Administrador Postu Administrativu (APA) Lacluta husu ba Ministeriu Obras Publiku (MOP) atu hadiak Estrada liga ba postu administrative Lacluta tamba agora dadauk kondisaun at grave. Lia ne’e hato’o hosi administrador Postu Lacluta Pascoal Gama Martins ba jornalista RPV foin lalais ne’e wainhira partisipa iha seremonia abertura ba desportu hodi komemora loron funsaun pybliku iha kampu demokrasia Viqueque Municipiu Viqueque. APA Lacluta ne’e dehan tan Estrada komesa hosi Rai hun ba to’o iha Postu Lacluta kondisaun at, sa tan ba liu to’o iha suku sira. Nia mos hatutan katak hosi parte Ministeriu Obras Publiku deklara tiha ona katak sei halo Estrada ba postu Lacluta ho total kilometru ruanulu maibe to’o agora seidauk realiza. Tamba ne’e nia parte husu atu MOP kumpri nia promesa sira ne’e.
“ Ami nia Estrada ne’e ita lalika koalia ba to’o iha suku sira, komesa kedas hosi Rai Hun ba to’o iha Postu Lacluta kondisaun grave los, at hotu ponte mos at tiha ona maka ami tula fali ai par abele liu provizoriu. No ita hotu mos rona ona katak hosi Ministeriu Obras Publiku foin lalais ne’e fo sai ona katak sei halo konstrusaun Estrada kilometru 22 ba Lacluta maibe to’o agora seidauk realiza, sa tan ba liu to’o suku. Tempu udan hanesan ne’e hau nia komunidade sira lalika mehi atu lori sira nia produtu local asesu mai merkadu iha Postu mai liu to’o iha Municipiu ”.
Entretantu hatan ba jornalista nia pergunta kona ba problema Estrada bele mos defikuta ba programa PNDS nian APA Lacluta ne’e dehan,
“ Programa PNDS nian barak liu maka la remata tamba Estrada maka ladiak, tamba ne’e maka benefisiariu sira balun hein to’o mate tiha de’it maibe sira labele sente benefisiu hosi projetu programa PNDS nian nebe sira hetan. Sira ne’e hotu tamba Estrada maka defikuta atu projetu sira ne’e bele la’o lalais”.
Nune’e mos kona ba projetu PNDS nian ba tinan 2025 APA Pascoal Gama Martins konfirma dehan agora dadauk balun la’o ona no balun foin maka halo kuotasaun para atu tuir tender, maibe se tama on aba bailoron entaun sei diak mais kuandu tempu udan fali ne’e sai nafatin problema tamba deit Estrada maka laiha. Pascoal mos hatutan dehan nia haruka ona karta id aba PAM id aba Ministru Obras Publiku no id aba iha Institutu Gestaun Ekipamentus atu hodi bele halo manutensaun emerjensia atu nune’e bele hodi fasilita sira hala’o servisu Governu nian no mos komunidade sir abele asesu ba merkadu maibe to’o agora seidauk iha resposta.
“ Hau hato’o ona kart aba sua eselensia PAM, sua eselensia Ministru Obras Publiku no mos Prezidente Institutu gestaun no apoiu ekipamentus para atu bele halo normalizasaun emerjensia baa mi nia Estrada no ponte atu nune’e bele fasilita ami hodi halo servisu Governu nian no mos fasilita komunidade sira hodi asesu ba merkadu par abele fa’an sira nia produtu maibe to’o agora laiha informasaun ruma hosi parte relevantes sira “.
Entretantu APA Lacluta ne’e mos husu ba Governu liu hosi Ministru Obras Publiku atu kumpri nia promesa katak atu hadiak Estrada ba Postu Lacluta ho distansia Kilometru 22 (22km) tamba Ministru rasik fo sai tiha on aba publiku hatene.
“ Hau husu ba Governu liu liu Ministru Obras Publiku atu kumpre promesa nebe atu halo konstrusaun Estrada ba Lacluta ho 22km tamba ministeriu rasik fo sai tiha ona iha publiku hodi ema hotu hatene no hein hela nia implementasaun “.
Entretantu kondisaun Estrada liga ba postu Lacluta oras ne’e dadauk kondisaun at grave, nune’e mos ponte sumaku iha suku Uma Tolu mos kotu iha fulan rua liu ba kotuk to’o agora seidauk hetan normalizasaun hosi aprte IGE.
Jornalista ; Adriano Antonio Mesquita
