Autoridade Protesaun Civil (APC) Municipiu Viqueque halo lansamentu destribuisaun material ba vitima dezastre naturais hamutuk uma kain hitu nulu resin rua iha Municipiu Viqueque. Komandante APC Municipiu Serilo Soares Gomes hateten, vitima sira ne’e mai hosi Postu lima nebe maka iha Municipiu Viqueque nia area no dadus ne’e mai hosi tinan 2023 no 2024 liu ba.
“ Tinan hirak liu ba (2023-2024) ita halo rejistrasaun ba vitima sira nebe maka afeta ba dezastre hodi haruka ba Nasional, tamba ne’e maka ohin ita halo lansamentu ba rezultadu hosi dadus sira ne’e. Tamba ne’e ohin ita sei halo lansamentu no destribuisaun sasan ba vitima hamutuk uma kain 72 no sei fahe ba ekipa rua hanesan ohin ita sei komesa hosi postu rua maka Ossu no postu Viqueque vila hamutuk vitima na’in 38 kompostu hosi kategoria tolu maka hanesan, at total at naton no at Kaman, no aban sei kontinua ba iha postu Administrativu tolu seluk mak hanesan Postu Lacluta, Watulari no Watu-Carbau ho total vitimas hamutuk uma kain tolu nulu resin hat (34) “.
Entretantu iha fatin hanesan reprezentante Prezidente Autoridade Municipiu (PAM) Viqueque Cefe Gabinete Luis Antonio da Costa Soares hato’o mensajen PAM nian husu ba Cefe Suku sira atu kontinua tau matan ba vitima sira nebe maka hetan sasan sira ne’e atu lori ba halo ka hadiak sira nia uma no labele fa’an fali.
“ Ita nia Governu la taka matan ba komunidade sira nebe maka afeta ba dezastre naturais no sempre apoiu buat nebe maka presija, tamba ne’e husu ba Cefe Suku sira atu akompania nafatin ita nia benefisiarius sira ho sira nia sasan ba to’o iha fatin hodi bele buka fali fatin nebe maka seguru hodi hari fali sira nia uma no labele fa’an fali sasan sira nebe maka Governu apoiu on aba ne’e ka fo fali ba ema seluk. PAM mos hameno atu vitima sira nebe maka sai benefisiariu ba sasan sira ne’e atu uza hodi hadiak fila fali emi nia uma nebe maka hetan ona estraga hosi dezastre iha tempu liu ba “.
Nune’e mos Diretor Geral APC Nasional hato’o katak foin maka ohin loron hala’o lansamentu fahe material sira ne’e maske dezastre ne’e akontese tiha ona iha tinan id aka rua liu ba tamba nia prosesu ne’e maka naruk tamba sei hare tuir nia estragus nebe maka fahe ba kategoria tolu.
“ Ohin loron ita foin maka halo lansamentu no destruisaun tamba nia prosesu ne’e naruk, ita sei halo verifikasaun ba kategoria tolu maka hanesan, at total, at naton noa at Kaman. Nune’e verifikasaun ne’e han prosesu nebe naruk duni, no hau fiar katak vitima sira mos halo fali ona sira nia uma rasik, maibe Governu nafatin fo tulun tuir kategoria sira nebe verifika ona. Atu hato’o mos katak material nebe maka Governu apoiu ba ne’e maka hanesan sasan ka material konstrusaun uma nian ho mos osan ba apoiu konstrusaun ka maun de obra no transporte sasan nian. Ba estragus total sei hetan material kontrusaun no osan $ 1.000, at naton $ 650 no at Kaman $ 650. Ida ne’e maka orsamentu nebe tau hodi tulun inan aman sira nebe maka afeta ba dezastre hodi tulun hikas maske naton deit. Ho nune’e maka orsamentu nebe maka tau hamutuk hodi rekopera fali vitima sira iha Municipiu Viqueque hamutuk Rihun lima nulu resin ruan atus rua dolars Americanu ( $ 52.200,00) “.
Entretantu reprezentante Sekretario Estadu Protesaun Civil ne’e mos husu ba benefisiarius sira atu uza sasan sira ne’e no osan nebe ajuda hodi hari fali um aka rekopera fali material sira nebe hetan ona estragus hosi dezastre naturais no labele fa’an ka fo tutan ba ema seluk tamba APC sei kontinua halo monitorizasaun ba catividade iha terenu to’o remata.
Lansamentu ba destribuisaun material kontrusaun no orsamentu ba maun de obra no transporte ne’e hala’o Kuarta feira ne’e iha salaun Centru Evakuasaun Municipiu Viqueque nian iha Beloi no hetan partisipasaun hosi reprezentante Sekretariu Estadu Protesaun Civil ho ekipa, reprezentante PAM Viqueque, Komandante PNTL Municipiu, Komandante Autoridade Protesaun Civil Municipiu ho membrus, APA postu lima, Cefe sukus sira no mos benefisiarius hamutuk 72. Tuir observasaun jornalista nian hafoin hala’o tiha lansamentu kontinua kedas ho fahe material konstrusaun no osan ba maun de obra ba benefisiarius sira hosi postu Administrativu Viqueque Vila no Ossu.
Jornalista ; Adriano A. Mesquita
