Ezekusaun Orsamentu Geral do Estadu (OGE) Municipiu Viqueque nian ba tinan 2025 to’o agora atinzi ona porsentu lima nulu resin hitu (57%). Prezidente Autoridade Municipiu (PAM) Viqueque Francisco Cruz Simoẽs Gonzaga Soares hato’o lia ne’e ba jornalista RPV nian wainhira partisipa iha abertura ba actividade desportu hodi komemora loron Funsaun Publiku nian ba dala sanulu resin ida (11) iha kampu Demokrasia Viqueque foin lalais ne’e. PAM FranciscoCruz mos hatutan dehan iha problema uituan ho prosesu aprovizionamentu maka hodi halo prosesu la’o tarde, maibe tuir PAM ne’e katak bele aprende tan buat balun hosi prosesu ne’e rasik.
“ Oras ne’e ita atinji ona 57% nebe it abele dehan katak ezekusaun la’o diak, maibe ami hein katak la’os iha lista de’it maka dehan ita atinzi ona ida ne’e maibe ita hakarak katak ezekusaun fiziku mos tenki la’o hanesan. Para it abele atende ba povo nia nesesidades. Problema maka ne’e ita hasoru situasaun ida nebe ema dehan katak lei Aprovizionamentu ne’e maka defikuta ita iha ezekusaun lubuk ida maibe ida ne’e hanesan buat ida karik dezafia ita para atu hadia labele dehan katak buat hotu diak deit maibe prezudika fali ita iha tempu ikus mai. Nebe hau hanoin katak ita tenki la’o tuir ba mesmu ita dehan katak prosesu ne’e tarde, buat foun ba ita maibe ita buka de tal maneira hodi komprende no hatene hodi hala’o servisu ho diak “.
Hatan kona ba ezekusaun projetu PDIM nian lima iha Municipiu Viqueque to’o agora atinji ona porsentu hira, PAM ne’e dehan atinji ona 20%.
“ Oras ne’e implementa ona, tama ona progresu 20% nebe hau hanoin katak molok tama ba iha fim do ano prozetu sira ne’e balun sei hotu. Ita iha projetu lima deit no la’os ho valor nebe bot maibe tamba foin lalais ita tama ho sistema aprovizionamentu ne’e maka tarde uituan maibe to’o agora atinji ona 20%. Ita akompania atraves de monitoring ita mos ba hare direitamentu fatin projetu sira nebe maka iha atu hate los katak nia atinji duni ona 20% ne’e ka la’e, ita labele rona deit hosi ema depois ita fonis katak oh nia atinji ona porsentu hanesan ne’e, maibe ita tenki ba kaer rasik ho ita nia matan no liman maka ita foin hatene lolos katakprojetu ne’e la’o ona to’o iha nebe “.
Entretantu projetu sira nebe maka implementa iha Municipiu Viqueque maka, 1. Projetu rehabilitasaun Sentru Saude Posto Administrativu Uatucarbau, nebe manan hosi kompania Fin Los Unip.Lda, 2. Konstrusaun irigasaun We Lafua iha Postu Viqueque vila, kaer hosi kompania Nefcydorje Unip.Lda, 3. Rehabilitasaun Merkadu Olobai iha Postu Viqueque nebe kaer hosi kompania Kanela Unip. Lda, 4. Konstrusaun uma Maternidade iha Postu Administrativu Uatulari kaer hosi kompania Bonanmenia Unip. Lda no 5. Rehabilitasaun irigasaun natar Futudu Buanurak Postu Ossu Municipiu Viqueque nian, no projetu hirak ne’e oras ne’e dadauk la’o hela no atinji ona porsentu rua nulu (20%).
Jornalista ; Adriano Mesquita
