Ministru Prezidénsia Konsellu Ministrus hasoru malu ho Konsellu Diretivu foun Ajénsia Tatoli nian

Ohin, loron 11 fulan-fevereiru tinan 2025, Ministru Prezidénsia Konsellu Ministrus, Agio Pereira, hasoru malu ho Prezidente Konsellu Diretivu Ajénsia Tatoli nian, Noémio Mateus Soares Falcão, hodi ko’alia kona-ba hametin kooperasaun institusionál. Ida-ne’e nu’udar enkontru dahuluk entre Prezidente Tatoli no Ministru dezde Noémio Falcão simu pose, iha loron 10 fulan-janeiru liubá.

Akompaña Prezidente Tatoli iha sorumutu ne’e maka Vise-Prezidente ba Asuntus Média no Jornalizmu, Zezito da Silva, Vise-Prezidente ba Asuntus Administrasaun no Finansas, Madalena Pereira Carlos, Xefe Redasaun, Evaristo Soares Martins, no Koordenadór Kobertura Nasionál, Rafael Ximenes A. Belo.

Iha enkontru ne’e, reafirma misaun Tatoli hanesan órgaun referénsia ba komunikasaun iha divulgasaun informasaun nasionál no kobertura ba atividade governu nian.

Ministru Prezidénsia Konsellu Ministrus, nu’udar portavós Konsellu Ministrus no Governu nian, destaka importánsia hosi Tatoli hodi promove transparénsia no asesu ba informasaun públika, hodi realsa distinsaun entre papél ajénsia notisioza ida, ne’ebé nia misaun maka produsaun informasaun independente no faktuál ba públiku, no papél komunikasaun institusionál Governu nian, ne’ebé foka ba divulgasaun polítika no desizaun governamentál sira.

Governante ne’e enkoraja Noémio Falcão hodi reforsa knaar ajénsia nian no habelar ninia produsaun ba informasaun, atu nune’e bele alkansa públiku rejionál no internasionál, ho foku partikulár ba kontestu adezaun Timor-Leste nian ba ASEAN.

Sira mós ko’alia kona-ba dezafiu ne’ebé maka Tatoli hasoru, inklui nesesidade hodi reforsa kapasidades téknikas no operasionais atu garante kualidade no abranjénsia hosi kobertura jornalístika. https://timor-leste.gov.tl/?lang=en