Autoridades, Veteranus estudantes no komunidade Municipiu Viqueque komemora Loron Nasional Veteranus ba dala hitu ( 7 ) iha Kampu Demokrasia Viqueque loron 3 fulan Marsu tinan 2023 ne’e. hafoin hasa’e tiha Bandeira hosi ekipa no Fram Band escolar Liceu 4 de Setembro no PNTL partisipantes sira rona diskursu hosi Primeiru Ministru Kairala Xanana Gusmao nia nebe gravadu ona.
Entretantu Prejidente Autoridade Municipiu Viqueque Januario Soares – Boli iha intrevista ho jornalista sira dehan, Veteranus maka nai’in ba Ukun rasik an no air in ba Nasaun ida ne’e.
“ hanesan hakerek iha neba katak Veteranus maka nai’in ba Ukun Rasik An no sai air in ba Nasaun ida ne’e. Nebe TL agora Independensia tiha ona, I Independensia ida ne’e rejultadu hosi luta Veteranus sira nian hamutuk ho Povo Timor tomak. Tamba ne’e ba Veteranus sira nebe sei moris husu nafatin sira nia kontribuisaun no apoiu hodi bele hamutuk nafatin ho povo sira hodi bele luta nafatin ba Desenvolvementu iha rai ida ne’e”.
Hatan ba pergunta jornalista sira nian kona ba hanoin balun hosi publiku katak durante ne’e Veteranus maka sai impedementu ba prosesu Desenvolvementu iha Rai ne’e Januario Soares-Boli dehan ne’e lalos.
“ Hau hanoin impede la’e, mais ita nia Veteranus sira nebe maka uluk luta ba rai ida ne’e atu TL ukun an ne’e, atu ema hotu moris diak maibe situasaun moris ba ita nia Veteranus sira mos sei susar no moris hela iha situasaun nebe susar, I tamba ne’e maka dala barak sira mos hakarak partisipa iha desenvolvementu ida ne’e maibe tamba ita nia komunidade sira mos sei moris hela iha susar no terus nia laran tamba ne’e maka sira hare Veteranus sira hanesan fali impedementu ka obstakulu ba sira, no konsidera Veteranus sira hanesan sai fali impedementu ida ba sira. Hau hanoin ida ne’e sala no la los ida”.
Entretantu Prezidente Autoridade Municipal Januario Soares –Boli mos husu nafatin ba Veteranus sira atu ajuda nafatin Estadu no Governo hodi kria nafatin Paz no estabilidade atu nune’e prosesu desenvolvementu bele la’o ho diak no lais.
Iha fatin hanesan Presidente konselho Municipal dos Kombatentes da Libertasaun Nasional ( CMCLM ) Viqueque Adriano-LENTIL dehan loron 23 fulan Marsu sai hanesan loron Veteranus nian tamba Uluk Rezistensia Armada sira reorganija fila fali funu ida ne’e hahu hosi loron ida to’o loron hitu fulan Marsu, maibe sira hili loron 3 fulan Marsu maka sai hanesan loron Nasional ba Veteranus sira. Entretantu Lentil mos afirma katak, Vetranu barak maka Estadu rekonyese tiha ona sira nia luta maibe balun sei hela iha prosesu nia laran.
“ Veteranu barak maka Estadu no Governu rekonyese tiha ona, maibe iha mos sira barak maka sei iha prosesu nia laran no sira nia naran iha tiha ona no sira nebe halo tiha ona verifikasaun ne’e sei iha tan prosesu balun maka tenki halo tan maka hanesan, sei halo avaliasaun, sei halo aprovasaun no terseiru maka sei taka sai naran ka Edital iha Municipiu hotu. Kuandu taka sai ona ema hotu bele ba hare populasaun tomak sei hare, nia Veteranu duni ka la’e? Se la’os Veteranu bele hasai fila fali”
Prezidente Municipal Konselho Libertasaun Nasional ne’e mos klarifika katak Konselho dos Combatentes da Libertasaun Nasional ne’e Orgaun ida Independente no orgaun ida nebe akomula ema hotu atu ajuda Estadu hodi hala’o desenvolvementu. Adriano Lentil mos husu ba Veranus sira hotu iha Municipiu Viqueque atu iha Loron bo’ot sira ( Loron Nasional ) tenki partisipa iha Seremonia nebe maka Estadu no Governo halo, la’os hein deit loron to’o maka ba forma iha Banku, ne’e la’os Veteranu.
Atu informa mos ba publiku katak, iha Municipiu Viqueque Rasik antes ne’e hahu hosi loron ida fulan Marsu 2024 komisaun Organijadora organija ona actividades balun maka hanesan, Seminariu, Misa de agradesementu no lori aifunan ba kari iha Jardin dos Herois iha Kraras Suco Bibileo hodi agradese no valorija Veteranu sira nebe maka mate tiha ona. No iha loron 3 fulan Marsu nebe sai hanesan loron Nasional ba Veteranus ne’e hala’o actividade hasa’e Bandeira Nasional iha Kampu Demokrasia Viqueque no Rona Diskurusu hosi Sua Exelensia Primeiru Ministru Kairala Xanana Gusmaun nian nebe gravadu tiha ona. Hafoin kontinua ho almosu de konfraternizasaun no actividade ikus maka hatun fali Bandeira RDTL iha loraik tuku 5 oras TL.
Partisipa iha Seremonia komemorasaun Loron Nasional Veteranu ba dala hitu iha Municipiu Viqueque ne’e maka Prezidente Autoridade Municipio, Komandante PNTL Municipiu, Prezidente ba Asuntus Kombatentes da Libertasaun Nasional Municipiu, Directores Linhas Ministeriais sira, Veteranus Administradore Postos Administrativus lima ( Viqueque, Lacluta Ossu, Watulari no Watucarbau ) PNTL komunidade balun no estudantes sira. Entretantu sai hanesan ekipa nebe responvel ba dada Bandeira Nasional maka membru PNTL balun no escolar Liceu 4 de Setembro Viqueque akompanya ho Dram Band. Entretantu Tem aba Komemorasaun loron Nasional ba Tinan 2024 ne’e mak
“ JUNTOS MARCHAREMOS PARA O FUTURU – HAMUTUK LA’O BA OIN “.
Jornalista ; Adriano A. Mesquita.
