Veteranu Domingos Pinto nebe konyesidu liu ho Naran Kode MAU-RUIK husu ba joven sira atu banati tuir Falentil sira nia ain fatin, hodi labele haluha katak funu nebe naruk no Falentil mate barak tamba atu ukun rasik an.
“ Hau hanoin maluk sira, atu fo hanoin ba ema tomak liu liu oan ka alin joven sira ki’ik ka bot atu tuir ami nia ain fatin, nune’e atu labele haluha katak la’os ita fa’an manu ka ita fa’an modo tahan. Maibe ita fa’an ita nia inan feton, ita nia maun alin sira maka ohin loron ita bele hetan ukun rasik an ida ne’e. Nune’e hau hanoin ita hotu atu hanoin hikas fali ita nia saudozu no saudoza sira iha loron Fantil 20 de Agosto ne’e ”.
Mauruik mos hatutan dehan, 20 de Agosto nebe kada tinan ita komemora hanesan loron Falentil ne’e la signifika katak loron ne’e loron Falentil nian deit, maibe loron bot ba povo Timor Leste tomak, tamba wainhira sira sei luta iha ailaran sira iha moto ida dehan Falentil maka ikan no Povo maka be, tamba ne’e mak hodi labele haluha katak funu nebe durante luta Falentil mos mate povu barak mos maka mate.
“ Ho loron Falentil ida ne’e la’os ami Falentil nian mesak, maibe ita hotu nia loron. Tamba sa? Tamba uluk ami iha neba (ailaran ) ami iha lia fuan ida deit (moto) katak, Falentil maka ikan no Povo maka be. Ne’e duni maun alin inan feton sira tenki hanoin didiak hodi hatene katak ukun rasik an ida ne’e la’os ami Falentil mesak maka mate maibe ami Falentil mate emi povo feto no mane mos mate tamba atu ukun rasik an. Tamba ne’e hau nafatin fo hanoin ba foin sa’e sira feto no mane atu banati tuir ami nia ain fatin hodi hamutuk nafatin hodi hadia ita nia rain Viqueque, liu liu iha suku Bahalara Wa’in.
Domingos Pinto –MAURIK dehan lia hirak ne’e iha Suku Bahalara-Wa’in wainhira hala’o actividade desportu hodi komemora loron Falentil nian ba dala hat nulu resin hat ( 20 – 08 -1975 – 20-08-2024 ) iha Buikarin. Fo hanoin hikas katak actividade desportu refere hanaran Copa Manu Lari Cup ne’e partisipa hosi klube sira hosi suku tolu mak hanesan suku Bahalara Wa’in rasik, Bibileo, Luca no mos Suku Uma Tolu hosi Posto Administrativu Lacluta nian no komesan halo abertura iha loron 25 fulan Julhu liu ba no agora tama on aba iha oitavu Finais ( 8 besar), no actividade ne’e rasik inisiativa mai hosi Veteranus hamutuk ho komunidade Suku Bahalara Wa’in, I laiha apoiu ruma hosi parte Governu. No actividade refere realiza hodi komemora loron Falentil nian 20 de Agosto 2024 ba dala hat nulu resin hat.
Ekipa kobertura RPV
