Parokia Viqueque forma ona ekipa hodi halo preparasaun Katikeze atu simu Vizita Sua Santidade Amu Papa Francisco nian mai Timor Leste iha fulan Setembro tinan 2024 ne’e. Padre Parku Imaculada Conceiḉᾶo Viqueque Pe. Tomas de Aquino Guterres Lopes da Cruz nebe konyesidu liu ho naran bolu Amu TOTO kasu lia hirak ne’e ba jornalista sira iha nia servisu fatin foin lalais ne’e.
“ Liga fali ba preparasaun nian, liu liu kona ba Katikeze nian ami iha Parokia Viqueque halo hela preparasaun hodi forma hela ekipa atu ekipa ida ne’e maka sei prepara material, nebe simu ona hosi konferensia episcopal kona ba katikeze preparasaun ba vizita Amu Papa nian. Atu prepara material molok atu tun ba sarani sira hodi halo katikeze. Atu nune’e sarani sir abele kompriende didiak kona ba se maka Amu Papa, no mos Amu Papa Francisco ninia biografia pesoal, I liga mos ho oinsa fiar no kultura, nebe it abele dehan katak iha ita nia rain ne’e buat rua ne’e fiar no kultura ne’e buat rua nebe labele hases, tenki la’o hamutuk. Ida ne’e maka ami prepra hela atu bele fo katikeze ba sarani sira, iha Viqueque ne’e ami iha grupu oarasaun, ekipa sei ba tama sai grupu sira hafoi sei ba iha estasaun sira hamutuk estasaun 16 no mos sei ba escolar sira hodi hasoru estudantes sita “.
Amu Toto mos kontinua hatutan dehan ita tenki prepara an di diak atu bele simu vizita Amu Papa nian no mos hosi parte Igreija nian presiza servisu hamutuk ho Governu ( Autoridade Municipiu), atu nune’e bele organiza sarani sira ho diak hodi bele ba partisipa iha eventu refere.
“ Ita hotu haksolok maibe ita mos presija prepara an atu bele simu vizita ida ne’e, hosi parte Nasional nian ita rona ona, maibe hosi Municipiu no Parikia sira iha Viqueque ne’e komesa ona halo enkontru hodi forma ona Komisaun ida atu bele oinsa organiza sarani sira atu bele ba partisipa, no komisaun ne’e foin halo enkontru iha semana liu ba no komesa ona organiza malu atu oinsa Parokia sira nebe eziste iha Municipiu Viqueque nian atu bele organija sarani sira, tan ne’e maka presija servisu hamutuk entre Igreja ho mos PAM. No agora komesa ona buka hela mekanismuoinsa atu bele halo registu ba sarani sira nebe maka atu ba “. No agora dadaun ne’e sarani sira husu atu ba ne’e oinsa? No komisaun hatan ona katak komisaun sei fasilita sarani sira atu ba no fila mai”.
Padre Parku Parokia Viqueque Tomas de Aquino Guterres Lopes mos informa katak, tuir dadus nebe iha kada Municipiu sei lori sarani rihun 50 atu ba partisipa hodi simu Sua Santidade Amu Papa Francisco.
“ Tuir nomeru nebe iha katak kada Municipiu sei haruka 50 mil, komu Municipiu Viqueque ne’e iha Postu lima entaun kada Postu kala sei haruka 10 mil. Hare ba nomeru nebe maka iha tuir hau nia hanoin katak buat ida atu b aka la ba ne’e sei fila fali ba sarani ida ida ninia vontade atu partisipa ka lae, maibe ita loke nafatin registu ba sarani hotu hotu atu mai tau naran atu bele ba partisipa iha eventu ida importante teb tebes liu liu iha momentu ida ita manifesta kona ba ita nia fiar hanesan sara Katoliku “.
Amu Toto mos hatutan liu tan katak, Sarani hotu hotu hanoin katak se sira hanoin katak Vizita Amu Papa nian ne’e hanesan buat importante no hanesan Istoriku ida ba sira entaun sarani barak maka sei ba partisipa.
“ Hau hein katak sarani hotu hotu sente katak se Amu Papa ne’e mai vizita sai hanesan momentu ida Istoriku, tamba Amu Papa mai vizita ne’e bele dehan katak mehi maka foin bele mai hasoru ita, tamba Amu Papa Saồ Joᾶo Paulo II mai vizita kuaze tinan 30 liu ba no agora dadauk maka maka foin ita atu hetan tan segundu vizita hosi Papa ida. Mais se sarani hotu hotu sente katak vizita ida ne’e hanesan buat importante id abele hasoru malu ho Amu Papa entaun sarani hotu hotu sei ba partisipa “.
Atu fo hanoin hikas ba ita hotu katak vizita Amu Papa Francisco nian mai Timor Leste tuir komunikadu nebe ita rona katak sei akontese iha fulan Setembru tinan 2024 ne’e no Sua Santidade sei to’o Timor iha loron 9 no sei hela to’o loron 11 hodi hala’o actividade Misa iha Tasi Tolu, Vizita fatin sira nebe identifikadu no mos karik hasoru malu ho Na’I Ulun sira TL nian hafoin kontinua nia vizita ba Nasaun seluk iha Asia.
Jornalista; Adriano A. Mesquita
