Timor-Leste no Austrália reforsa kompromisu iha dezenvolvimentu Greater Sunrise

Primeiru-Ministru, Kay Rala Xanana Gusmão hasoru malu ohin, loron 21 fulan-novembru 2024, ho Reprezentante Espesiál Austrália nian ba Projetu Greater Sunrise, Steve Bracks, iha Palásiu Governu, Dili. Iha enkontru ne’e hetan mós partisipasaun husi Ministru Prezidénsia Konsellu Ministrus no Interlokutór Timor-Leste nian ba Projetu Greater Sunrise, Agio Pereira, no Ministru Petróleu no Rekursus Minerais, Francisco da Costa Monteiro.

Sorumutu ne’e ho objetivu atu analiza situasaun atuál projetu nian no promove diálogu kona-ba pasu sira tuirmai, hafoin entrega estudu konsetuál ne’ebé elabora hosi Wood Australia ba konsórsiu dezenvolvimentu kampus Greater Sunrise (Sunrise Joint Venture), ne’ebé kompostu hosi TIMOR GAP (56,6%), Woodside (33,44%) no Osaka Gas Australia (10%). Estudu konsetuál ne’e identifika opsaun sira ne’ebé di’ak liu ba dezenvolvimentu, prosesamentu no komersializasaun gás ne’ebé hasai hosi Greater Sunrise, projetu estratéjiku ida ba Timor-Leste, ne’ebé konsidera esensiál ba kreximentu ekonómiku sustentável país nian.

Durante sorumutu ne’e, parte sira diskute kona-ba formas atu maximiza benefísius projetu nian ba nasaun rua ne’e, ho foku ba implementasaun infraestrutura ne’ebé garante transporta gás ba kosta súl Timor-Leste nian, prioridade nasionál ida ho impaktu signifikativu ba dezenvolvimentu ekonómiku no sosiál nasaun nian.

Hafoin sorumutu, Steve Bracks hatete ba jornalista sira katak ida-ne’e “enkontru ida ne’ebé di’ak tebes”, “atu avansa kampu gás Greater Sunrise no atu garante katak ami iha pozisaun ne’ebé loos atu hala’o projetu ida-ne’e.”

Steve Bracks subliña importánsia hosi estudu konsetuál ne’ebé hala’o hosi Wood, ne’ebé “klaru tuir komérsiu konfidensiál” hela, maibé hanesan “pasu importante ida hodi lori projetu ida-ne’e ba oin no hetan apoiu ba ninia implementasaun.”

Reprezentante Espesiál Austrália nian reforsa kompromisu Governu Austrália nian atu apoia projetu ne’e, hodi dehan katak “hanesan ohin ha’u dehan ba Primeiru-Ministru, Austrália prontu ona, ami-nia Governu prontu atu ajuda no fó apoiu ba realizasaun projetu ida-ne’e”.

Konkluzaun hosi estudu konsetuál no kontinuasaun hosi negosiasaun sira entre Timor-Leste ho Austrália nu’udar pasu importante ida hodi hametin parseria estratéjika entre país rua ba dezenvolvimentu Greater Sunrise nian, ho foku ba dezenvolvimentu sustentável no progresu ekonómiku ba nasaun rua ne’e. https://timor-leste.gov.tl/?p=40962&n=1&lang=tp