Polisia Nasional Timor Leste (PNTL) Municipiu Viqueque fo formasaun ba estudantes escola Cafe de Viqueque iha salaun Administrasaun Munisipal Viqueque konaba utiliza kapasete bainhira uza motor,hakat liu estrada no lei tranzitu nian. Representante komandante PNTL Munisipio Viqueque Domingos Gomes hato’o katak; “ atividade ida neé parte husi instituisaun PNTL bolu dehan Polisiamentu Komunitaria mak kolia ho estudantes ho komunidades, kolia ho ema hotu hotu neébe iha relasaun ho polisia. Polisia iha nia moto ida iha tinan ida liu ba tau dehan vizibilidade, envolvimentu no profissionalismo. Vizibilidade katak ita lao ba mai, envolvementu katak envolve an no professionalismo katak servisu ho profisional “.
Iha fatin hanesan, Rogerio Soares Guterres, hanesan Policia Transitu hatuir katak; “ iha seksaun transitu hala’o servisu tuir diresaun nia knar, maibe ami iha regulamentu, Lei, no ami iha Dekretu Lei N⁰. 6/2003 dia 3 de Abril de 2003 no iha mos Lei Organica da PNTL artigu 19 nia fo poder tomak ba Policia Tranzitu atu halo nia knaar, knaar transitu nia mak atu asegura, prevensaun ba motorista hotu neébe kondus motor no kareta no ba ema lao ain mos, tamba estudantes no ema lao ain sira hatene hela sinais sira iha estrada maibe lao sala nafatin dalan. Polisia Transitu nia servisu neé oinsa atu halo movimentu oinsa atu observa iha dalan sira neé liu liu iha estrda publik. dala barak akontese asidente tanba la’o lalos no la tuir sinais sira neébe ema monta iha dalan. Tamba neé mak Polisia Transitu nia servisu, tur hodi observa oinsa para garante katak ema hotu la’o ho disipliña, tuir regras no lao tuir Lei neébe ita nia Nasaun ita nia Parlamentu aprova “.
Entretantu Kordenador escolar Cafe de Viqueque José De carvalho nebe partisipa mos iha actividade ne’e hato’o katak, oportunidade diak tebes ba ita, primeira ves akontese tanba neé ami hato’o obrigado wai’in tebes ba PNTL nebe fahe ona informasaun ba estudantes sira. Ho dalan ida neé oinsa atu servi ami nia estudantes sira konaba lei tranzitu neé mos parte ida importante tebes husu mos ba alunos sira atu rona no halo tuir atu nuneé hadok an husi dezastre no iha futuru mai bele uza regulamentu sira neé diak liu tan.
Partisipa iha actividade fahe informasaun neé, Segundo Komandante PNTL Munisipio, Komandante Investigasaun, Komandante, VPU, Komandante Polisiamentu Komunitariu (Polkom), Diretor no konselho professores inklui estudantes escola Cafe de Viqueque nia sira hotu.
Ekipa kobertura Radio Povo Viqueque (RPV)
