun escolar foun no saneamentu kompletu.
“ Kondisaun ba edifisiu sufisiente hela, saneamentu diak,sintina diak,edifisiu mos aumenta tan tamba ami hetan obra lubuk ida nebe kondisaun escolar em jeral diak. So ami iha problema uituan kona ba dapur ba merenda escolar deit mak kondisaun la diak tiha ona. Ne’e sei iha impact uituan wainhira merenda escolar la’o fali”.
Entretantu Marcos Sarmento husu ba inan aman sira atu kontinua tau atensaun ba oan sira wainhira iha uma no kopera ho parte escolar nian hodi kontribui ba labarik sira nia prosesu aprendijajen iha escolar, atu nune’e bele lori Edukasaun iha Viqueque la’o ho diak, kualidade efikas no efisiensia. Escola EBF Raitahu iha estudantes hamutuk atus rua walunulu resin hitu (287) no profesores hamutuk sanulu resin lima (15) kompostu hosi Profesores permanente nai’in sanulu resin tolu (13) no kontratadu nai’in rua (2).
Jornalista; Adriano A. Mesquitq
