Kinta feira loron 6 fulan Junho 2024 ne’e Konselho Imprensa ( KI ) TL hala’o sosializasaun kona ba Lei Komunikasaun Sosial no Ezersisiu Direitu Resposta no Ratifikasaun ba iha Linhas Ministerial no sosiadade sira iha Municipiu Viqueque nebe hola fatin iha Salaun Administrasaun Municipal de Viqueque. Prezidente Autoridade Municipal ( PAM ) de Viqueque Francisco Cruz Simồes Gonzaga Soares nebe partisipa hodi loke ofisialmentu actividade refere dehan importante tebes atu hatene kona ba Lei refere no husu ba Directores Linhas Ministeriais sira atu bele partisipa ho diak to’o remata.
“ Agradese ba tempu nebe ohin it abele halibur hamutuk iha ne’e maske la maksimal, actividade ida ne’e importante la halimar, dala ruma ita dehan media ne’e nia funsaun saida los? No dala ruma ita hare ita nia oin sai tiha ona iha neba sem konyesementu hosi hau rasik, Ne’e dala ruma ita atu dada fali mos susar los. Tamba ne’e oportunidade ida ne’e ita hasoru malu kedas ho ema bolu KI ne’e Konselho Imprensa, sira maka regula, sira maka hanesan bele fo hanoin ba Media sira. Nebe ita nia prejensa iha ne’e hanesan rona nai’in no mos bele aprejenta ka husu saida maka sai ita nia preokupasaun kona ba kobertura Media sira nian. Ita tenki aproveita didiak oportunidade ne’e atu rona no husu, liu liu material kona ba Lei no mos regulamentu nebe maka koalia kona ba direitu sira nebe maka ligadu ho publikasaun no mos direitu ba resposta ka defende an hosi ita nebe maka sai hanesan fonts ba Media sira. Tamba iha buat balu nebe maka sir abele halo no mos iha buat balun nebe maka sira labele halo. Tamba hanesan ita hatene Doutor sira servisu bazeia ba Kode etika Mediku sira nian, nune’e mos jornalista sira servisu bazeia ba sira nia Kode Etika, ema bolu dehan Kode Etika Jornalista nian. Nebe buat balun sira labele halo. Orsida it abele husu”.
PAM Francisco Simồes Gonzaga mos preokupa ho joven sira liu liu estudantes Sekundaria sira nebe maka aja media social tuir deit sira nia hakarak, tamba tuir PAM ne’e katak fo ameasa ba future joven sira nian.
“ Ita mos preokupa ho ita nia oan sira liu liu alin sira nebe escolar SMA, agora alin sira bolu Sekundaria, iha ne’e ita hare katak alin sira maka esplora liu Media ne’e liu liu Tik Tok, Face book, dala ruma ita mos asesu ba iha yotube. Ne’e nia impact ne iha, dala ruma ita desfama tiha ema, ita la hatene. Ita seidauk to’o iha buat ida nebe ema bolu dehan siber krime ema bolu krime nebe maka ligado ho teknolojia, dala ruma ita hare foto ne’e nia ulun ho oin ita nian mais tun ba kraik ne’e ema seluk nian. Ne’e ita atu julga halo nusa, ita atu regula halo nusa? Tamba ne’e oportunidade ida ohin ne’e importante atu it abele rona no husu kona ba buat sira hanesan ne’e. Nia diak no nia ladiak ba ita bot sira ne’e iha ka lae? “
Iha fatin hanesan Konselheira KI Isabel Fernandes nebe reprejenta Prezidente KI dehan Konselho Imprensa hari baze Lei Komunikasaun Sosial No 5/ 2014 no Dekretu Lei No. 25/2015 iha loron 5 fulan Outubro 20 15 kona ba kriasaun no nia Estatutu.
“ Konselho Imprensa Timor Leste nudar Orgaun Independente hari ho baze Lei Komunikasaun Sosial No. V/2014 no Dekretu Lei No. XXV/2015 iha loron 5 fulan Outubro tinan 2025 kona ba kriasaun no nia estatutu. Tui artigu 44 Lei Komunikasaun Sosial No. V/2014 papel principal KI nia maka atu promove Liberdade espresaun no Liberdade Imprensa iha TL, Ita hotu konsidera katak direitu ema hotu nian atu asesu ba informasaun no direitu ba espresaun no imprensa maka sai fundamental atu hametin liberdade imprensa, tamba ne’e maka Estadu iha dever tomak hodi hameti sector Komunikasaun Sosial, Nune’e prejensa orgaun Komunikasaun Sosial sira ho sira nia dever hala’o prosesu jornalistiku nian atu fasilita no apoiu direitu ema hotu nia ba asesu ba informasaun”.
Entretantu Konselheira KI nebe hetan nomeiasaun hosi Parlamentu Nasional ( PN ) Isabel Fernandes mos konsidera katak jornalista maka sai hanesan liman, ain, matan no tilun no ibun ema hotu nian, tamba ne’e nia husu ba dirijentes sira inklui sosiadade hotu iha Municipiu Viqueque atu simu no konsidera jornalista sira wainhira ba halo kobertura. Entretantu sosialijasaun Lei Komunikasaun Sosial no Direitu Retifikasaun no Resporta ne’e hato’o hosi Director Diresaun Apoiu Juridiku no Supervizaun ( DAJUS ) Zenilton Neves ho nia ekipa.
“ Karik ita bo’ot sira kolegas no dirijentes sira iha Municipiu Viqueque ne’e, liu liu Diretores sira Linahs Ministeriais sira karik ita bot sira hasoru ami nia kolegas sira maka mai ho sira nia atributu, sira nia kamera, sira nia tape gravasaun nian halo favor simu sira nia prejensa ho diak tamba ita hotu hatene katak media maka sai hanesan liman, ain, ibun, tilun no matan ba ema hotu. Ita mos hatene katak kapasidade jornalista sira nian maka, sira halo kobertura halo produsaun ba noticia ida no liu hosi prosesu lubuk ida iha redasaun maka foin halo publikasaun atu ema hotu bele asesu”.
Nune’e mos Konselheira KI ne’e sublinya liu tan dehan, Sosiadade iha direitu atu asesu ba informasaun no iha mos direitu atu hatan no direitu ba Retifikasaun liu liu kona ba publikasaun sira nebe maka la bazeia ba faktus ka ofende ema ruma. Tamba ne’e Nia husu ba partisipantes sira atu akompanya ho diak aprejentasaun nebe maka sei hato’o hosi ekipa teknika sira. Ikus liu Konselheira KI Isabel Fernandes hato’o agrdesementu ba PAM no Directores sira no partisipantes hotu tamba bele kopera ho diak no nia husu atu hatutan informasaun ne’e ba malu hodi hamutuk hadia diak liu tan servisu Media nian, liu liu iha Municipiu Viqueque.
Partisipa iha Sosialijasaun Lei Komunikasaun Sosial no Direitu Retifikativu no Resposta ne’e maka PAM Viqueque, Directores Linyas Ministeriais sira,APA Viqueque Vila, reprejentantes Partidus Politikus, Sosiadade Sivil, reprejentante Juventude Municipiu, Directores, Escolas Sekundaria tolu ho estudantes terseiru anu na’in 10 jornalistas hosi RPV, TATOLI no RRTL nebe destakadu iha Municipiu Viqueque inklui Media Ofiser PAM nian hamutuk ema besik lima nulu (50 ).
Jornalista; Adriano A. Mesquita
