Ministru Investimentu no Planeamentu Estratejiku Gastaun de Souza reprejenta Primeiru Ministru Kairala Xanana Gusmao partisipa iha komemorasaun aniversariu Komusaun Funsaun Publiku (KFP) nian ba dala sanulu resin ida iha Municipiu Viqueque Segunda feira loron 15 fulan Julhu tinan 2025 ne’e no hola fatin iha kampu demokrasia Viqueque vila. Iha deskursu Ministru Gastao Souza lori PM nia naran hato’o parabens ba funsionarius publiku sira hotu no husu atu sai nafatin servedor do estadu ida nebe diak hodi kontribui ba dezenvolvementu Timor Leste nian.
“ Lori Primeiro Ministru nia naran hakarak hato’o parabens ba funsionarius publiku sira hotu, ohin Ministra husu ita atu halo redusaun kona ba numeru, ne’e ita bot sira tenki hanoin ona ninia intensaun ne’e atu ba los iha nebe. Tamba ne’e para atu sai duni servidor do estadu, la’os ema maka atu servi fali ita. Ita hotu hein katak bele hala’o servisu ho diak hodi servi povu no Nasaun ida ne’e ho diak labele sai sombra de’it “.
Reprezentante PM ne’e mos husu atu funsionarius sira hotu atu toleransia zero no dignidade funsionariu nian labele sosa ho buat ruma.
“ Agora reprezenta PM hau husu ba ita bot sira hotu atu toleransia zero ba hahalok sira nebe mak fo prezuizu ba Estadu no husu atu funsionarius publiku sira emi nia dignidade labele sosa ho saida de’it, tamba funsionariu publiku ne’e pilar fundamental no importante ba dezenvolvementu Nasaun nian. Hau husu ba funsionarius publiku sira hanesan servedor do estadu tenki sai servidor duni ho dignidade ho integridade responsabilidade no dedikasaun tomak tamba povo presiza emi nia servisu tomak “.
Molok remata intervensaun Ministru Investementu no Planeamentu Estrateziku Gastaồ Souza nebe reprezenta PM ne’e mos hato’o parabens ba autoridade Municipiu Viqueque no komunidade tomak Viqueque nian nebe maka fo ona kontribuisaun maximu hodi komemora loron KFP nian ba dala sanulu resin ida (XI) ne’e. Entretantu komemorasaun loron funsaun publiku nian ba dala 11 iha Municipiu Viqueque ne’e hala’o mos actividades komesa hosi loron 7 nebe halo abertura hosi Vise Ministra Finansas hanesan desportu, pasar malam, la’o ain hosi ponte asalaitula mai to’o iha Buanurak Ossu, seminariu no ikus liu taka ho misa agradesementu nebe preside direta hosi Bispu Dioseze Baucau Dom Leandro Maria Alves iha igreja parokia Imaculada Konseisaun Viqueque molok kontinua ba kari aifunan iha jardim dos erois Craras.
Jornalista ; Adriano A. Mesquita
