Ministerio Administrasaun Estatal (MAE) liu hosi Vise Ministro Jacinto Rigoberto hala’o konsulta sidadania iha Municipio Viqueque iha tersa feira loron 11-03-2025 no hola fatin iha salaun Administrasaun Municipal de Viqueque.
Vice MAE Jacinto Rigoberto hateten, “ Konsulta sidadaun ida ne’e ho nia objetivu atu rona, aprende, involve, kopera no kolabora kona ba elaborasaun planu annual no orsamentu, tamba ne’e konsulta sidadania ida ne’e importante tebes tamba atu hodi identifika prioridades sira hodi tau ba iha planu ba 2026 nian. Tamba ne’e konsulta ida ne’e atu Na’I cefe suco sira hamutuk ho linhas sektorais Municipal nia atu identifika prioridades iha linhas sektorais ida idak nian, hodi nune’e bele produz relatoriun ida godi ba entrega iha Ministra Finansas hamutuk ho Ministro Estatal atu bele lori ba aprezenta no deskute iha iha reuniaun Konselho de Ministros nian. Liu hosi konsultasaun sira ne’e maka ita sei akomula no rekolla no vincula lian sidadaun sira nia maka ita sei lori ba iha asaun ida konkreta nebe ita hanaran Planu Asaun Annual. No iha planu asaun annual ne’e maka ita alinya kedas ho orsamentu annual nian”.
Entretantu Jacinto Rigoberto mos kontinua hatutan dehan, “ actividade ida ne’e hanesan mos reflesaun ida atu rona, prioridades progresu no dezafius sira hosi ita nia sosiadade sira hodi atu atinji metas ba dezenvolvementu sustentavel ho nia sentidu katak la iha ema ida maka husik hela iha kotuk. Ita hotu hotu espera katak programa no planu sira nebe maka ita trasa no sei tau iha orsamentu bele fo duni impact maximu ba ita nia komunidade sira nia moris, liu liu iha Edukasaun no Saude”.
Vice MAE ne’e mos deklara katak “ Ministerio Administrasaun Estatal no Ministerio Finansas no Ministerio xave sira seluk sei garante katak, ita bot sira nia sujestaun sira sei sai hanesan bukae atu analiza no elabora planu no orsamentu, no relatoriu hosi konsultasaun ida ne’e sei sai hanesan dokumentus koomprensivu ida atu alinya politika Governo nian”.
Molok remata intervensaun Vice Ministru Administrasaun Estatal Jacinto Rigoberto mos hato’o agradesementu ba autoridades Municipal nian sira no mos konvidadus sira hotu nebe hola parte iha konsultasaun ne’e, no molok atu loke ofisialmente konsultasaun refere Vice MAE ne’e husik hela mensajen badak ida dehan, “ Viqueque atu ba oin, iha duni Viqueque oan sira nia liman rasik”.
Iha fatin hanesan, Prezidente Autoridade Municipal (PAM) Viqueque, Francisco Cruz Ximẽs Gonzaga Soares hato’o benvindu ba Vice MAE, Dir. Geral Ministerio Finansas ho ekipa, no aprezenta mos partisipantes sira nebe maka sei partisipa iha actividade konsultasaun ne’e. PAM Viqueque ne’e mos husu ba partisipantes sira atu tau atensaun hodi rona informasaun sira nebe maka sei hato’o hosi MAE no Ministerio Finansas.
Entretantu partisipa iha seremonia konsultasaun ne’e maka, Vice MAE ho ekipa, DG Ministeriu Finansas ho ekipa, PAM, Komandante PNTL Municipio, Reprezenta Konsellu Konsultivu Municipal Viqueque, Administradores Postos Administrativos lima (5), Cefe sucos tolu nulu resin ualu, reprezentantes Reliziozos, Sosiadade Civil reprezentantes Partidus Politikus no konvidadus sira seluk tan, no actividade ne’e hala’o iha Salaun Administrasaun Municipio Viqueque nia komesa hosi tiku 8,30 to’o tuku 14 ka tuku 2 meiu dia no loke ofisialmente hosi Vice Ministro Administrasaun Estatal (MAE) Jacinto Rigoberto.
Jornalista : Adriano Antonio Mesquita
