Comisaun Nasionala das Eleiḉoẽs ( CNE ) municipiu Viqueque Rejista ona Kandidatus sira nebe sei compete ba Eleisaun Sucu iha loron 28 fulan Outubro tinan 2023 ne’e hamutuk ema nai’in 156 kompostu hosi Mane 135 no feto ema nai’in 21 maka sei compete ba Cefe do Sucus iha Sucus 36 nebe maka existe iha Municipiu Viqueque nia area kobertura. Lia ne’e hato’o hosi Comisariu CNE destakadu ba Municipiu Viqueque no Lautem, Olavio da Costa Monteiro ba Jornalista RPV iha nia knar fatin Beloi Viqueque kinta feira, loron 19-10-2023 semana ne’e. Entretantu Olavio da Costa Monteiro mos haklean liu tan dehan hosi kandidatus 156 ne’e laiha ema ida maka ho kondisaun Difisiensia.
“ Komisaun Nasional das Eleisoens ( CNE ) nudar orgaun nebe Independente nebe iha kompetensia atu halo supervizaun ba kualker Eleisaun, inklui mos Eleisaun Suco nian. Iha dia 13 de Outubro ita hotu hatene katak CNE nia prejensa iha Sede Sucus hotu hotu hodi hare no Suprevijiona actividades preparativus nian inklui mos estabelesementu Meja Eleitoral Suco nian hodi simu kandidatura sira. Iha aprejentasaun Kandidaturas, ba Municipiu Viqueque nian nebe hetan apoiu hosi Stae no superviziona hosi CNE hare katak prosesu de aprejentasaun kandidatura la’o normal la’o tuir baze legal nebe iha liu liu de akordu ho Lei No. 9 / 2016. E aprezentasaun Kandidatura ne’e iha Meja hotu-hotu, iha Sucu hotu-hotu simu kandidatura total hamutuk 157 kandidatus maka mai aprejenta sira nia kandidatura. Hosi Kandidatus 157 ne’e iha ida maka la admitidu nebe sira nebe admitidu hamutuk 156 no kandidatas Feto hamutuk ema 21 no Mane ema hamutuk 136”.
Hatan ba pergunta jornalista nian karik hosi kandidatus sira ne’e iha mos ema ho Difisiensia maka kandidata an, Comisariu CNE Olavio da Costa Monteiro dehan durante sira nia supervizaun laiha ema ho kondisaun Difisiensia maka kandidata an, maibe Olavio Monteiro dehan nia sente kontente tamba iha Municipiu Viqueque Kandidatura Feto barak liu kompara ho Municipiu Lautem maske laiha kandidatura ema ho Difisiensia.
“ Tuir observasaun hosi CNE la regista kandidatus sira ho kondisaun Difisiensia, maibe grasas a Deus iha Municipiu Viqueque ita bele hetan kandidatus admitivu hosi Feto Potensial hamutuk nai’in 21 nebe karik ita kompara ho Municipiu Lautem nebe hau mos halo konta iha neba kandidaturas Feto hamutuk nai’in 7 deit”.
Nune’e mos Komisariu CNE ne’e hatutan dehan ba sira nebe aprezenta ona sira nia kandidatura no admitidu ona ne’e katak sira bele ona atu compete iha Eleisaun Sucu nebe sei akontese iha loron 28 fula Outubru 2023 ne’e. No Nia husu atu kandidatus sira ne’e kria nafatin paz no estabilidade iha Sucus ida-idak nia laran.
“ Komisaun Nasional das Eleisoens ( CNE ) laiha informasaun espesifikamente ida atu hato’o ba iha kandidatus sira ne’e, maibe husu deit kuandu atu promove kandidatus ida-idak nia kandidatura ba publiku tenki liu hosi mekanismu ida nebe pasifiku buka ka evita provokasaun ba malu, Diskrimina malu no hatun malu iha publiku ka iha komunidade sira nia let. Bele koalia deit lia fuan sira nebe labele soke malu. CNE mos koalia hela iha Plenaria atu bolu mos kandidatus balun bele ba mos koalia liu hosi Media Publiku sira ba Populasaun hotu ka em jeral bele hatene”.
Entretantu Hosi Kandidatura 157 nebe iha, kandidatu nai’in ida ho naran Joᾶo Evaristo hosi Aldeia Ailo’oc Sucu Ahic Posto Administrativo Lacluta maka la admitidu ka la liu tamba nia apoiantes hamutuk ema nai’in 10 deit, enkuantu tuir lei no rekezitus nebe iha katak kandidatu sira tenki iha sira nia apoiantes minimal ema nai’in 25. No iha Municipiu Viqueque rasik mos seidauk iha kandidatus balun nebe maka mai ho kondisaun Difisiensia.
Jornalista : Adriano Mesquita
Editor ; Florindo de Jesus
