Komunidade aldeia Naeboruk Suco Uma Uai’in Kraik Posto Administrativu Viqueque vila husu ba autoridade Municipal de Viqueque atu labele autoriza pesoal limpeza sira lori lixu ba fakar iha aldeia refere tamba lixu nebe maka kareta lori ba fakar ne’e besik los iha be’e matan nebe maka durante ne’e sira konsumu. Tuir estekmentu nebe maka RPV asesu iha grupu WA Atoridade Municipiu Viqueque (AMV) nian sita katak; “ami hosi komunidade Naeboruk hakarak inform aba iha autoridade Municipiu Viqueque katak labele ona autoriza kareta lori fo’er ou sampah mai fakar iha airoportu Naeboruk ho razaun katak, fo’er nebe maka kareta lori ba fakar ne’e besik liu ba be matan nebe maka komunidade aldeia naeboruk konsumu ka uza, Iha estekmentu ne’e mos fo ultimatum katak komesa hosi loron nebe sira hato’o ne’e maka kareta sei kontinua lori fo’er ba fakar iha neba maka komunidade aldeia Naeboruk sei la autoriza tan ona kareta atu tama ba fakar fo’e r “.
Entretantu Administrador Posto Administrativu Viqueque vila, Leopoldo Alves mos liu hosi Pagina ofisial fb Municipiu nian rekonyese katak nia to’o duni iha fatin nebe komunidade sira kestiona hodi hare besik no fatin ne’e besik los duni ba be nebe maka komunidade sira konsumu loron loron.
“ Hanesan ita hotu hare iha media social nebe fo sai katak lixu fakar besik iha aldeia Naeboruk ne’e los duni, no agora dadauk ha’u mai to’o diretamente iha fatin refere no hare katak los duni ne’e la’os fatin nebe maka la merese atu soe fo’er, tamba fatin ne’e mos hanesan fatin ba kampu aviasaun nian no mos besik los be’e nebe maka oferese ba komunidade Naeboruk sira. Tamba ne’e hanesan autoridade Postu Viqueque Vila sei halo kordenasaun ho parte kompetente atu labele tan lori lixu mai fakar iha ne’e. Ita hotu mesak Viqueque oan buka atu kopera ba hodi buka fatin seluk nebe maka merese duni atu soe lixu tamba fatin ne’e hanesan hau dehan tiha ona katak la merese atu soe lixu iha ne’e. Tamba ita hatene katak Mundu mos ohin loron preokupa los ho lixu entaun ita tenki kopera ba hodi buka fali rai nebe maka livre atu tau lixu atu nune’e labele fo impaktu ba ita nia komunidade sira no mos labele estraga ita nia ambiente. Tamba ne’e hanesan autoridade maximu Postu Viqueque Vila husu ita hotu nia komprensaun hodi kopera ba diak Viqueque nian “.
Entretantu tuir observasaun jornalista RPV nian mos nota katak durante tinan barak ona maka pesoal limpeza sira rekolla foer sira sempre lori ba fakar tuir deit Estrada Nasional nia ninin sira, liu liu parte Estrada diresaun Viqueque ba Suco Bahalara wai’in Luca liga Postto Administrativu Lacluta no Natarbora Municipiu Manatuto. Ami mos observa katak actus ne’e fo imajen nebe maka ladiak ba iha publiku nia matan .
Jornalista; Adriano A. Mesquita
